Read Swahilli Methali 14 Bible Online

Methali 14 - Swahilli bible

Methali 14

¹Mwanamke mwenye hekima[84] huijenga nyumba yake, lakini mpumbavu huibomoa kwa mikono yake mwenyewe.

²Mwenye mwenendo mnyofu humcha Mwenyezi-Mungu, lakini mpotovu humdharau Mungu.

³Mpumbavu hujiadhibu mwenyewe kwa kuropoka kwake, lakini mwenye hekima hulindwa na maneno yake.

⁴Bila ng'ombe wa kulima[85] ghala za mtu ni tupu, mavuno mengi hupatikana kwa nguvu ya ng'ombe wa kulima.

⁵Shahidi mwaminifu hasemi uongo, lakini asiyeaminika hububujika uongo.

⁶Mwenye dharau hutafuta hekima bure, lakini mwenye busara hupata maarifa kwa urahisi.

⁷Ondoka mahali alipo mpumbavu, maana hapo alipo hamna maneno ya hekima.

⁸Hekima ya mwenye busara humwonesha njia yake, lakini upumbavu wa wapumbavu huwadanganya wenyewe.

⁹Wapumbavu huchekelea dhambi, bali wanyofu hupata fadhili kwa Mungu.[86]

¹⁰Moyo waujua uchungu wake wenyewe, wala mgeni hawezi kushiriki furaha yake.

¹¹Nyumba ya mtu mwovu itabomolewa, lakini hema ya wanyofu itaimarishwa.

¹²Njia unayodhani kuwa ni sawa, mwishoni yaweza kukuongoza kwenye kifo.[87]

¹³Huzuni yaweza kufichika katika kicheko; baada ya furaha huja majonzi.

¹⁴Mtu mpotovu atavuna matunda ya mwenendo wake, naye mtu mwema atapata tuzo la matendo yake.[88]

¹⁵Mjinga huamini kila kitu anachoambiwa, lakini mwenye busara huwa na tahadhari.

¹⁶Mwenye hekima ni mwangalifu na huepa uovu, lakini mpumbavu hajizuii wala hana uangalifu.

¹⁷Mwenye kuwaka hasira haraka hutenda kipumbavu, lakini mwenye busara ana uvumilivu.[89]

¹⁸Wajinga hurithi upumbavu, lakini wenye busara hutuzwa taji ya maarifa.

¹⁹Waovu watapiga magoti mbele ya watu wema, watu wabaya mlangoni mwa waadilifu.

²⁰Maskini huchukiwa hata na jirani yake, lakini tajiri ana marafiki wengi.

²¹Anayemdharau jirani yake ni mwenye dhambi, bali ana heri aliye mwema kwa maskini.

²²Anayepanga maovu kweli anakosea! Wanaopanga kutenda mema hufadhiliwa.

²³Bidii katika kila kazi huleta faida, lakini maneno matupu huleta umaskini.[90]

²⁴Mali ni taji ya fahari ya wenye hekima, lakini ujinga ni shada la wapumbavu.

²⁵Shahidi wa kweli huokoa maisha, lakini msema uongo ni msaliti.

²⁶Amchaye Mwenyezi-Mungu ana tumaini imara, na watoto wake watapata kimbilio salama.

²⁷Kumcha Mwenyezi-Mungu ni chemchemi ya uhai;[91] humwezesha mtu kuepa mitego ya kifo.

²⁸Fahari ya mfalme ni wingi wa watu wake, lakini bila watu mtawala huangamia.

²⁹Mtu asiye mwepesi wa hasira ana busara kubwa, lakini akasirikaye upesi hukuza upumbavu.

³⁰Amani rohoni humpa mtu afya, lakini tamaa huozesha mifupa.

³¹Anayemdhulumu maskini anamtukana Muumba wake,[92] lakini amwoneaye huruma mhitaji anamtukuza Mungu.

³²Mwovu huangamizwa kwa matendo yake maovu, lakini mwadilifu hupata usalama kwa unyofu wake.[93]

³³Hekima imo moyoni mwa mtu mwenye busara; haipatikani kamwe mioyoni mwa wapumbavu.[94]

³⁴Uadilifu hukuza taifa, lakini dhambi ni balaa kwa taifa lolote.

³⁵Mfalme humfadhili mtumishi atendaye kwa hekima, lakini hasira yake huwakumba watendao yasiyofaa.