Read Swahilli Kutoka 26 Bible Online

Kutoka 26 - Swahilli bible

Kutoka 26

¹[202] “Zaidi ya hayo yote, utatengeneza hema takatifu kwa mapazia kumi ya kitani safi iliyosokotwa, na kwa sufu ya rangi ya buluu, zambarau na nyekundu. Mapazia hayo utayapamba kwa michoro ya viumbe wenye mabawa waliotariziwa.

²Kila pazia litakuwa na urefu wa mita 12 na upana wa mita 2. Mapazia hayo yawe ya kipimo kimoja.

³Utaunganisha mapazia matano yawe kipande kimoja na mapazia mengine matano yawe kipande cha pili.

⁴Utashonea vitanzi vya buluu upindoni mwa pazia la mwisho la kipande cha kwanza, hali kadhalika utashonea vitanzi mwishoni mwa pindo la nje la kipande kingine cha pazia.

⁵Utatia vitanzi hamsini katika pazia moja na vitanzi vingine hamsini kwenye utepe wa pazia la pili; vitanzi vyote vielekeane.

⁶Kisha utatengeneza kulabu hamsini za dhahabu ili kuunganishia vile vipande viwili vya mapazia, hivyo hema litakuwa kitu kimoja.

⁷“Pia utatengeneza kifuniko cha hema kwa mapazia kumi na moja ya manyoya ya mbuzi.

⁸Kila pazia litakuwa na urefu wa mita 13, na upana wa mita 2. Mapazia yote hayo 11 yatakuwa na kipimo kilekile.

⁹Utaunga mapazia matano pamoja, na mapazia sita pamoja. Pazia la sita utalikunja mara mbili mbele ya hema.

¹⁰Kisha utafanya vitanzi hamsini upindoni mwa pazia la mwisho la kipande cha kwanza, na vitanzi hamsini upindoni mwa pazia la mwisho la kipande cha pili.

¹¹Utatengeneza kulabu hamsini za shaba na kuziingiza katika vile vitanzi hamsini ili kuunganishia vile vipande viwili vya mapazia na hivyo kufanya pazia moja la hema.

¹²Ile nusu ya pazia iliyobaki utaitundika upande wa nyuma wa hema.

¹³Nusu mita ya urefu wa mapazia iliyo ya ziada utaikunja ining'inie pande zote mbavuni mwa hema ili kulifunika.

¹⁴Utatengeneza pia kifuniko kingine cha hema kilichofanywa kwa ngozi laini ya kondoo dume na ngozi laini ya mbuzi.

¹⁵“Utatengeneza mbao za mjohoro za kusimama wima kwa ajili ya hema.

¹⁶Kila ubao utakuwa na urefu wa mita 4, na upana wa sentimita 66.

¹⁷Kila ubao utakuwa na ndimi mbili za kuunganishia. Utazifanyia mbao zote ndimi mbili.

¹⁸Basi, utatengeneza hizo mbao za hema hivi: mbao ishirini kwa ajili ya upande wa kusini,

¹⁹na vikalio arubaini vya fedha chini ya hizo mbao ishirini, vikalio viwili chini kwa kila ubao ili kushikilia zile ndimi zake mbili na vikalio viwili viwe chini ya ubao mwingine ili kushikilia zile ndimi zake mbili.

²⁰Upande wa kaskazini wa hema, utatengeneza mbao ishirini,

²¹na vikalio vyake arubaini vya fedha, vikalio viwili chini ya kila ubao.

²²Kwa upande wa nyuma, ulio magharibi ya hema, utatengeneza mbao sita.

²³Utatengeneza pia mbao mbili kwa ajili ya pembe za hema upande wake wa nyuma.

²⁴Mbao hizo za pembeni ziachane chini lakini zishikamanishwe kwa juu kwenye pete ya kwanza. Mbao zote za pembeni zifanywe vivyo hivyo ili zifanye pembe mbili.

²⁵Hivyo kutakuwa na mbao nane pamoja na vikalio vyake kumi na sita vya fedha: vikalio viwili chini ya kila mbao na vikalio viwili chini ya ubao mwingine.

²⁶“Utatengeneza pau za mjohoro; pau tano kwa ajili ya mbao za upande mmoja wa hema,

²⁷na pau tano kwa ajili ya upande wa pili wa hema, na pau tano kwa ajili ya mbao za upande wa nyuma wa hema, ulio magharibi.

²⁸Upau wa katikati uliofika nusu ya jengo la hema utapenya katikati toka mwisho huu hadi mwisho mwingine wa hema.

²⁹Mbao zote utazipaka dhahabu na kuzifanyia pete za dhahabu zitakazoshikilia hizo pau, ambazo pia utazipaka dhahabu.

³⁰Hivyo utalitengeneza hema hilo kulingana na mfano niliokuonesha mlimani.

³¹“Utatengeneza pazia la nyuzi za rangi ya buluu, zambarau na nyekundu na kitani safi iliyosokotwa. Pazia hilo utalitarizi kwa ustadi kwa viumbe wenye mabawa.

³²Utalitundika pazia kwenye nguzo nne za mjohoro zilizopakwa dhahabu, zenye kulabu za dhahabu na vikalio vinne vya fedha.

³³Utalitundika pazia hilo kwenye vifungo, kisha ulilete lile sanduku la ushuhuda[203] humo ndani kukiwa na vibao viwili vya mawe, nyuma ya pazia hilo. Pazia hilo litatenga mahali patakatifu na mahali patakatifu sana.

³⁴Ndani ya mahali patakatifu utakiweka kile kiti cha rehema juu ya sanduku la maamuzi.

³⁵Ile meza ya mjohoro utaiweka upande wa nje wa pazia hilo, na kile kinara cha taa utakiweka upande wa kusini wa hema, mkabala wa meza. Meza hiyo itakuwa upande wa kaskazini.

³⁶“Kwa ajili ya mlango wa hema utatengeneza pazia zito kwa sufu ya rangi ya buluu, zambarau na nyekundu, na kitani safi iliyosokotwa, na kutariziwa vizuri.

³⁷Vilevile utatengeneza nguzo tano za mjohoro na kuzipaka dhahabu. Nguzo hizo zitakuwa na kulabu za dhahabu, na kila moja itakuwa na tako la shaba.