Read Swahilli Maombolezo 3 Bible Online

Maombolezo 3 - Swahilli bible

Maombolezo 3

¹[21] Mimi ni mtu niliyepata mateso kwa fimbo ya ghadhabu yake Mungu.

²Amenichukua akanipeleka mpaka gizani kusiko na mwanga.

³Amenyosha mkono wake dhidi yangu mimi tu, akanichapa tena na tena mchana kutwa.

⁴Amenichakaza ngozi na nyama, mifupa yangu ameivunja.

⁵Amenizingira na kunizungushia uchungu na mateso.

⁶Amenikalisha gizani kama watu waliokufa zamani.

⁷Amenizungushia ukuta nisitoroke, amenifunga kwa minyororo mizito.[22]

⁸Ingawa naita na kulilia msaada anaizuia sala yangu isimfikie.

⁹Njia zangu ameziziba kwa mawe makubwa amevipotosha vichochoro vyangu.

¹⁰Yeye ni kama dubu anayenivizia; ni kama simba[23] aliyejificha.

¹¹Alinifukuza njiani mwangu, akanilemaza na kuniacha mkiwa.

¹²Aliuvuta upinde wake, akanilenga mshale wake.

¹³Alinichoma moyoni kwa mishale, kutoka katika podo lake.

¹⁴Nimekuwa kitu cha dhihaka kwa watu wote, mchana kutwa nimekuwa mtu wa kuzomewa.

¹⁵Amenijaza taabu, akanishibisha uchungu.[24]

¹⁶Amenisagisha meno katika mawe, akanifanya nigaegae majivuni.

¹⁷Moyo wangu haujui tena amani, kwangu furaha ni kitu kigeni.

¹⁸Nimewaza “Nimekata tamaa kabisa, tumaini langu kwa Mwenyezi-Mungu limetoweka.”

¹⁹Kukumbuka taabu na kutangatanga kwangu kwanipa uchungu kama wa nyongo.

²⁰Nayafikiria hayo daima, nayo roho yangu imejaa majonzi.

²¹Lakini nakumbuka jambo hili moja, nami ninalo tumaini:[25]

²²Kwamba fadhili za Mwenyezi-Mungu hazikomi, huruma zake hazina mwisho.[26]

²³Kila kunapokucha ni mpya kabisa, uaminifu wake ni mkuu mno.

²⁴Mwenyezi-Mungu ndiye hazina yangu[27] hivyo nitamwekea tumaini langu.

²⁵Mwenyezi-Mungu ni mwema kwa wanaomtegemea, ni mwema kwa wote wanaomtafuta.

²⁶Ni vema mtu kungojea kwa saburi ukombozi utokao kwa Mwenyezi-Mungu.

²⁷Ni vema mtu kujifunza uvumilivu tangu wakati wa ujana wake.[28]

²⁸Heri kukaa peke na kimya, mazito yanapompata kutoka kwa Mungu.

²⁹Yampasa kuinama na kujinyenyekesha, huenda ikawa tumaini bado lipo.

³⁰Yampasa kumgeuzia shavu mwenye kumpiga, na kuwa tayari kupokea matusi yake.

³¹Mwenyezi-Mungu hatatutupa milele.

³²Ingawa atufanya tuhuzunike, atakuwa na huruma tena kadiri ya wingi wa fadhili zake.

³³Yeye hapendelei kuwatesa wala kuwahuzunisha wanadamu.

³⁴Wafungwa wote nchini wanapodhulumiwa na kupondwa;

³⁵haki za binadamu zinapopotoshwa mbele yake Mungu Mkuu,

³⁶kesi ya mtu inapopotoshwa mahakamani, je, Mwenyezi-Mungu haoni hayo?

³⁷Nani awezaye kuamuru kitu kifanyike Mwenyezi-Mungu asipopanga iwe hivyo?

³⁸Maafa na mema hutokea tu kwa amri yake Mungu Mkuu.[29]

³⁹Kwa nini mtu anung'unike, ikiwa ameadhibiwa kwa dhambi zake?

⁴⁰Na tupime na kuchunguza mwenendo wetu, tupate kumrudia Mwenyezi-Mungu.[30]

⁴¹Tumfungulie Mungu huko mbinguni mioyo yetu na kumwomba:

⁴²“Sisi tulikukosea na kukuasi nawe bado hujatusamehe.

⁴³“Umejizungushia hasira yako ukatufuatia, ukatuua bila huruma.

⁴⁴Umejizungushia wingu zito, sala yeyote isiweze kupenya humo.

⁴⁵Umetufanya kuwa takataka na uchafu miongoni mwa watu wa mataifa.

⁴⁶“Maadui zetu wote wanatuzomea.

⁴⁷Kitisho na hofu vimetuandama, tumepatwa na maafa na maangamizi.

⁴⁸Macho yangu yabubujika mito ya machozi kwa sababu ya kuangamizwa kwa watu wangu.

⁴⁹“Machozi yatanitoka bila kikomo,

⁵⁰mpaka Mwenyezi-Mungu kutoka huko mbinguni aangalie chini na kuona.

⁵¹Nalia na kujaa majonzi, kuona yaliyowapata kina mama wa mji wangu.

⁵²“Nimewindwa kama ndege[31] na hao wanichukiao bila sababu.

⁵³Walinitupa shimoni nikiwa hai na juu yangu wakarundika mawe.

⁵⁴Maji yalianza kunifunika kichwa, nami nikafikiri, ‘Huu ni mwisho wangu.’

⁵⁵“Kutoka chini shimoni nilikulilia ee Mwenyezi-Mungu.

⁵⁶Wewe umenisikia nikikulilia: ‘Usiache kusikia kilio changu cha msaada bali unipatie nafuu.’

⁵⁷Nilipokuita ulinijia karibu ukaniambia, ‘Usiogope!’[32]

⁵⁸“Umenitetea katika kisa changu ee Mwenyezi-Mungu, umeyakomboa maisha yangu.

⁵⁹Umeuona uovu niliotendewa ee Mwenyezi-Mungu, uniamulie kwa wema kisa changu.

⁶⁰Umeuona uovu wa maadui zangu, na mipango yao yote ya hila dhidi yangu.

⁶¹“Umesikia matukano yao ee Mwenyezi-Mungu, na mipango yao yote ya hila dhidi yangu.

⁶²Maneno na mawazo ya maadui zangu siku nzima ni juu ya kuniangamiza mimi.

⁶³Wakati wote, wamekaa au wanakwenda, mimi ndiye wanayemzomea.

⁶⁴Uwalipize, ee Mwenyezi-Mungu kadiri ya hayo matendo[33] yao, kadiri ya mambo waliyotenda wenyewe.

⁶⁵Uipumbaze mioyo yao, na laana yako iwashukie.

⁶⁶Uwafuatie kwa hasira, uwaangamize, uwafanye watoweke ulimwenguni.”