Read Swahilli Zaburi 74 Bible Online

Zaburi 74 - Swahilli bible

Zaburi 74

¹[350] (Utenzi wa Asafu) Kwa nini, ee Mungu, umetutupa kabisa? Mbona hasira yako inawaka dhidi ya kondoo wako!

²Kumbuka jumuiya yako uliyojipatia tangu kale, kabila ulilolikomboa[351] liwe mali yako, kumbuka mlima Siyoni mahali unapokaa.

³Pita juu ya magofu haya ya kudumu! Adui wameharibu kila kitu hekaluni.[352]

⁴Maadui zako wamenguruma ushindi hekaluni mwako! Wameweka humo bendera[353] zao za ushindi!

⁵Wanafanana na mtema kuni, anayekata miti kwa shoka lake.

⁶Waliivunjavunja milango ya hekalu, kwa mashoka na nyundo zao.

⁷Walichoma moto patakatifu pako; walikufuru mahali pale unapoheshimiwa.

⁸Walipania kutuangamiza sote pamoja; walichoma kila mahali tulipokutania kukuabudu nchini.

⁹Hatuzioni tena ishara zetu takatifu, hatuna tena nabii[354] yeyote! Hata hatujui yatakuwa hivi hadi lini!

¹⁰Mpaka lini, ee Mungu, adui atakucheka? Je, watalikufuru jina lako milele?

¹¹Mbona umeuficha mkono wako? Kwa nini hunyoshi mkono wako?

¹²Hata hivyo wewe Mungu ni mfalme wetu tangu kale; umefanya makuu ya wokovu katika nchi.

¹³Kwa enzi yako kuu uliigawa bahari; uliviponda vichwa vya majoka ya bahari.

¹⁴Wewe uliviponda vichwa vya dude Lewiyathani;[355] ukawapa wanyama wa jangwani mzoga wake.

¹⁵Wewe umefanya chemchemi na vijito; na kuikausha mito mikubwa.

¹⁶Mchana ni wako na usiku ni wako; umeweka mwezi na jua mahali pao.

¹⁷Wewe umeweka mipaka yote ya dunia; umepanga majira ya kiangazi na ya baridi.[356]

¹⁸Kumbuka, ee Mwenyezi-Mungu, madharau ya maadui zako; taifa pumbavu linalikashifu jina lako. Sisi ni dhaifu kama njiwa.

¹⁹Usiwatupie wanyama wakali uhai wa wapenzi wako;[357] usiyasahau maisha ya maskini wako.

²⁰Ulikumbuke agano ulilofanya nasi! Nchi imejaa uharamia kila mahali pa giza.

²¹Usiwaache wanaokandamizwa waaibishwe, uwajalie maskini na wahitaji walisifu jina lako.

²²Inuka, ee Mungu, ukajitetee; ukumbuke wanavyokudharau kila siku watu wasiokujua.

²³Usisahau makelele za maadui zako; na ghasia za daima za wapinzani wako.