Read Swahilli Methali 22 Bible Online

Methali 22 - Swahilli bible

Methali 22

¹Afadhali kuwa na sifa nzuri kuliko mali nyingi; wema ni bora kuliko fedha au dhahabu.

²Matajiri na maskini wana hali hii moja: Mwenyezi-Mungu ni Muumba wao wote.

³Mtu mwangalifu huona hatari akajificha, lakini wajinga hujitokeza mbele wakaumia.

⁴Ukinyenyekea na kumcha Mwenyezi-Mungu,[149] utapata tuzo: fanaka, heshima na uhai.

⁵Njia ya waovu imejaa miiba na mitego; anayetaka kuhifadhi maisha yake ataiepa.

⁶Mfunze mtoto namna ya kuishi[150] vizuri, naye hatasahau njia hiyo hata uzeeni.

⁷Tajiri humtawala maskini; mkopaji ni mtumwa wa mkopeshaji.[151]

⁸Apandaye dhuluma atavuna janga; uwezo wake wa kutenda mabaya utavunjwa.

⁹Mtu mkarimu atabarikiwa, maana chakula chake humgawia maskini.[152]

¹⁰Mfukuze mwenye dharau na fujo itatoweka, ugomvi na matusi vitakoma.

¹¹Mwenye nia safi na maneno mazuri, atakuwa rafiki wa mfalme.

¹²Mwenyezi-Mungu hulinda elimu ya kweli, lakini huyavuruga maneno ya waovu.

¹³Mvivu[153] husema, “Siwezi kutoka nje; kuna simba huko, ataniua!”

¹⁴Kinywa cha mwasherati ni shimo refu;[154] anayechukiwa na Mwenyezi-Mungu atatumbukia humo.

¹⁵Mtoto hupenda mambo ya kijinga moyoni, lakini fimbo ya nidhamu humwondolea hayo.

¹⁶Anayemdhulumu maskini atamfanya afaidike mwishowe, anayewapa matajiri zawadi ataishia kuwa maskini.[155]

¹⁷[156]Tega sikio usikie maneno ya wenye hekima, elekeza moyo wako uzingatie maarifa yangu.

¹⁸Wewe utafurahi endapo utayaweka moyoni, na kuyakariri kila wakati.

¹⁹Ninayependa kumfundisha leo ni wewe, ili tegemeo lako liwe kwa Mwenyezi-Mungu.[157]

²⁰Nimekuandikia misemo thelathini, misemo ya maonyo na maarifa,

²¹ili kukufundisha yaliyo sawa na kweli; na mtu akikuuliza uweze kumpa jibu sahihi.

²²Usimdhulumu maskini kwa kuwa ni maskini, wala usimnyime fukara haki yake mahakamani.

²³Maana Mwenyezi-Mungu atawatetea;[158] atawapokonya maisha yao wale watakaowadhulumu.

²⁴Usifanye urafiki na mtu wa hasira, wala usiandamane na mwenye ghadhabu,

²⁵usije ukajifunza mwenendo wake, ukajinasa kabisa katika mtego.

²⁶Usiwe mmoja wao wenye kuweka ahadi, watu ambao hujiweka wadhamini wa madeni.

²⁷Ikiwa huna chochote cha kulipa, hata kitanda unacholalia kitachukuliwa!

²⁸Usiondoe alama ya mipaka ya zamani ambayo iliwekwa na wazee wako.

²⁹Je, yuko mtu mwenye maarifa kazini mwake? Huyo atawatumikia wafalme; hatawapa huduma yake watu wasiofaa.