Read Swahilli Methali 25 Bible Online

Methali 25 - Swahilli bible

Methali 25

¹[171] Hizi nazo ni methali nyingine za mfalme Solomoni walizonakili watu wa Hezekia, mfalme wa Yuda.

²Mungu hutukuzwa kwa kuficha mambo,[172] lakini mfalme hutukuzwa kwa yale anayoeleza.

³Kama zilivyo mbali mbingu na kirefu kina cha ardhi ndivyo zisivyochunguzika akili za mfalme.

⁴Toa takataka katika fedha, na mhunzi atakutengenezea chombo kizuri.

⁵Waondoe waovu[173] mbele ya mfalme, na utawala wake utaimarika katika haki.

⁶Usijipendekeze kwa mfalme, wala usijifanye mtu mkubwa,

⁷maana ni heri kuambiwa, “Njoo huku mbele”,[174] kuliko kuporomoshwa mbele ya mkuu. Mambo uliyoyaona kwa macho yako,

⁸usiharakishe kuyapeleka mahakamani; maana utafanya nini hapo baadaye, shahidi mwingine akibatilisha hayo usemayo?

⁹Suluhisha ugomvi na mwenzako peke yake, na kila mmoja wenu asitoe siri ya mwenzake;

¹⁰watu wasije wakajua kuna siri, ukajiharibia jina lako daima.

¹¹Neno lisemwalo wakati unaofaa, ni kama nakshi za dhahabu juu ya madini ya fedha.

¹²Onyo la mwenye hekima kwa mtu msikivu, ni bora kuliko pete au vito vya dhahabu safi.

¹³Mjumbe mwaminifu humfurahisha yule aliyemtuma, kama maji baridi wakati wa joto la mavuno.

¹⁴Kama vile mawingu na upepo bila mvua, ndivyo alivyo mtu anayejigamba kutoa zawadi asiitoe.

¹⁵Kwa uvumilivu mtawala huweza kushawishika; ulimi laini huvunja mifupa.

¹⁶Upatapo asali kula kiasi cha kukutosha, usije ukaikinai na kuitapika.[175]

¹⁷Usimtembelee jirani yako mara kwa mara, usije ukamchosha naye akakuchukia.

¹⁸Mtu atoaye ushahidi wa uongo dhidi ya mwenziwe, ni hatari kama rungu, upanga au mshale mkali.

¹⁹Kumtegemea mtu asiyeaminika wakati wa taabu, ni kama jino bovu au mguu ulioteguka.

²⁰Kumwimbia mtu mwenye huzuni, ni kama kuvua nguo wakati wa baridi, au kutia siki katika kidonda.

²¹Adui yako akiwa na njaa, mpe chakula; akiwa na kiu, mpe maji ya kunywa.

²²Hivyo utafanya apate aibu kali, kama makaa ya moto kichwani pake, naye Mwenyezi-Mungu atakutuza.[176]

²³Upepo wa kusi huleta mvua, hali kadhalika masengenyo huleta chuki.

²⁴Afadhali kuishi pembeni juu ya paa, kuliko kuishi nyumbani pamoja na mwanamke mgomvi.

²⁵Kama vile maji baridi kwa mwenye kiu, ndivyo habari njema kutoka mbali.

²⁶Mwadilifu akubaliye kufuata mambo ya mwovu, ni chemchemi iliyochafuliwa au kisima kilichotibuliwa.

²⁷Si vizuri kula asali nyingi mno; kadhalika haifai kujipendekeza mno.[177]

²⁸Mtu asiyeweza kuzuia hasira yake, ni kama mji usio na ulinzi unaposhambuliwa.