Read Swahilli Yobu 17 Bible Online

Yobu 17 - Swahilli bible

Yobu 17

¹“Nimevunjika moyo, siku zangu zimekwisha, kaburi langu liko tayari.

²Kweli wanaonidhihaki wamenizunguka, dhihaka zao naziona dhahiri.

³“Ee Mungu, uwe mdhamini wangu mbele yako, maana hakuna mwingine wa kunidhamini.

⁴Maadamu umezifumba akili za rafiki zangu; usiwaache basi wanishinde.

⁵Mtu anayewasaliti rafiki zake kwa faida watoto wake watakufa macho.

⁶“Nimefanywa kuwa kichekesho kwa watu nimekuwa mtu wa kutemewa mate.

⁷Macho yangu yamefifia kwa uchungu; viungo vyangu vyote vimekuwa kama kivuli.

⁸Wanyofu wanaduwaa waonapo balaa langu, nao wasio na hatia hujichochea dhidi ya mtu wanayedhani hamchi Mungu.

⁹Hata hivyo, mnyofu hushikilia msimamo wake, mtu atendaye mema huzidi kuwa na nguvu zaidi.[98]

¹⁰Lakini nyinyi njoni, njoni nyote tena, kwenu sitampata mwenye hekima hata mmoja.

¹¹“Siku zangu zimekwisha, mipango yangu imevunjwa; matazamio ya moyo wangu yametoweka.

¹²Kwa hao rafiki zangu usiku ni mchana;[99] je, ndio kusema mna mwanga gizani humu?

¹³Kwa vile Kuzimu ndio nyumba yangu, na makao yangu yamo humo gizani;

¹⁴kama naliita kaburi ‘baba yangu’ na buu, ‘mama yangu’ au ‘dada yangu’,

¹⁵je, nimebakiwa na tumaini gani? Ni nani awezaye kuona tumaini hilo?

¹⁶Tazamio langu litashuka nami kuzimu! Tutateremka sote wawili hadi huko mavumbini!”