Read Swahilli Amosi 1 Bible Online

Amosi 1 - Swahilli bible

Amosi 1

¹Maneno ya Amosi, mmojawapo wa wachungaji wa mji wa Tekoa.[1] Mungu alimfunulia Amosi mambo haya yote kuhusu Israeli miaka miwili kabla ya lile tetemeko la ardhi,[2] wakati Uzia alipokuwa mfalme wa Yuda, na Yeroboamu mwana wa Yoashi, alipokuwa mfalme wa Israeli.[3]

²Amosi alisema hivi: Mwenyezi-Mungu ananguruma kutoka mlima Siyoni, anavumisha sauti yake kutoka Yerusalemu, hata malisho ya wachungaji yanakauka, nyasi mlimani Karmeli zinanyauka.[4]

³[5]Mwenyezi-Mungu asema hivi: “Watu wa Damasko wametenda dhambi tena na tena;[6] kwa hiyo, sitaacha kuwaadhibu; waliwatendea watu wa Gileadi ukatili mbaya.[7]

⁴Basi, nitaishushia moto[8] ikulu ya mfalme Hazaeli, nao utaziteketeza kabisa ngome za mfalme Ben-hadadi.[9]

⁵Nitayavunjavunja malango ya mji wa Damasko, na kuwang'oa wakazi wa bonde la Aweni,[10] pamoja na mtawala wa Beth-edeni.[11] Watu wa Aramu watapelekwa uhamishoni Kiri. Mimi Mwenyezi-Mungu nimesema.”

⁶Mwenyezi-Mungu asema hivi: “Watu wa Gaza wametenda dhambi tena na tena, kwa hiyo sitaacha kuwaadhibu. Walichukua mateka watu kabila zima, wakawauza wawe watumwa kwa Waedomu.[12]

⁷Basi, nitazishushia moto kuta za mji wa Gaza, nao utaziteketeza kabisa ngome zake.

⁸Nitawang'oa wakazi wa mji wa Ashdodi, pamoja na mtawala wa Ashkeloni. Nitanyosha mkono dhidi ya Ekroni,[13] nao Wafilisti wote waliosalia wataangamia. Mimi Mwenyezi-Mungu nimesema.”

⁹Mwenyezi-Mungu asema hivi: “Watu wa Tiro wametenda dhambi tena na tena, kwa hiyo sitaacha kuwaadhibu. Walichukua mateka kabila zima hadi Edomu, wakaukiuka mkataba wa urafiki waliokuwa wamefanya.

¹⁰Basi, nitazishushia moto kuta za mji wa Tiro, na kuziteketeza kabisa ngome zake.”

¹¹Mwenyezi-Mungu asema hivi: “Watu wa Edomu wametenda dhambi tena na tena, kwa hiyo sitaacha kuwaadhibu. Waliwawinda ndugu zao[14] Waisraeli kwa mapanga, wakaitupilia mbali huruma yao yote ya kindugu. Hasira yao haikuwa na kikomo, waliiacha iwake daima.

¹²Basi, nitaushushia moto mji wa Temani, na kuziteketeza kabisa ngome za Bosra.”[15]

¹³[16]Mwenyezi-Mungu asema hivi: “Watu wa Amoni wametenda dhambi tena na tena, kwa hiyo sitaacha kuwaadhibu. Katika vita vyao vya kupora nchi zaidi, waliwatumbua wanawake waja wazito[17] nchini Gileadi.

¹⁴Basi, nitazishushia moto kuta za mji wa Raba,[18] na kuziteketeza kabisa ngome zake. Siku hiyo ya vita patakuwa na makelele mengi, nayo mapambano yatakuwa makali kama tufani.

¹⁵Mfalme wao na maofisa wake, wote watakwenda kukaa uhamishoni. Mimi Mwenyezi-Mungu nimesema.”