Read Swahilli Methali 27 Bible Online

Methali 27 - Swahilli bible

Methali 27

¹Usijisifie ya kesho,[186] hujui nini kitatokea leo mpaka kesho.

²Acha watu wengine wakusifu,[187] kuliko mdomo wako wewe mwenyewe.

³Jiwe ni zito na mchanga kadhalika, lakini usumbufu wa mpumbavu ni mzito zaidi.

⁴Ghadhabu ni katili na hasira huangamiza; lakini ni nani awezaye kuukabili wivu?

⁵Afadhali mtu anayekuonya waziwazi, kuliko yule afichaye upendo.

⁶Makaripio ya rafiki yaonesha uaminifu, lakini busu la adui ni udanganyifu.

⁷Aliyeshiba hata asali huikataa, lakini kwa mwenye njaa kila kichungu ni kitamu.

⁸Mtu aliyepotea mbali na kwake, ni kama ndege aliyepotea mbali na kiota chake.

⁹Mafuta na manukato huufurahisha moyo, lakini taabu hurarua roho.[188]

¹⁰Usisahau rafiki zako wala wa baba yako.[189] Ukipatwa na janga usikimbilie kwa nduguyo; afadhali jirani aliye karibu kuliko ndugu aliye mbali.

¹¹Uwe na hekima mwanangu upate kunifurahisha moyo, nami sitakosa la kumjibu yeyote anayenilaumu.[190]

¹²Mwenye busara huona hatari akajificha, lakini mjinga hujitokeza mbele akaumia.

¹³Mtu akiahidi mbele yako kumdhamini mgeni, chukua nguo yake; mfanye awajibike kwa kuwadhamini wageni.

¹⁴Amwamkiaye jirani kwa kelele alfajiri, itaeleweka kwamba amemtakia laana.

¹⁵Mke mgomvi daima, ni sawa na tonatona ya maji siku ya mvua.

¹⁶Kumzuia ni sawa na kuzuia upepo, au kukamata mafuta kwa mkono.[191]

¹⁷Chuma hunoa chuma, kadhalika mtu hufundishwa na wenzake.

¹⁸Anayeutunza mtini hula tini, anayemhudumia bwana wake ataheshimiwa.

¹⁹Kama uso ujionavyo wenyewe majini, ndivyo ujijuavyo mwenyewe moyoni.

²⁰Kuzimu na Uharibifu kamwe havishibi, kadhalika na macho ya watu hayashibi.[192]

²¹Ubora wa fedha au dhahabu hupimwa kwa moto,[193] na mtu hupimwa kutokana na sifa zake.

²²Mtwange mpumbavu katika kinu pamoja na nafaka, lakini hutafaulu kumtenganisha na upumbavu wake.

²³Angalia vizuri hali ya mifugo yako; tunza vizuri wanyama wako.

²⁴Maana utajiri haudumu milele, wala taji haidumu vizazi vyote.

²⁵Baada ya kukata nyasi na kuzihifadhi, kata majani toka milimani, huku nyasi zinachipua upya.

²⁶Kondoo watakupatia sufu kwa mavazi, mbuzi nao utauza na kujinunulia mashamba;

²⁷watakupa maziwa ya kukutosha wewe na jamaa yako, na kwa ajili ya watumishi wako wa kike.