Read Swahilli Hekima ya Solomoni 11 Bible Online

Hekima ya Solomoni 11 - Swahilli bible

Hekima ya Solomoni 11

¹Hekima aliwafanikisha hao watu wakiongozwa na yule nabii mtakatifu.

²Walisafiri jangwani pasipokaliwa na watu, wakapiga hema zao mahali ambapo hakuna aliyepitia kabla.

³Waliwakabili maadui zao na kuwashinda wapinzani wao.

⁴Walipoona kiu walikulilia, nawe ukawapa maji kutoka kwenye mwamba mgumu, wakakata kiu yao.

⁵Pigo ulilowapa maadui zao liliwasalimisha watu wako taabuni.

⁶Badala ya maji ya mto unaotiririka daima, mto uliofurika na kutiwa unajisi kwa damu

⁷kama adhabu kwao walioamuru watoto wachanga wauawe wewe uliwapatia watu wako maji mengi ghafla,

⁸ukaonesha kwa kiu yao wakati ule, jinsi ulivyowaadhibu maadui zao.

⁹Walipojaribiwa, ingawa walikuwa wanapewa nidhamu kwa huruma, walijifunza jinsi waovu walivyoteswa wakati ulipowahukumu kwa hasira.

¹⁰Uliwaonya kama vile baba aonyavyo watoto wake. Lakini uliwachunguza hao waovu kama mfalme mkali anapohukumu.

¹¹Wakiwa mbali au wakiwa karibu wote waliteseka,

¹²Walipata majonzi maradufu kwa kukumbuka yaliyotukia.

¹³Waliposikia kwamba adhabu yao iliwafaidia watu wako, walikiri kwamba wewe, ee Bwana, ndiwe uliyeyatenda hayo.

¹⁴Ingawa walikuwa wamemdharau yule ambaye hapo awali alikuwa ametupwa na kuachwa, baada ya matukio hayo yote walimstaajabia, waliposikia kiu kali kuliko ya watu waadilifu.

¹⁵Kwa sababu ya upumbavu na mawazo yao maovu ambayo yaliwapotosha wakaabudu nyoka na wanyama duni, wewe uliwaleta viumbe wasio na akili wawaadhibu,

¹⁶wajifunze kwamba mtu huadhibiwa kwa vitu vilevile alivyotenda navyo dhambi.

¹⁷Kwa mkono wako wenye nguvu zote ambao uliumba ulimwengu bila kutumia chochote chenye umbo, umekuwa daima wenye uwezo na ungaliweza kwa urahisi kuwaletea dubu wengi au simba wakali,

¹⁸au wanyama wakali sana ambao hawajapata kuwako, au wanyama watoao pumzi ya moto au wanaopumua moshi mzito wenye kudhuru, au watoao machoni mwao cheche za kutisha.

¹⁹Sio tu kwamba mashambulio ya hao wanyama yangeua watu ila kule tu kuwaona watu wangekufa kwa kutishwa.

²⁰Licha ya hao, ungaliweza kuwaangamiza kwa pumzi moja tu wakifuatiwa na haki yako, au kuwatawanya kila mahali kwa mvumo wa uwezo wako. Lakini wewe umepanga kufanya kila kitu kwa kipimo, taratibu na uzito.

²¹Kuwa na uwezo mkuu ni hadhi yako daima, na hakuna mtu awezaye kuikabili nguvu ya mkono wako.

²²Kwako, ulimwengu wote ni kama chembe moja katika mizani; ni kama tone moja la umande wa asubuhi juu ya ardhi.

²³Lakini wewe ni mwenye huruma kwa wote maana waweza yote; waacha kuzijali dhambi zetu ili tupate kutubu.

²⁴Wewe wapenda vitu vyote vilivyopo, wala huchukii chochote ulichokiumba. Hungaliumba chochote kile kama ungekuwa unakichukia.

²⁵Chawezaje chochote kudumu ila kwa kupenda kwako? Chawezaje kuendelea kuwako kama hungalikiumba?

²⁶Umeruhusu vitu vyote viwepo ee Bwana, kwa maana ni vyako, nawe wapenda vitu vyote hai.