Read Swahilli 1 Wamakabayo 10 Bible Online

1 Wamakabayo 10 - Swahilli bible

1 Wamakabayo 10

¹Mwaka 160,[100] Aleksanda Epifane,[101] mwana wa Antioko wa Nne, aliwasili Tolemai na kuuteka mji huo. Watu wakamkaribisha, naye akawa mfalme wao.

²Mfalme Demetrio alipopata habari hizo, alikusanya jeshi kubwa, akaondoka kwenda kupambana na Aleksanda Epifane.

³Wakati huo Demetrio alimpelekea Yonathani barua ya kirafiki iliyojaa maneno ya amani na mabembelezo,

⁴akitumaini kumpata Yonathani awe upande wake na kufanya mkataba wa amani na Wayahudi kabla Aleksanda hajafanya mkataba nao dhidi yake.

⁵Demetrio alifikiri kwamba Yonathani angekumbuka mabaya yote ambayo yeye alikuwa ametenda kwake, kwa nduguze, na kwa taifa zima la Wayahudi.[102]

⁶Na hivi Demetrio akamfanya Yonathani mshirika wake katika vita, akampa mamlaka ya kuunda jeshi na kulipatia silaha. Pia aliamuru kwamba Yonathani akabidhiwe wale mateka waliokuwa wamefungiwa katika ngome ya Yerusalemu.

⁷Yonathani akaenda Yerusalemu na kuisoma barua hiyo mbele ya watu waliokuwa ngomeni.

⁸Watu hao waliogopa sana waliposikia kwamba mfalme alikuwa amempa mamlaka Yonathani ya kuunda jeshi.

⁹Walimkabidhi Yonathani wale mateka, naye akawarudisha kwa wazazi wao.

¹⁰Yonathani alifanya makao yake makuu Yerusalemu, akaanza kuujenga upya na kuutengeneza mji huo.

¹¹Aliwaamuru wajenzi kutumia mawe ya mraba kujengea kuta za mji na ukuta wa kuuzunguka mlima Siyoni. Hilo lilitekelezwa.

¹²Wageni waliokuwa katika ngome zilizojengwa na Bakide wakatoroka;

¹³kila mmoja aliacha kazi yake na kurudi nchini kwake.

¹⁴Lakini baadhi ya Wayahudi waliokuwa wametupilia mbali sheria walikuwa bado Beth-zuri; mji huo ulikuwa ndio kimbilio lao la mwisho.

¹⁵Mfalme Aleksanda alipata habari zote kuhusu ahadi ambazo Demetrio alikuwa amempa Yonathani, kuhusu Yonathani mwenyewe, vita alivyokuwa amepiga, matendo yake ya ujasiri, na matatizo aliyokuwa ameyapata pamoja na nduguze.

¹⁶Alijua kwa hakika kwamba hangempata mtu mwingine kama Yonathani. Hivi mfalme Aleksanda akaamua kumfanya Yonathani rafiki na mshirika wake.[103]

¹⁷Hii ni barua aliyomwandikia Yonathani:

¹⁸“Mfalme Aleksanda kwa rafiki yake Yonathani: Salamu!

¹⁹Nimesikia kwamba wewe ni mtu shujaa. Hivi una haki ya kuwa rafiki wa mfalme.

²⁰Basi, leo nimekuteua uwe kuhani mkuu wa taifa lako, na utaitwa ‘Rafiki ya Mfalme.’ Wewe utakuwa mshirika wetu utakayetupatia msaada.” Pamoja na barua hiyo, mfalme alimpelekea Yonathani vazi la urujuani na taji ya dhahabu.

²¹Mwezi wa saba wa mwaka 160,[104] wakati wa sikukuu ya vibanda, Yonathani akavaa mavazi hayo ya kuhani mkuu. Aliunda jeshi na kulipatia silaha nyingi.

²²Demetrio aliposikia hayo, alifadhaika moyoni na kusema:

²³“Tumefanya nini sasa? Tumemwachilia Aleksanda atutangulie katika kujiimarisha kwa kufanya urafiki na Wayahudi!

²⁴Basi, nami pia nitawaandikia Wayahudi barua ya kirafiki. Nitaahidi kuwapa zawadi na nyadhifa mbalimbali, ili wanipatie msaada itakapobidi.”

²⁵Hivyo akaandika: “Mfalme Demetrio kwa taifa la Wayahudi: Salamu!

²⁶Tunayo furaha kusikia ya kuwa mmezingatia mkataba wetu, mmebaki waaminifu kwetu, na kwamba hamjajiunga na maadui zetu.

²⁷Kama mtaendelea hivyo kubaki waaminifu kwetu, tutawapeni zawadi kubwa.

²⁸Tutawaondoleeni kodi nyingi na kuwapa marupurupu mbalimbali.

²⁹“Kwa barua hii nafuta kwa Wayahudi wote kodi ya kichwa, na kodi ya chumvi, na kodi nyingine maalumu.

³⁰Zaidi ya hayo, kuanzia leo nawaondoleeni wajibu wa kunilipa mimi theluthi moja ya mavuno yenu ya nafaka, na nusu ya mavuno ya matunda. Toka sasa na kuendelea sitadai malipo hayo kutoka Yudea au zile wilaya tatu za Samaria na Galilaya zilizounganishwa na Yudea.

³¹Yerusalemu na vitongoji vyake itatambuliwa kama mji mtakatifu, na hautawajibika kulipa kodi yoyote ile.

³²Toka leo sina mamlaka juu ya ngome ya Yerusalemu; naiweka chini ya kuhani mkuu, ambaye anaweza kumchagua na kumweka yeyote amtakaye kuilinda ngome hiyo.

³³Nawaachilia Wayahudi wote walio wafungwa wa kivita popote pale katika ufalme wangu. Wote hao wanasamehewa kodi, hata kodi ya mifugo yao.

³⁴Hapana Myahudi yeyote, popote pale katika ufalme wangu, atakayelipishwa kodi yoyote siku za Sabato, sikukuu za mwezi mwandamo, na sikukuu nyinginezo. Aidha, kodi hazitakusanywa siku tatu kabla au baada ya sikukuu hizo.

³⁵Siku hizo hapana mtu atakayeruhusiwa kudai malipo kwenu au kuwasumbueni kwa namna yoyote ile.

³⁶“Wayahudi wasiozidi 30,000 wanaweza kujiandikisha katika jeshi la mfalme, na watalipwa kama askari wengine wa mfalme.

³⁷Baadhi yao wanaweza kuwekwa katika ngome kuu za mfalme, na wengine kupewa nyadhifa mbalimbali katika serikali. Viongozi wao na maofisa wao watakuwa Wayahudi wenzao, na wataruhusiwa kufuata sheria na desturi zao, kama mfalme alivyoruhusu kwa watu wa Yudea.

³⁸“Zile wilaya tatu za nchi ya Samaria zilizounganishwa na Yudea, zitahesabiwa kuwa sehemu ya Yudea, na kuwekwa chini ya mamlaka ya kuhani mkuu peke yake.

³⁹Mapato ya mji wa Tolemai na ardhi yake yatatumika kulipia gharama za kuendeshea hekalu la Yerusalemu.

⁴⁰Pia naahidi kutoa kila mwaka zawadi ya vipande 15,000 vya fedha kutoka akiba inayohusika katika hazina ya mfalme.

⁴¹Jumla ya fedha yote ya msaada kutoka serikalini, ambayo tumeshindwa kulipa miaka hii ya nyuma, italipwa mara, na kuendelea kulipwa kuanzia sasa kwa ajili ya huduma ya hekalu.

⁴²Zaidi ya hayo, hatutadai tena vile vipande 5,000 vya fedha kila mwaka kutokana na mapato ya hekalu. Fedha hiyo yawahusu makuhani wanaotumikia hekaluni.

⁴³Yeyote mwenye deni kwa mfalme, au mwenye deni lolote lile, akikimbilia katika hekalu la Yerusalemu au katika eneo lolote la hekalu hilo, ni lazima aachiliwe huru, na kupewa mali yake iliyo popote pale katika ufalme wangu.

⁴⁴“Gharama za kujenga upya na kulitengeneza hekalu zitalipwa kutoka hazina ya mfalme.

⁴⁵Hali kadhalika, gharama za kujenga upya na kuziimarisha kuta za Yerusalemu, pia kuta za miji miteule katika Yudea, zitalipwa kutoka hazina ya mfalme.”

⁴⁶Yonathani na watu wake waliposikia mapendekezo hayo ya mfalme Demetrio, walikataa kuyaamini au kuyapokea, kwa sababu walikumbuka jinsi alivyokuwa amewatenda vibaya na kuwanyanyasa bila kifani.

⁴⁷Hivi wakashikamana na Aleksanda, kwa vile alikuwa wa kwanza kutoa mapendekezo ya amani; wakabaki washirika wake mpaka alipokufa.

⁴⁸Mfalme Aleksanda aliunda jeshi kubwa, akajipanga kupambana na Demetrio.

⁴⁹Lakini majeshi ya wafalme hao wawili yalipokutana vitani, jeshi la Aleksanda[105] liligeuka na kukimbia. Demetrio[106] akalifukuza na kushinda vita.

⁵⁰Hata hivyo, Aleksanda alipigana kufa na kupona mpaka jua kuzama, naye Demetrio akauawa siku hiyo.

⁵¹Ndipo Aleksanda akatuma wajumbe kwa Tolemai wa Sita, mfalme wa Misri, kusema hivi:

⁵²“Nimerejea kwenye ufalme wangu na kukalia kiti cha enzi cha wazee wangu. Nimemshinda Demetrio na kupindua serikali, na sasa nchi imo mikononi mwangu.

⁵³Nilipigana vita na Demetrio, nikamshinda yeye na jeshi lake, na nimeutwaa ufalme wake.

⁵⁴Sasa niko tayari kufanya urafiki nawe. Nipatie binti yako nimwoe, nami nitakupa wewe na binti yako zawadi mnazostahili.”

⁵⁵Mfalme Tolemai akajibu: “Hiyo ilikuwa siku ya furaha, uliporejea nchini kwako na kukalia kiti cha enzi cha wazee wako!

⁵⁶Nakubaliana na mapendekezo yako, lakini tuonane kwanza mjini Tolemai. Huko tutaelewana, nami nitakuoza binti yangu.”

⁵⁷Hivi, mwaka 162,[107] Tolemai na binti yake, Kleopatra,[108] wakaondoka Misri na kuwasili Tolemai.

⁵⁸Mfalme Aleksanda akakutana nao, naye Tolemai akamwoza binti yake Kleopatra kwa Aleksanda. Harusi ilisherehekewa hapo Tolemai kwa fahari na desturi za kifalme.

⁵⁹Kisha, mfalme Aleksanda akamwandikia Yonathani aje waonane.

⁶⁰Yonathani akaenda Tolemai kwa fahari na kukutana na hao wafalme wawili. Aliwapa zawadi za fedha na dhahabu, na kuwapa zawadi nyingi maofisa wakuu waliokuwa wamefuatana na wafalme hao. Kila mmoja alipendezwa na kuvutwa na Yonathani.

⁶¹Wakati huo huo kikundi cha Wayahudi waasi kikataka kumletea ghasia Yonathani. Kikatoa lawama na mashtaka dhidi yake, lakini mfalme Aleksanda hakukitegea sikio.

⁶²Ila alitoa amri Yonathani avuliwe nguo zake na kuvishwa mavazi ya kifalme, ya urujuani. Hayo yakatendeka.

⁶³Pia mfalme akamketisha Yonathani mahali pa heshima pembeni mwake. Kisha akawaambia maofisa wake: “Nendeni na Yonathani katikati ya mji, mkatangaze kwamba ni marufuku mtu yeyote yule kumshtaki Yonathani kuhusu jambo lolote lile; asithubutu yeyote kumuudhi kwa sababu yoyote ile.”

⁶⁴Tangazo hilo lilipotolewa, na wale wote waliopanga kumlaumu na kumshtaki Yonathani walipoona jinsi alivyokuwa ametukuzwa na kuheshimiwa kwa kuvikwa mavazi ya kifalme, wakakimbia.

⁶⁵Mfalme akazidi kumpa heshima Yonathani kwa kumworodhesha katika kundi la kwanza la “Marafiki wa Mfalme,” na kumfanya jenerali na mkuu wa mkoa wake.

⁶⁶Ndipo Yonathani akarejea Yerusalemu, mwingi wa furaha na fanaka.

⁶⁷Mwaka 165 Demetrio wa Pili, mwana wa Demetrio wa Kwanza, aliondoka Krete na kuwasili katika nchi ya wazee wake.

⁶⁸Mfalme Aleksanda alipopata habari hiyo, alifadhaika sana, akarejea Antiokia.

⁶⁹Naye Demetrio akamteua Apolonio kuwa mkuu wa mkoa wa Siria Kuu. Apolonio akaunda jeshi kubwa, akapiga kambi karibu na Yamnia, na kupeleka kwa Yonathani, kuhani mkuu, ujumbe ufuatao:

⁷⁰“Wewe ndiwe peke yako uwezaye kuja kujaribu kutushambulia. Lakini kwa nini unaendeleza uasi huu huko milimani wakati hapana mtu yeyote anakuunga mkono?

⁷¹Kama kweli unaliamini jeshi lako, teremka huku chini kwenye tambarare, tupimane nguvu. Hali halisi ni kwamba vikosi vya miji viko nyuma yangu.

⁷²Utatambua mimi ni nani na marafiki zangu ni akina nani, na utagundua kwamba huwezi kufua dafu mbele yetu. Waliokutangulia wamekwisha pigwa mara mbili katika ardhi yao wenyewe;

⁷³unawezaje wewe kutazamia kuwashinda wapandafarasi wangu na wanajeshi wa aina hii nilio nao hapa katika nchi tambarare? Kumbuka, huku chini hakuna kokoto wala jiwe la kujificha nyuma yake, na hakuna njia ya kutorokea.”

⁷⁴Yonathani alipopata ujumbe huo kutoka kwa Apolonio, alikasirika sana. Akachagua askari 10,000 kutoka Yerusalemu, na nduguye, Simoni, pia akaleta askari. Vikosi hivyo

⁷⁵vikapiga kambi nje ya Yopa. Watu wa mji huo walikataa kuwaingiza ndani askari hao kwa sababu mlikuwa na kikosi cha askari wa Apolonio. Yonathani akaanza mashambulizi.

⁷⁶Watu wa mjini wakashikwa na hofu, wakafungua milango ya mji. Yonathani akauteka mji wa Yopa.

⁷⁷Apolonio aliposikia yaliyokuwa yametukia, aliwachukua wapandafarasi 3,000 na jeshi kubwa la askari wa miguu, akaenda Ashdodi, kama vile alikuwa anaendelea na safari. Kumbe, wakati huo huo, akijivunia nguvu ya wapandafarasi wake, akasonga mbele hadi chini kwenye tambarare.

⁷⁸Yonathani akamfuatia Apolonio hadi Ashdodi, na mapambano yakaanza.

⁷⁹Apolonio, kumbe alikuwa amewaacha nyuma kwa siri wapandafarasi 1,000.

⁸⁰Mpaka wakati huo Yonathani hakutambua kwamba ameotewa. Mara jeshi lake likawa limezungukwa, na mishale ya adui ikawaporomokea kama matone ya mvua toka asubuhi mpaka jioni.

⁸¹Hata hivyo, askari wa Yonathani walisimama imara, kama alivyokuwa amewaamuru, na wapandafarasi wa adui wakaanza kuchoka.

⁸²Halafu, hao wapandafarasi walipokwisha nguvu kabisa, Simoni akatokeza katika uwanja wa mapambano na vikosi vyake. Akawashambulia na kuwashinda askari wa miguu wa adui, nao wakachomoka mbio.

⁸³Wapandafarasi, ambao kwa sasa walikuwa wametawanyika katika uwanja mzima wa mapambano, wakakimbilia Ashdodi, ambako walijificha katika hekalu la mungu wao, Beth-dagoni.

⁸⁴Lakini Yonathani akauchoma moto mji wa Ashdodi na hekalu la Beth-dagoni, akawaunguza na kuwaua wote waliokimbilia huko. Halafu akaichoma moto miji ya jirani na kuteka nyara.

⁸⁵Siku hiyo watu wapatao 8,000 waliuawa kwa upanga au kwa moto.

⁸⁶Baada ya hayo, Yonathani akaondoka na kwenda kupiga kambi Askaloni. Wakazi wa mji huo wakatoka nje na kumkaribisha kwa sherehe na shangwe.

⁸⁷Yonathani na watu wake wakarejea Yerusalemu na mateka wengi.

⁸⁸Mfalme Aleksanda aliposikia hayo yote, alimpatia Yonathani heshima kubwa zaidi.

⁸⁹Alimpelekea bizimu ya dhahabu, ambayo kwa kawaida hupewa jamaa za mfalme tu. Pia alimpa mji wa Ekroni na viunga vyake.