Read Swahilli Sira 42 Bible Online

Sira 42 - Swahilli bible

Sira 42

¹Haya ndiyo mambo ambayo hutaona haya kutenda, wala usitende dhambi kwa kuogopa watu watasema nini:

²Usione haya kufuata sheria ya Mungu Mkuu na agano lake, usione haya kutoa uamuzi wa haki kuwahukumu wenye hatia.

³Usione haya kuwajibika na mwenzako wa kazi na msafiri, na kugawana urithi na rafiki.

⁴Usione haya kutumia mizani na vipimo halali,

⁵kujipatia faida kwa wafanyabiashara, kuwafunza watoto nidhamu ya hali ya juu, kumchapa vikali mtumishi mwovu.

⁶Kama mkeo haaminiki, mfiche mambo yako, na penye watu wengi fungia vitu vyako ndani.

⁷Chochote unachotoa, ujue idadi na kipimo chake, weka katika maandishi mapato na matumizi.

⁸Usione haya kumfunza mjinga na mpumbavu au mzee agombanaye na vijana. Hivyo utakuwa kweli umeelimishwa, nawe utapata kibali mbele ya watu wote.

⁹Baba mwenye binti hukesha kwa siri kwa ajili yake; wasiwasi wa baba juu ya binti humzuia kulala.

¹⁰Akiwa bado msichana baba yake anaogopa ataharibiwa, au atapata mimba akiwa bado nyumbani kwake; au akiwa ameolewa baba yake anaogopa kwamba anaweza kuwa tasa.

¹¹Mchunge sana binti aliye mtundu, la sivyo atakufanya uchekwe na maadui zako, ukawa kioja mjini na mwenye jina baya kwa watu, ukaaibishwa naye mbele ya umati wa watu.

¹²Usikodolee macho uzuri wa mtu yeyote, wala kukaa kuzungumza na wanawake.

¹³Maana nondo hutoka katika mavazi, na ubaya wa mwanamke hutoka kwa mwanamke.

¹⁴Afadhali uovu wa mwanamume kuliko wema wa mwanamke; mwanamke ndiye asababishaye aibu na fedheha.

¹⁵[138]Sasa, nitawakumbusha kazi za Bwana, na kutangaza yale niliyoyaona: Kazi za Bwana hufanyika kwa neno lake.[139]

¹⁶Jua hutazama kila kitu chini kwa miali yake, kazi ya Bwana imejaa utukufu wake.

¹⁷Hakuna hata mmoja wa malaika wake Bwana awezaye kutaja matendo yake yote ya ajabu ambayo Bwana Mwenyezi-Mungu ameyaimarisha. ili ulimwengu uwe imara katika utukufu wake.

¹⁸Yeye huchunguza vilindi na mioyo ya watu, na kuiona mipango yao ya hila. Maana Mungu Mkuu anajua elimu yote ile, na anazijua ishara za nyakati.

¹⁹Yeye hutangaza yaliyotukia na yajayo, na kufunua chochote kilichofichika.

²⁰Hakuna wazo linaloweza kumponyoka, hakuna hata neno moja liwezalo kujificha mbali naye.

²¹Yeye amepanga fahari za hekima yake. Yeye ndiye peke yake aliye tangu milele hata milele. Hawezi kuongezewa kitu au kupokonywa kitu; wala hahitaji mtu yeyote kuwa mshauri wake.[140]

²²Jinsi gani zipendezavyo kazi zake! Jinsi gani zing'aavyo kuziona!

²³Vitu hivyo vyote vipo na vyadumu milele, na kila vinapohitajiwa humtii kila mara.

²⁴Viumbe vyote vimepangwa viwiliviwili kila kimoja kikiwa kinyume cha kingine; na hakuna alichofanya kisicho kamili.

²⁵Kitu kimoja huukamilisha uzuri wa kingine. Nani anaweza kuchoka kuangalia utukufu wake?