Read Swahilli Methali 16 Bible Online

Methali 16 - Swahilli bible

Methali 16

¹Binadamu hupanga mipango yake, lakini kauli ya mwisho ni yake Mwenyezi-Mungu.

²Matendo ya mtu huonekana kwake kuwa sawa, lakini Mwenyezi-Mungu hupima nia ya mtu.[101]

³Mwekee Mwenyezi-Mungu kazi yako, nayo mipango yako itafanikiwa.

⁴Mwenyezi-Mungu ameumba kila kitu kwa kusudi lake;[102] hata waovu kwa ajili ya siku ya maangamizi.

⁵Kila mwenye kiburi ni chukizo kwa Mwenyezi-Mungu; hakika mtu wa namna hiyo hataacha kuadhibiwa.

⁶Kwa utii na uaminifu mtu huondolewa dhambi,[103] kwa kumcha Mwenyezi-Mungu huepuka uovu.

⁷Mwenyezi-Mungu akipendezwa na mwenendo wa mtu, huwageuza hata adui zake kuwa marafiki.

⁸Afadhali mali kidogo kwa uadilifu, kuliko mapato mengi kwa udhalimu.

⁹Mtu aweza kufanya mipango yake, lakini Mwenyezi-Mungu huongoza hatua zake.

¹⁰Mfalme huamua kwa maongozi ya Mungu; anapotoa hukumu hakosei.[104]

¹¹Mwenyezi-Mungu hutaka kipimo na mizani halali;[105] mawe yote mfukoni ya kupimia ni kazi yake.

¹²Ni chukizo kubwa wafalme kutenda uovu, maana msingi wa mamlaka yao ni haki.

¹³Mfalme hupendelea mtu asemaye kwa unyofu; humpenda mtu asemaye ukweli.

¹⁴Hasira ya mfalme ni kama mjumbe wa kifo; mtu mwenye busara ataituliza.

¹⁵Uso wa mfalme uking'aa kuna uhai; wema wake ni kama wingu la masika.

¹⁶Kupata hekima ni bora kuliko dhahabu; kupata akili ni chaguo bora kuliko fedha.

¹⁷Njia ya wanyofu huepukana na uovu; anayechunga njia yake huhifadhi maisha yake.

¹⁸Kiburi hutangulia maangamizi;[106] majivuno hutangulia maanguko.

¹⁹Afadhali kuwa mnyenyekevu na kuwa maskini, kuliko kugawana nyara na wenye kiburi.

²⁰Anayezingatia mafundisho atafanikiwa; heri mtu yule anayemtumainia Mwenyezi-Mungu.

²¹Mwenye hekima moyoni huitwa mwenye akili; neno la kupendeza huwavutia watu.

²²Hekima ni chemchemi ya uhai[107] kwake aliye nayo, bali upumbavu ni adhabu ya wapumbavu.

²³Moyo wa mwenye hekima humwezesha kusema kwa busara; huyafanya maneno yake yawe ya kuvutia.

²⁴Maneno mazuri ni kama asali; ni matamu rohoni na yenye kuupa mwili afya.

²⁵Mtu aweza kuona njia yake kuwa sawa, lakini mwishowe humwongoza kwenye kifo.

²⁶Hamu ya chakula humhimiza mfanyakazi, maana njaa yake humsukuma aendelee.[108]

²⁷Mtu mwovu hupanga uovu; maneno yake ni kama moto mkali.

²⁸Mtu mpotovu hueneza ugomvi, mfitini hutenganisha marafiki.

²⁹Mtu mkatili humshawishi jirani yake; humwongoza katika njia mbaya.

³⁰Anayekonyeza jicho kwa hila amepanga maovu; anayekaza midomo[109] amekwisha nuia mabaya.

³¹Kuwa na mvi za uzee ni taji la utukufu; hupatikana kwa maisha ya uadilifu.[110]

³²Asiye mwepesi wa hasira ni bora kuliko mwenye nguvu; aitawalaye nafsi yake ni bora kuliko autekaye mji.

³³Kura hupigwa kujua yatakayotukia, lakini uamuzi ni wake Mwenyezi-Mungu.