Read Swahilli Zaburi 52 Bible Online

Zaburi 52 - Swahilli bible

Zaburi 52

¹[253] (Kwa Mwimbishaji. Utenzi wa Daudi baada ya Doegi, Mwedomu, kumwendea Shauli na kumjulisha kuwa Daudi amekwenda nyumbani kwa Abimeleki) Mbona, ewe jitu, wajivunia ubaya wako dhidi ya wenye kumcha Mungu?[254]

²Kila wakati unawaza maangamizi; ulimi wako ni kama wembe mkali! unafikiria tu kutenda mabaya.

³Wewe wapenda uovu kuliko wema, wapenda uongo kuliko ukweli.

⁴Ewe mdanganyifu mkuu, wapenda mambo ya kuangamiza wengine.

⁵Kwa hivyo Mungu atakuangamiza milele, atakunyakua na kukuondoa nyumbani mwako; atakung'oa katika nchi ya walio hai.

⁶Waadilifu wataona hayo na kuogopa, kisha watakucheka na kusema:

⁷“Tazameni yaliyompata mtu huyu! Yeye hakutaka Mungu awe kimbilio lake; bali alitegemea wingi wa mali yake, na kutafuta humo usalama wake!”[255]

⁸Lakini mimi ni kama mzeituni mbichi, unaostawi[256] katika nyumba ya Mungu. Nazitegemea fadhili zake milele na milele.

⁹Ee Mungu, nitakushukuru daima, kwa ajili ya mambo uliyofanya. Nitatangaza kwamba wewe ni mwema, mbele ya watu wako waaminifu.