Read Swahilli Tobiti 2 Bible Online

Tobiti 2 - Swahilli bible

Tobiti 2

¹Basi niliporejea nyumbani kwangu na kupatiwa tena mke wangu Ana na mwanangu Tobia, niliandaliwa karamu kubwa wakati wa sikukuu ya Pentekoste,[14] iliyo sikukuu takatifu ya majuma saba. Nilipokuwa nimekaa mezani na kuona vyakula vingi mezani,

²nikamwambia Tobia, “Mwanangu, nenda nje ukaangalie kama kuna maskini Myahudi mwenzetu mcha Mungu, umlete hapa. Haya! Nakungojea.”

³Basi, Tobia akarudi na habari hii: “Baba! Kuna mtu mmoja wa taifa letu amenyongwa, akatupwa sokoni!”

⁴Papo hapo, hata bila kuonja chakula changu, niliondoka kwa haraka nikamchukua huyo maiti kumficha kibandani ili nimzike saa za jioni.

⁵Kisha nilirudi nyumbani, nikaoga,[15] nikala chakula changu kwa majonzi.

⁶Nikakumbuka maneno ya nabii Amosi: “Sikukuu zenu zitageuka kuwa maombolezo, na nyimbo zenu kilio.” Nami sikuweza kuyazuia machozi yangu.

⁷Jua lilipotua nilitoka nje, nikachimba kaburi na kumzika marehemu.

⁸Lakini jirani zangu wakanidhihaki wakisema, “Mtazameni huyu! Haogopi tena! Safari ile alinusurika kuuawa kwa sababu ya kufanya hayohayo. Bahati yake alichopoka. Lakini sasa anarudia mambo yaleyale!”

⁹Jioni hiyo nilirudi nikaoga; kisha nikaenda kulala nje uani, kando ya ukuta. Kwa kuwa kulikuwa na joto sana sikujifunika uso.

¹⁰Wala sikujua ya kwamba kulikuwapo mbayuwayu ukutani juu yangu. Basi wakanidondoshea machoni mavi yao yenye moto, vigamba vyeupe vikaziba macho yangu. Niliwaendea waganga mbalimbali, lakini hakuna aliyeweza kuniponya; mwisho nikawa kipofu kabisa. Kwa miaka minne sikuweza kuona chochote. Ndugu zangu walinishughulikia sana, na Ahika alinitunza kwa miaka miwili, kisha akaenda zake nchini Elamu.[16]

¹¹Wakati huo ikambidi mke wangu Ana kufanya kibarua: kufuma nguo, kama wanawake wengine.

¹²Mara kwa mara aliwapelekea waajiri wake nguo alizotengeneza. Siku moja, baada ya kumlipa ujira wake walimzawadisha mwanambuzi.

¹³Ana alipowasili nyumbani, mwanambuzi huyo akaanza kulia. Mimi nikamwuliza mke wangu, “Mbuzi huyo ametoka wapi? Umemwiba sivyo? Mrudishe kwa mwenyewe! Si halali kula vitu vilivyoibiwa!”

¹⁴Ana akaniambia: “Sivyo! Huyu mwanambuzi nimepewa zawadi pamoja na mshahara wangu.” Lakini mimi sikumwamini; nikaona haya kwa kitendo hicho alichofanya. Nilimwamuru amrudishe huyo mbuzi kwa wenyewe. Ndipo aliponijibu: “Haya basi! Wewe uliwasaidia maskini au sivyo? Matendo yako yamekupatia nini? Yaliyokupata ni dhahiri!”[17]