Read Swahilli Maombolezo 5 Bible Online

Maombolezo 5 - Swahilli bible

Maombolezo 5

¹[45] Ukumbuke ee Mwenyezi-Mungu, mambo yaliyotupata! Utuangalie, uone jinsi tulivyoaibishwa!

²Nchi yetu[46] imekabidhiwa wageni, nyumba zetu watu wengine.

³Tumekuwa yatima, bila baba, mama zetu wameachwa kama wajane.

⁴Maji yetu tunayapata kwa fedha, kuni zetu kwa kuzinunua.[47]

⁵Tunalazimishwa kufanya kazi kama punda, tumechoka lakini haturuhusiwi kupumzika.

⁶Wamisri na Waashuru tumewanyoshea mikono,[48] ili tupate chakula cha kutosha.

⁷Wazee wetu walitenda dhambi na hawapo tena; nasi tunateseka kwa sababu ya makosa yao.[49]

⁸Watumwa ndio wanaotutawala, wala hakuna wa kutuokoa mikononi mwao.

⁹Chakula chetu twapata kwa kuhatarisha maisha yetu, maana wauaji wanazurura huko mashambani.

¹⁰Ngozi zetu zawaka moto kama tanuri kwa sababu ya njaa inayotuchoma.

¹¹Wanawake wetu wanashikwa kwa nguvu mjini Siyoni, binti zetu katika vijiji vya Yuda.

¹²Wakuu wetu wametungikwa kwa mikono yao; wazee wetu hawapewi heshima yoyote.

¹³Vijana wanalazimishwa kusaga nafaka kwa mawe, wavulana wanayumbayumba kwa mizigo ya kuni.

¹⁴Wazee wameacha kutoa mashauri yao, vijana wameacha kuimba.

¹⁵Furaha ya mioyo yetu imetoweka, ngoma zetu zimegeuzwa kuwa ombolezo.

¹⁶Fahari tuliyojivunia imetokomea. Ole wetu kwa kuwa tumetenda dhambi!

¹⁷Kwa ajili hiyo tumeugua moyoni, kwa mambo hayo macho yetu yamefifia.

¹⁸Maana mlima Siyoni umeachwa tupu, mbweha wanazurura humo.

¹⁹Lakini wewe Mwenyezi-Mungu watawala milele, utawala wako wadumu vizazi vyote.

²⁰Mbona umetuacha muda mrefu hivyo? Mbona umetutupa siku nyingi hivyo?

²¹Uturekebishe ee Mwenyezi-Mungu, nasi tukurudie, uturudishie fahari yetu kama zamani.

²²Au, je, umetukataa kabisa?[50] Je, umetukasirikia mno?