Read Swahilli Luka 18 Bible Online

Luka 18 - Swahilli bible

Luka 18

¹Basi, Yesu aliwasimulia mfano kuonesha kwamba ni lazima kusali daima bila kukata tamaa.[342]

²Alisema: “Katika mji mmoja kulikuwa na hakimu ambaye hakuwa anamcha Mungu wala kumjali binadamu.

³Katika mji huohuo, kulikuwa pia na mama mmoja mjane ambaye alimwendea huyo hakimu mara nyingi akimwomba amtetee apate haki yake kutoka kwa adui yake.[343]

⁴Kwa muda mrefu huyo hakimu hakupenda kumtetea huyo mjane; lakini, mwishowe akajisemea: ‘Ingawa mimi simchi Mungu wala simjali binadamu,

⁵lakini kwa vile huyu mjane ananisumbua, nitamtetea; la sivyo ataendelea kufika hapa, na mwisho atanichosha kabisa!’”

⁶Basi, Bwana akaendelea kusema, “Sikieni jinsi alivyosema huyo hakimu mbaya.

⁷Je, ndio kusema Mungu hatawatetea wale aliowachagua, ambao wanamlilia mchana na usiku? Je, atakawia kuwasikiliza?

⁸Nawaambieni atawatetea upesi. Hata hivyo, je, kutakuwako na imani duniani wakati Mwana wa Mtu atakapokuja?”

⁹Halafu Yesu aliwaambia pia mfano wale ambao walijiona kuwa wema na kuwadharau wengine.[344]

¹⁰“Watu wawili walipanda kwenda hekaluni kusali:[345] mmoja Mfarisayo, na mwingine mtozaushuru.

¹¹Huyo Mfarisayo[346] akasimama, akasali kimoyomoyo:[347] ‘Ee Mungu, nakushukuru kwa vile mimi si kama watu wengine: walafi, wadanganyifu au wazinzi. Nakushukuru kwamba mimi si kama huyu mtozaushuru.[348]

¹²Nafunga mara mbili kwa juma, natoa zaka sehemu ya kumi ya pato langu.’

¹³Lakini yule mtozaushuru, akiwa amesimama kwa mbali bila hata kuinua macho yake mbinguni, ila tu akijipiga kifua[349] kwa huzuni, alisema: ‘Ee Mungu, unionee huruma[350] mimi mwenye dhambi.’

¹⁴Nawaambieni, huyu mtozaushuru alirudi nyumbani akiwa amesamehewa.[351] Lakini yule mwingine, sivyo. Kwa maana kila anayejikweza atashushwa, na kila anayejishusha atakwezwa.”

¹⁵Watu walimletea Yesu watoto wadogo ili awawekee mikono yake. Wanafunzi walipowaona, wakawazuia kwa maneno makali.

¹⁶Lakini Yesu akawaita kwake akisema: “Waacheni hao watoto waje kwangu, wala msiwazuie, kwa maana ufalme wa Mungu ni kwa ajili ya watu kama hawa.

¹⁷Nawaambieni kweli, mtu yeyote asiyeupokea ufalme wa Mungu kama mtoto mdogo, hataingia katika ufalme huo.”

¹⁸[352] Kiongozi mmoja,[353] Myahudi, alimwuliza Yesu, “Mwalimu mwema, nifanye nini ili niweze kuupata uhai wa milele?”

¹⁹Yesu akamwambia, “Mbona waniita mwema? Hakuna aliye mwema ila Mungu peke yake.

²⁰Unazijua amri: ‘Usizini; Usiue; Usiibe; Usitoe ushahidi wa uongo; Waheshimu baba yako na mama yako.’”[354]

²¹Yeye akasema, “Hayo yote nimeyazingatia tangu ujana wangu.”[355]

²²Yesu aliposikia hayo, akamwambia, “Unatakiwa bado kufanya kitu kimoja: uza kila kitu ulicho nacho, wagawie maskini hiyo fedha, nawe utakuwa na hazina yako mbinguni; halafu njoo unifuate.”

²³Lakini huyo mtu aliposikia hayo, alihuzunika sana kwa sababu alikuwa tajiri sana.

²⁴Yesu alipoona akihuzunika hivyo, akasema, “Jinsi gani ilivyo vigumu kwa matajiri kuingia katika ufalme wa Mungu!

²⁵Naam, ni rahisi zaidi kwa ngamia kupita katika tundu la sindano,[356] kuliko tajiri kuingia katika ufalme wa Mungu.”

²⁶Wale watu waliposikia hayo, wakasema, “Nani basi, atakayeokolewa?”

²⁷Yesu akajibu, “Yasiyowezekana kwa binadamu, yanawezekana kwa Mungu.”

²⁸Naye Petro akamwuliza, “Na sisi, je? Tumeacha vitu vyote tukakufuata!”

²⁹Yesu akawaambia, “Kweli nawaambieni, mtu yeyote aliyeacha nyumba au mke au ndugu au wazazi au watoto kwa ajili ya ufalme wa Mungu,

³⁰atapokea mengi zaidi wakati huu wa sasa, na uhai wa milele wakati ujao.”

³¹Yesu aliwachukua kando wale kumi na wawili, akawaambia, “Sikilizeni! Tunakwenda Yerusalemu[357] na huko kila kitu kilichoandikwa na manabii kuhusu Mwana wa Mtu kitakamilishwa.

³²Kwa maana atakabidhiwa kwa watu wa mataifa[358] nao watamtendea vibaya na kumtemea mate.

³³Watampiga mijeledi na kumuua; lakini siku ya tatu atafufuka.”

³⁴Lakini wao hawakuelewa jambo hilo hata kidogo; walikuwa wamefichwa maana ya maneno hayo, na hawakutambua yaliyosemwa.

³⁵Wakati Yesu alipokaribia Yeriko, kulikuwa na mtu mmoja kipofu ameketi njiani akiomba.

³⁶Aliposikia umati wa watu ukipita aliuliza, “Kuna nini?”

³⁷Wakamwambia, “Yesu wa Nazareti anapita.”

³⁸Naye akapaza sauti akisema, “Yesu, Mwana wa Daudi,[359] nihurumie!”

³⁹Wale watu waliotangulia wakamkemea wakimwambia anyamaze; lakini yeye akazidi kupaza sauti: “Mwana wa Daudi, nihurumie!”

⁴⁰Yesu alisimama, akaamuru wamlete mbele yake. Yule kipofu alipofika karibu, Yesu akamwuliza,

⁴¹“Unataka nikufanyie nini?” Naye akamjibu, “Bwana, naomba nipate kuona.”

⁴²Yesu akamwambia, “Ona! Imani yako imekuponya.”

⁴³Na mara huyo kipofu akapata kuona, akamfuata Yesu akimtukuza Mungu. Watu wote walipoona hayo, wakamsifu Mungu.