Read Swahilli Methali 20 Bible Online

Methali 20 - Swahilli bible

Methali 20

¹Divai huleta dhihaka na kileo huleta ugomvi; yeyote anayevutiwa navyo hana hekima.[137]

²Ghadhabu kali ya mfalme[138] ni kama simba angurumaye; anayemkasirisha anayahatarisha maisha yake.

³Ni jambo la heshima kuepa ugomvi; wapumbavu ndio wanaogombana.

⁴Mvivu halimi wakati wa kulima; wakati wa mavuno atatafuta asipate chochote.

⁵Fikira za mtu zimefichika kama kilindi cha maji; lakini mtu mwenye busara ajua kuzichota humo.

⁶Watu wengi hujivunia kuwa wema, lakini mwaminifu wa kweli apatikana wapi?

⁷Mtu mwadilifu akiishi kwa unyofu; watoto wake atakaowaacha watabarikiwa.

⁸Mfalme mwema aketipo kutoa hukumu, huupepeta uovu wote kwa macho yake.

⁹Nani athubutuye kusema: “Nimeutakasa moyo wangu; mimi nimetakasika dhambi yangu?”

¹⁰Mizani ya udanganyifu na vipimo vya udanganyifu, vyote ni chukizo kwa Mwenyezi-Mungu.[139]

¹¹Hata mtoto hujulikana kwa matendo yake, kama tabia yake ni njema na aminifu.

¹²Sikio lisikialo na jicho lionalo, yote mawili kayafanya Mwenyezi-Mungu.

¹³Usipende kulala tu usije ukawa maskini; uwe macho nawe utakuwa na chakula kingi.

¹⁴“Hakifai, hakifai”, mnunuzi hulalamika, lakini akiondoka hujisifu amepunguziwa bei.

¹⁵Kuna dhahabu na wingi wa mawe ya thamani kubwa; lakini cha thamani kubwa zaidi ni maneno ya busara![140]

¹⁶Mtu akiahidi mbele yako kumdhamini mgeni, chukua nguo yake; mfanye awajibike kwa kuwadhamini wageni.

¹⁷Chakula kipatikanacho kwa udanganyifu ni kitamu, lakini baadaye huwa kama mchanga kinywani.

¹⁸Mipango mizuri hufanyika kwa kushauriana; ukitaka kuanza vita lazima kutafakari kwanza.

¹⁹Mpiga domo hafichi siri, kwa hiyo mwepe mtu wa kuropoka.

²⁰Anayemlaani baba yake[141] au mama yake, mwanga wa uhai wake utazimwa kama taa gizani.

²¹Mali iliyopatikana kwa haraka mwanzoni, haitakuwa ya heri mwishoni.

²²Usiseme, “Nitalipiza ubaya niliotendewa.” Mtegemee Mwenyezi-Mungu naye atakusaidia.

²³Mizani ya udanganyifu ni chukizo kwa Mwenyezi-Mungu, na vipimo visivyo halali ni kitu kibaya.

²⁴Hatua za mtu huongozwa na Mwenyezi-Mungu; awezaje binadamu kujua njia ya kwenda?

²⁵Ni hatari kusema kwa mzaha “Usiahidi kumpa Mungu kitu bila kufikiri, la sivyo utaanza kusikitika baada ya nadhiri yako.”

²⁶Mfalme mwenye busara huwapepeta waovu; huwaadhibu bila huruma.

²⁷Dhamiri ya mtu ni taa ya Mwenyezi-Mungu; huchunguza nafsi yake mtu mpaka ndani kabisa.

²⁸Wema na uaminifu humkinga mfalme; utawala wake huimarishwa kwa uadilifu.

²⁹Fahari ya vijana ni nguvu zao, uzuri wa vikongwe ni mvi za uzee.

³⁰Mapigo yanayoumiza ni dawa ya kuondoa uovu; viboko husafisha nafsi mpaka ndani kabisa.