Read Swahilli Yobu 34 Bible Online

Yobu 34 - Swahilli bible

Yobu 34

¹Kisha Elihu akaendelea kusema:

²“Sikilizeni maneno yangu enyi wenye hekima, nitegeeni masikio yenu, nyinyi wenye ujuzi.

³Sikio huyapima maneno, kama vile ulimi uonjavyo chakula.

⁴Basi, na tuchague lililo sawa, tuamue miongoni mwetu lililo jema.

⁵Basi, Yobu ametamka: ‘Mimi Yobu sina hatia, Mungu ameniondolea haki yangu.

⁶Ingawa sina hatia naonekana kuwa mwongo; kidonda changu hakiponyeki ingawa sina kosa.’

⁷Ni nani aliye kama Yobu ambaye kwake ubaradhuli ni kama kunywa maji?

⁸Huandamana na watenda maovu hutembea na watu waovu.

⁹Maana amesema, ‘Mtu hapati faida yoyote, kujisumbua kumpendeza Mungu.’

¹⁰“Kwa hiyo nisikilizeni, enyi wenye ujuzi. Mungu kamwe hawezi kufanya uovu; Mungu Mwenye Nguvu hawezi kufanya kosa.

¹¹Mungu atamlipa mtu kadiri ya matendo yake, atamlipiza kulingana na mwenendo wake.

¹²Ni ukweli mtupu: Mungu hafanyi ovu; Mungu Mwenye Nguvu kamwe hapotoshi haki.

¹³Je, kuna aliyemkabidhi mamlaka juu ya dunia? Uwezo wake juu ya ulimwengu ni wake peke yake.

¹⁴Kama Mungu angejifikiria tu yeye mwenyewe, akiondoa pumzi yake ya uhai duniani,

¹⁵viumbe vyote vingeangamia kabisa, naye binadamu angerudi mavumbini.

¹⁶“Kama una akili sikiliza; sikiliza ninachokuambia.

¹⁷Je, anayetawala ulimwengu kwa sheria zake anachukia haki? Je, utathubutu kumhukumu mwadilifu na mwenye nguvu?

¹⁸Amwambiaye mfalme, ‘Wewe ni takataka!’ na watu mashuhuri, ‘Nyinyi ni waovu!’

¹⁹Yeye hawapendelei wakuu, wala kuwajali matajiri kuliko maskini, maana wote hao ni kazi ya mikono yake.

²⁰Kufumba na kufumbua hao wamekufa; hutikiswa usiku na kuaga dunia; nao wenye nguvu hufutiliwa mbali bila kutumia nguvu za mtu.

²¹“Macho ya Mungu huchunguza mienendo ya watu; yeye huziona hatua zao zote.

²²Hakuna weusi wala giza nene ambamo watenda maovu waweza kujificha.

²³Mungu hahitaji kumjulisha mtu wakati wa kumleta mbele ya mahakama yake.

²⁴Huwaangamiza wenye nguvu bila uchunguzi, na kuwaweka wengine mahali pao.

²⁵Kwa kuwa anayajua matendo yao yote, huwaporomosha usiku wakaangamia.

²⁶Huwachapa hadharani kwa ajili ya uovu wao,

²⁷kwa sababu wameacha kumfuata yeye, wakazipuuza njia zake zote.

²⁸Hata wakasababisha kilio cha maskini kimfikie Mungu, Mungu akasikiliza kilio chao hao walioteswa.

²⁹Kama Mungu akinyamaza, nani awezaye kumlaumu? Kama akificha uso wake, nani awezaye kumwona,

³⁰liwe ni taifa au mtu mmojammoja? Hufanya hivyo, mtu mbaya asitawale, au wale wahatarishao maisha ya watu.[166]

³¹“Tuseme mtu amemwambia Mungu, ‘Nimekosa, sitatenda dhambi tena.

³²Nioneshe makosa nisiyoweza kuyaona kama nimetenda mabaya sitayarudia tena.’

³³Je, Mungu atapaswa kumwadhibu kama uonavyo wewe? Wewe ndiwe unayeamua, sio mimi. Basi, sema unachofikiri wewe.

³⁴Mtu yeyote mwenye akili, na kila mwenye hekima anayenisikiliza atasema:

³⁵‘Yobu anaongea bila kutumia akili, maneno yake hayana maana.’

³⁶Laiti Yobu angechunguzwa mpaka mwisho, kwa maana anajibu kama watu waovu.

³⁷Huongeza uasi juu ya dhambi zake; anaeneza mashaka kati yetu, na kuzidisha maneno yake dhidi ya Mungu.”