Read Swahilli 2 Samueli 22 Bible Online

2 Samueli 22 - Swahilli bible

2 Samueli 22

¹[153] Daudi alimwimbia Mwenyezi-Mungu maneno ya wimbo ufuatao siku ile Mwenyezi-Mungu alipomkomboa mikononi mwa adui zake, na mkononi mwa Shauli.

²Alisema, “Mwenyezi-Mungu ni mwamba wangu, ngome yangu, na mkombozi wangu.

³Mungu wangu, mwamba wangu,[154] ninayemkimbilia usalama; ngao yangu, nguvu ya wokovu wangu, ngome yangu na kimbilio langu. Mwokozi wangu; unaniokoa kutoka kwa watu wakatili.

⁴Namwita Mwenyezi-Mungu astahiliye sifa anisaidie, nami naokolewa kutoka kwa adui zangu.

⁵“Maana mawimbi ya kifo yalinizingira, mafuriko ya maangamizi yalinivamia;

⁶kamba za kuzimu zilinizinga, mitego ya kifo ilinikabili.

⁷“Katika taabu yangu, nilimwita Mwenyezi-Mungu; nilimwita Mungu wangu. Toka hekaluni mwake aliisikia sauti yangu, kilio changu kilimfikia masikioni mwake.

⁸“Hapo, dunia ikatetemeka na kutikisika, misingi ya mbinguni ikayumbayumba na kuruka,[155] kwani Mungu alikuwa amekasirika.

⁹Moshi ulifuka kutoka puani mwake, moto uunguzao ukatoka kinywani mwake, makaa ya moto yalilipuka kutoka kwake.

¹⁰Aliinamisha anga, akashuka chini; na wingu jeusi chini ya miguu yake.

¹¹Alipanda kiumbe chenye mabawa[156] na kuruka, alionekana juu ya mabawa ya upepo.

¹²Alijizungushia giza pande zote, kifuniko chake kilikuwa mawingu mazito[157] na mkusanyiko wa maji.

¹³Umeme ulimulika mbele yake, kulilipuka makaa ya moto.

¹⁴Mwenyezi-Mungu alinguruma kutoka mbinguni, Mungu Mkuu[158] akatoa sauti yake.

¹⁵Aliwalenga adui mishale, akawatawanya, alirusha umeme, akawatimua.

¹⁶Mwenyezi-Mungu alipowakemea, kutokana na pumzi ya puani mwake, vilindi vya bahari vilifunuliwa, misingi ya dunia ikaonekana.

¹⁷“Mungu alinyosha mkono wake toka juu, akanichukua, kutoka kwenye maji mengi alininyanyua.

¹⁸Aliniokoa kutoka kwa adui yangu mwenye nguvu, aliniokoa kutoka kwa hao walionichukia maana walikuwa na nguvu nyingi kunishinda.

¹⁹Walinivamia nilipokuwa taabuni, lakini Mwenyezi-Mungu alikuwa kinga yangu.

²⁰Alinileta, akaniweka mahali pa usalama, alinisalimisha, kwani alipendezwa nami.

²¹“Mwenyezi-Mungu alinipa tuzo kadiri ya uadilifu wangu; alinituza kwa vile mikono yangu haina hatia.

²²Maana, nimefuata njia za Mwenyezi-Mungu, wala sikujitenga na Mungu wangu kwa uovu.

²³Nimeshika maagizo yake yote, sikuacha kufuata masharti yake.

²⁴Mbele yake sikuwa na hatia, nimejikinga nisiwe na hatia.

²⁵Mwenyezi-Mungu amenituza kadiri ya uadilifu wangu, yeye anajua usafi wangu.

²⁶“Wewe ni mwaminifu kwa walio waaminifu, mwema kwa wale walio wema.

²⁷Wewe ni mkamilifu kwa walio wakamilifu, lakini mkatili kwa watu walio waovu.

²⁸Wewe wawaokoa walio wanyenyekevu, lakini wawaangalia wenye majivuno kuwaporomosha.

²⁹Ee Mwenyezi-Mungu, wewe u taa yangu, Mungu wangu, unayefukuza giza langu.

³⁰Kwa msaada wako, wakishambulia kikosi; wewe wanipa nguvu ya kuruka kuta zake.

³¹Anachofanya Mungu hakina dosari! Ahadi ya Mwenyezi-Mungu ni ya kuaminika; yeye ni ngao kwa wote wanaomkimbilia.

³²“Nani aliye Mungu isipokuwa Mwenyezi-Mungu? Nani aliye mwamba wa usalama ila Mungu wetu?

³³Mungu huyu ndiye kimbilio langu imara, na ameifanya njia yangu iwe salama.

³⁴Ameiimarisha miguu yangu kama ya paa, na kuniweka salama juu ya vilele.

³⁵Hunifunza kupigana vita, mikono yangu iweze kuvuta upinde wa shaba.

³⁶Umenipa ngao yako ya kuniokoa; msaada wako umenifanya mkuu.

³⁷Umenirahisishia njia yangu; wala miguu yangu haikuteleza.

³⁸Niliwafuatia adui zangu na kuwaangamiza, sikurudi nyuma mpaka wameangamizwa.

³⁹Niliwaangamiza, nikawaangusha chini wasiweze kuinuka tena; walianguka chini ya miguu yangu.

⁴⁰Wewe ulinijalia nguvu ya kupigana vita; uliwaporomosha adui chini yangu.

⁴¹Uliwafanya adui zangu wakimbie, na wale walionichukia niliwaangamiza.

⁴²Walitafuta msaada, lakini hapakuwa na wa kuwaokoa, walimlilia Mwenyezi-Mungu, lakini hakuwajibu.

⁴³Niliwatwanga na kuwaponda kama mavumbi ya nchi, nikawaponda na kuwakanyaga kama matope barabarani.

⁴⁴“Wewe uliniokoa na mashambulizi ya watu wangu, umenifanya mtawala wa mataifa. Watu nisiowajua walinitumikia.

⁴⁵Wageni walinijia wakinyenyekea, mara waliposikia habari zangu walinitii.

⁴⁶Wageni walikufa moyo; wakaja kutoka ngome zao wakitetemeka.

⁴⁷“Mwenyezi-Mungu yu hai! Asifiwe mwamba wangu! Atukuzwe Mungu wangu, mwamba wa wokovu wangu.

⁴⁸Yeye ameniwezesha kulipiza kisasi na kuyatiisha mataifa chini yangu.

⁴⁹Ameniokoa kutoka adui zangu. Ee Mwenyezi-Mungu, ulinikuza juu ya wapinzani wangu na kunisalimisha mbali na watu wakatili.

⁵⁰“Kwa hiyo, nitakutukuza kati ya mataifa, ee Mwenyezi-Mungu, nitaliimbia sifa jina lako.

⁵¹Mungu humjalia mfalme wake ushindi mkubwa; humwonesha fadhili zake huyo aliyemweka wakfu, naam, humfadhili Daudi na wazawa wake milele.”