Read Swahilli Ezra 1 Bible Online

Ezra 1 - Swahilli bible

Ezra 1

¹Mnamo mwaka wa kwanza[1] wa utawala wa Koreshi, mfalme wa Persia, ili neno la Mwenyezi-Mungu alilolinena kwa njia ya nabii Yeremia litimie,[2] Mwenyezi-Mungu alimfanya Koreshi, mfalme wa Persia, atangaze amri ifuatayo katika ufalme wake na kuiweka katika maandishi:

²“Hivi ndivyo anavyosema Koreshi mfalme wa Persia: Mwenyezi-Mungu, Mungu wa mbingu,[3] amenipatia falme zote za ulimwenguni[4] na ameniagiza nimjengee nyumba Yerusalemu, huko Yuda.[5]

³Basi sasa, kila mtu katika nyinyi nyote mlio watu wake, Mungu wake awe naye na aende Yerusalemu huko Yuda, na kuijenga upya nyumba ya Mwenyezi-Mungu,[6] Mungu wa Israeli, Mungu anayeabudiwa huko Yerusalemu.

⁴Kila mmoja aliyebaki hai uhamishoni akitaka kurudi, jirani zake na wamsaidie kwa kumpa fedha, dhahabu, mali na wanyama, pamoja na matoleo[7] ya hiari kwa ajili ya nyumba ya Mungu huko Yerusalemu.”

⁵Basi, wakaondoka viongozi wa koo za makabila ya Yuda na Benyamini,[8] makuhani na Walawi, na kila mtu ambaye Mungu alimpa moyo wa kwenda kujenga upya nyumba ya Mwenyezi-Mungu, iliyoko Yerusalemu.

⁶Majirani waliwasaidia watu hao kwa kuwapa vyombo vya fedha, dhahabu, mali, wanyama na vitu vingine vya thamani, mbali na vile vilivyotolewa kwa hiari.

⁷Mfalme Koreshi aliwarudishia vyombo ambavyo mfalme Nebukadneza alikuwa amevichukua kutoka katika nyumba ya Mwenyezi-Mungu na kuviweka katika nyumba ya miungu yake.

⁸Alimkabidhi Mithredathi,[9] mtunza hazina, vyombo hivyo, naye akamhesabia Sheshbaza, mtawala wa Yuda.

⁹Ifuatayo ndiyo hesabu yake: bakuli 30 za dhahabu; bakuli 1,000 za fedha; vyetezo 29;

¹⁰bakuli ndogo za dhahabu 30; bakuli ndogo za fedha 410; vyombo vinginevyo 1,000.

¹¹Vyombo vyote vya dhahabu na fedha, pamoja na vitu vinginevyo vilikuwa jumla yake 5,400. Vyote hivi, Sheshbaza alivichukua hadi Yerusalemu wakati yeye pamoja na watu wengine alipotolewa uhamishoni Babuloni kwenda Yerusalemu.