Read Swahilli Sira 41 Bible Online

Sira 41 - Swahilli bible

Sira 41

¹Ewe kifo! Kukukumbuka ni uchungu mkubwa, kwa mtu anayeishi kwa amani na mali zake; kwa mtu asiye na wasiwasi, anayefanikiwa kila kitu, na aliye bado na nguvu za kufurahia chakula chake.

²Ewe kifo! Hukumu yako ni jambo jema sana kwa fukara na ambaye nguvu zake zinamwishia, kwa mtu mzee sana mwenye wasiwasi juu ya kila kitu, mtu mwenye uchungu na ambaye ameishiwa na uvumilivu.

³Usiogope maamuzi ya kifo; kumbuka waliokutangulia na watakaokufuata.

⁴Hiyo ni kauli ya Bwana kwa viumbe vyote. Kwa nini basi kupinga alichopenda kuamua Mungu Mkuu? Kuishi miaka kumi au mia au elfu, hiyo si hoja huko ahera.

⁵Watoto wa wenye dhambi ni chukizo; hurandaranda katika makao ya wasiomcha Mungu.

⁶Urithi wa watoto wa wenye dhambi utapotea, na wazawa wao wataishi katika aibu daima.

⁷Watoto watamlaani baba asiyemcha Mungu, kwa sababu ya aibu aliyowaletea wanawe.

⁸Ole wenu, nyinyi msiomcha Mungu, nyinyi ambao mmeiacha sheria ya Mungu Mkuu!

⁹Mkifanikiwa, mapato yenu yatatoweka; mkijikwaa, hamtaweza kuinuka tena; na mtakapokufa, laana ndiyo mtakayopata.

¹⁰Chochote kilichotoka mavumbini hurudi mavumbini, wabaya huanza na laana na kuishia maangamizini.

¹¹Watu huomboleza juu ya miili ya marehemu, lakini jina baya la wenye dhambi litafutiliwa mbali.

¹²Ulipe hadhi jina lako kwani litakubakia, litadumu kuliko hazina elfu moja za dhahabu.

¹³Wakati wa furaha ni wa muda tu, lakini jina zuri hudumu milele.

¹⁴Wanangu, zingatieni mafundisho yangu mkae na amani. Hekima iliyofichika na hazina isiyoonekana, je hivyo vina faida gani?

¹⁵Afadhali mtu anayeficha ujinga wake, kuliko yule anayeficha hekima yake.

¹⁶Kwa hiyo uyaheshimu maneno yangu; maana si vizuri kuona haya juu ya kila kitu na si kila hali inakubaliwa kuwa sawa na wote.[137]

¹⁷Uone haya juu ya kufanya machafu mbele ya wazazi, juu ya kusema uongo mbele ya mkuu au mtawala,

¹⁸juu ya kukosa mbele ya hakimu au mwamuzi, juu ya kufanya uovu mbele ya jumuiya,

¹⁹juu ya kumdanganya mwenzako wa kazi au rafiki, juu ya wizi mahali unapoishi.

²⁰Uone haya juu ya kukosa uaminifu mbele ya Mungu na agano lake, juu ya utovu wa adabu wakati wa kula,

²¹juu ya kuwa mchoyo unapoombwa kitu, juu ya kukaa kimya unaposalimiwa,

²²juu ya kumwangalia mwanamke malaya, juu ya kukataa kumsaidia mtu wa jamaa,

²³juu ya kumnyang'anya mtu mali yake, juu ya kumkodolea macho mke wa mwenzako,

²⁴na juu ya kumshawishi mtumishi wake wa kike; tena usiende karibu na kitanda chake.

²⁵Uone haya kutumia lugha chafu mbele ya rafiki, na wala usimkaripie mtu unayempa zawadi.

²⁶Uone haya juu ya kurudia na kusema fununu, na kutoa siri za watu.

²⁷Hiyo ndiyo kuwa na haya halali, ambayo kila mtu anapenda.