Read Swahilli Hekima ya Solomoni 15 Bible Online

Hekima ya Solomoni 15 - Swahilli bible

Hekima ya Solomoni 15

¹Lakini wewe, Mungu wetu, ni mwenye wema na kweli, wewe ni mvumilivu na watawala vyote kwa huruma.

²Hata tukitenda dhambi twajua nguvu yako, nasi tu watu wako. Lakini hatutatenda dhambi kwa kuwa tunajua kwamba sisi ni wako.

³Maana kukujua wewe ni uadilifu kamili, kutambua nguvu yako ni chanzo cha kuishi milele.

⁴Sisi hatukupotoshwa kwa kazi mbaya za ufundi wa binadamu, au kwa kitu duni kilichotiwa nakshi na msanii, kinyago kilichopakwa rangi mbalimbali,

⁵ambacho umbo lake huamsha tamaa za watu wajinga na kuwafanya watamani sanamu isiyo na uhai wowote.

⁶Wanaotengeneza vitu kama hivyo, na wanaotamani kuviabudu, wote wang'ang'ania uovu.

⁷Mfinyanzi huukanda udongo laini akafinyanga kila chombo kwa uangalifu kwa matumizi yetu. Hutumia udongo huo huo kufinyangia vyombo: vingine kwa matumizi safi na vingine kwa matumizi yasiyo safi. Vyombo vyote hivyo huviunda namna moja. Lakini ni vyombo vipi kwa matumizi yapi, mfinyanzi mwenyewe huamua.

⁸Tena kwa kazi bure mfinyanzi huunda mungu duni kwa udongo ule ule, hali yake mwenyewe ni kiumbe kifacho kilichoundwa hivi, punde tu na wakati ufikapo wa kurudisha roho yake aliyokopeshwa, atarudi udongoni ambamo alitolewa.

⁹Lakini yeye hajali kwamba kifo kinamkabili, wala kwamba maisha yake ni mafupi; ila hushindana na mafundi wa vyombo vya dhahabu na fedha na kuiga mafundi watumiao shaba, na kuona fahari kwa kufinyanga miungu ya kuiga.

¹⁰Moyo wake ni majivu na tumaini lake ni hafifu kuliko vumbi. Uhai wake hauna thamani kama udongo,

¹¹kwa sababu hajapata kamwe kumtambua Mungu aliyemwumba, Mungu aliyemjalia roho mwenye nguvu ya kutenda, alimpulizia pumzi ya uhai.

¹²Mtu huyo hufikiria maisha yetu kuwa mchezo tu, na uhai wetu kuwa tamasha la kujipatia faida. Husema ni lazima kupata fedha kwa vyovyote vile hata kama ni kwa njia isiyofaa.

¹³Mtu huyo ambaye kwa udongo ule ule hufinyanga sanamu za miungu na vyombo vivunjikavyo, ajua kuliko wengine wote kwamba anatenda dhambi.

¹⁴Lakini wapumbavu kuliko wote na wanaosumbuka kuliko watoto wachanga, walikuwa wale maadui ambao waliwatesa watu wako.

¹⁵Wao walidhani sanamu za watu wasiomjua Mungu ni miungu, ingawaje hazina macho ya kuona wala pua za kuvuta pumzi, wala masikio ya kusikia, wala vidole vya kupapasa, na miguu yao haifai kitu kwa kutembea.

¹⁶Binadamu ndiye aliyezitengeneza, mtu ambaye roho yake amekopeshwa ndiye aliyezifanya. Hakuna mtu awezaye kutengeneza mungu aliye bora kuliko binadamu.

¹⁷Mtu hufa, lakini hutengeneza kitu ambacho chenyewe kimekufa fofofo. Yeye binafsi ni bora kuliko hicho kitu anachokiabudu. Naam, yeye ana uhai, lakini hicho kitu anachokiabudu hakina uhai kabisa.

¹⁸Watu hao huabudu hata wanyama wa kuchukiza kabisa ambao hata kwa akili ni duni kuliko viumbe vingine vyote.

¹⁹Hata ukivilinganisha na viumbe vingine, hivi havitamaniki kabisa. Vyenyewe havikuwahi kupata sifa na baraka ya Mungu.