Read Swahilli Yobu 21 Bible Online

Yobu 21 - Swahilli bible

Yobu 21

¹[116] Kisha Yobu akajibu:

²“Sikilizeni kwa makini maneno yangu; na hiyo iwe ndiyo faraja yenu.

³Nivumilieni, nami nitasema, na nikisha sema endeleeni kunidhihaki.

⁴Je, mimi namlalamikia binadamu? Ya nini basi, nikose uvumilivu?

⁵Niangalieni, nanyi mshangae, fumbeni mdomo kwa mkono.

⁶Nikifikiri yaliyonipata nafadhaika nafa ganzi mwilini kwa hofu.

⁷Kwa nini basi waovu wanaishi bado? Mbona nguvu zao zaongezeka hata uzeeni?

⁸Huwaona watoto wao wakifanikiwa; na wazawa wao wakipata nguvu.

⁹Kwao kila kitu ni salama bila hofu; wala kiboko cha Mungu hakiwafikii.

¹⁰Naam, ng'ombe wao wote huongezeka, huzaa bila matatizo yoyote.

¹¹Watoto wao wachanga huwatembeza kama kundi; na watoto wao hucheza ngoma;

¹²hucheza muziki wa ngoma na vinubi, na kufurahia sauti ya filimbi.

¹³Huishi maisha ya fanaka kisha hushuka kwa amani kuzimu.

¹⁴Humwambia Mungu, ‘Usitusumbue! Hatutaki kujua matakwa yako.

¹⁵Mungu Mwenye Nguvu ni nini hata tumtumikie? Tunapata faida gani tukimwomba dua?’

¹⁶Kufanikiwa kwao si kuko mikononi mwao, wakiwa wamemweka Mungu mbali na mipango yao?[117]

¹⁷“Mara ngapi umepata kuona mwanga wa maisha ya mwovu umezimwa, wakapata kukumbwa na maafa, au Mungu amewahi kuwaangamiza kwa hasira yake?

¹⁸Hata hivyo, na wapeperushwe kama majani makavu, wawe kama makapi yanayochukuliwa na dhoruba!

¹⁹“Nyinyi mwasema, ‘Mungu amewawekea watoto wao adhabu ya watu hao waovu.’ Kwa nini hawalipizi wao wenyewe, wapate kutambua!

²⁰Waone wao wenyewe wakiangamia; waone wenyewe ghadhabu ya Mungu mwenye nguvu.

²¹Maana wakifa watajali nini juu ya wazawa wao, wakati siku zao zitakapokuwa zimefika mwisho?

²²Je, binadamu aweza kumfunza Mungu maarifa, Mungu ambaye huwahukumu wakazi wa mbinguni?

²³“Mtu hufa katika kilele cha ufanisi wake, akiwa katika raha mustarehe na salama;

²⁴amejaa mafuta tele mwilini, na mifupa yake ikiwa bado na nguvu.

²⁵Mwingine hufa na huzuni kubwa moyoni, akiwa hajawahi kuonja lolote jema.

²⁶Hata hivyo, wote hufa na kuzikwa, wote hufunikwa na mabuu.

²⁷“Sikilizeni! Mimi nayajua mawazo yenu yote, na mipango yenu ya kunidharau.

²⁸Eti mwauliza, ‘Iko wapi nyumba ya mkuu? Iko wapi nyumba alimoishi mwovu?’

²⁹“Je, hamjawauliza wapita njia, mkakubaliana na ripoti yao?

³⁰Mwovu husalimishwa siku ya maafa, huokolewa siku ya ghadhabu!

³¹Ni nani atakayemshutumu mtu mwovu, au atakayemlipa kwa yote aliyotenda?

³²Anapochukuliwa kupelekwa kaburini, kaburi lake huwekewa ulinzi.

³³Watu wengi humfuata nyuma na wengine wengi sana humtangulia. Anapozikwa, udongo huteremshwa taratibu.

³⁴Mtawezaje basi, kunifariji kwa maneno matupu? majibu yenu hayana chochote ila uongo.”