Read Swahilli Mathayo 10 Bible Online

Mathayo 10 - Swahilli bible

Mathayo 10

¹Yesu aliwaita wanafunzi wake kumi na wawili, akawapa uwezo wa kuwafukuza pepo wachafu[159] na kuponya magonjwa na maradhi yote.[160]

²Majina ya hao mitume[161] kumi na wawili ni haya: wa kwanza ni Simoni aitwaye Petro, na Andrea ndugu yake; Yakobo mwana wa Zebedayo, na Yohane ndugu yake;

³Filipo na Bartholomayo, Thoma na Mathayo[162] aliyekuwa mtozaushuru; Yakobo mwana wa Alfayo, na Thadayo;[163]

⁴Simoni Mkanaani,[164] na Yuda Iskarioti ambaye alimsaliti Yesu.

⁵[165] Yesu aliwatuma hao kumi na wawili na kuwapa maagizo haya: “Msiende kwa watu wa mataifa mengine, wala msiingie katika miji ya Wasamaria.[166]

⁶Ila nendeni kwa watu wa Israeli waliopotea kama kondoo.

⁷Mnapokwenda hubirini hivi: ‘Ufalme wa mbinguni umekaribia.’

⁸Ponyeni wagonjwa, fufueni wafu, takaseni wenye ukoma, toeni pepo. Mmepewa bure, toeni bure.

⁹Msichukue mifukoni mwenu dhahabu, wala fedha, wala sarafu za shaba.

¹⁰Msichukue mkoba wa kuombea njiani, wala koti la ziada, wala viatu, wala fimbo. Maana mfanyakazi anastahili riziki yake.[167]

¹¹“Mkiingia katika mji wowote au kijiji, tafuteni humo mtu anayestahili kutembelewa, na kaeni huko mpaka mtakapoondoka mahali hapo.

¹²Mnapoingia nyumbani wasalimuni wenyeji wake.

¹³Kama wenyeji wa nyumba hiyo wanastahili salamu[168] hiyo, basi, amani yenu itakaa pamoja nao. Lakini ikiwa hawastahili, basi amani yenu itawarudia nyinyi.[169]

¹⁴Kama mtu yeyote atakataa kuwakaribisheni au kuwasikilizeni, basi mtokapo katika nyumba hiyo au mji huo, yakung'uteni mavumbi miguuni mwenu[170] kama onyo kwao.

¹⁵Kweli nawaambieni, siku ya hukumu mji huo utapata adhabu kubwa kuliko ile iliyoipata miji ya Sodoma na Gomora.[171]

¹⁶“Sasa, mimi nawatuma nyinyi kama kondoo kati ya mbwamwitu. Muwe na busara kama nyoka, na wapole kama njiwa.

¹⁷Jihadharini na watu, maana watawapeleka nyinyi mahakamani na kuwapiga viboko katika masunagogi yao.

¹⁸Mtapelekwa mbele ya watawala na wafalme kwa sababu yangu, mpate kunishuhudia kwao na kwa watu wa mataifa.

¹⁹Basi, watakapowapeleka nyinyi mahakamani, msiwe na wasiwasi mtasema nini au namna gani; wakati utakapofika, mtapewa la kusema.

²⁰Maana si nyinyi mtakaosema, bali ni Roho wa Baba yenu asemaye ndani yenu.

²¹“Ndugu atamsaliti ndugu yake auawe, na baba atamsaliti mwanawe, nao watoto watawashambulia wazazi wao na kuwaua.

²²Watu wote watawachukieni nyinyi kwa sababu ya jina langu. Lakini atakayevumilia mpaka mwisho, ndiye atakayeokolewa.

²³“Watu wakiwadhulumu katika mji mmoja, kimbilieni mji mwingine. Kweli nawaambieni, hamtamaliza ziara yenu katika miji yote ya Israeli kabla Mwana wa Mtu hajafika.

²⁴“Mwanafunzi hampiti mwalimu wake, wala mtumishi hampiti bwana wake.

²⁵Yatosha mwanafunzi kuwa kama mwalimu wake, na mtumishi kuwa kama bwana wake. Ikiwa wamemwita mkubwa wa jamaa Beelzebuli,[172] je, hawatawaita watu wengine wa jamaa hiyo majina mabaya zaidi?

²⁶“Basi, msiwaogope watu hao. Kila kilichofunikwa kitafunuliwa,[173] na kila kilichofichwa kitafichuliwa.

²⁷Ninalowaambieni nyinyi katika giza, lisemeni katika mwanga; na jambo mlilosikia likinong'onezwa, litangazeni hadharani.

²⁸Msiwaogope wale wauao mwili, lakini hawawezi kuiua roho. Afadhali zaidi kumwogopa yule awezaye kuuangamiza mwili pamoja na roho katika moto wa Jehanamu.[174]

²⁹Shomoro wawili huuzwa kwa sarafu moja ndogo. Lakini hata mmoja wao haanguki chini bila kibali cha Baba yenu.[175]

³⁰Lakini kwa upande wenu, hata nywele za vichwa vyenu zimehesabiwa zote.

³¹Kwa hiyo msiogope; nyinyi mna thamani kuliko shomoro wengi.

³²“Kila mtu anayekiri hadharani kwamba yeye ni wangu, mimi pia nitamkiri mbele ya Baba yangu aliye mbinguni.

³³Lakini yeyote atakayenikana mbele ya watu, nami nitamkana mbele ya Baba yangu aliye mbinguni.

³⁴“Msidhani kwamba nimekuja kuleta amani duniani. Sikuja kuleta amani bali upanga.[176]

³⁵Maana nimekuja kuleta mafarakano kati ya mtu na baba yake, kati ya binti na mama yake, kati ya mkwe na mkwe wake.

³⁶Na maadui wa mtu ni watu wa nyumbani mwake.

³⁷“Ampendaye baba au mama yake kuliko anipendavyo mimi, hanistahili. Ampendaye mwana au binti kuliko mimi, hanistahili.[177]

³⁸Mtu asiyechukua msalaba[178] wake na kunifuata, hanistahili.

³⁹Anayeyashikilia maisha[179] yake, atayapoteza; lakini anayeyapoteza maisha yake kwa ajili yangu, atayapata.

⁴⁰“Anayewapokea nyinyi, ananipokea mimi; na anayenipokea mimi, anampokea yule aliyenituma.

⁴¹Anayempokea nabii kwa sababu ni nabii, atapokea tuzo la nabii. Anayempokea mtu mwema kwa sababu ni mtu mwema, atapokea tuzo la mtu mwema.

⁴²Kweli nawaambieni, yeyote atakayempa mmojawapo wa wadogo hawa[180] kikombe cha maji baridi kwa sababu ni mfuasi wangu, hakika hatakosa kamwe kupata tuzo lake.”