Read Swahilli Yobu 36 Bible Online

Yobu 36 - Swahilli bible

Yobu 36

¹Kisha Elihu akaendelea kusema:

²“Nivumilie kidogo, nami nitakuonesha kitu; maana bado ninacho cha kusema kwa niaba ya Mungu.

³Nitaleta hekima yangu kutoka mbali sana,[167] na kuonesha kwamba Muumba wangu ni mwadilifu.

⁴Kweli maneno yangu si ya uongo; mwenye elimu kamili yuko hapa nawe.

⁵“Sikiliza Mungu ni mwenye nguvu wala hamdharau mtu yeyote; uwezo wa akili yake ni mkuu mno!

⁶Hawaachi waovu waendelee kuishi; lakini huwapatia wanaodhulumiwa haki zao.

⁷Haachi kuwalinda watu waadilifu; huwatawaza, wakatawala na kutukuka.

⁸Lakini kama watu wamefungwa minyororo, wamenaswa katika kamba za mateso,

⁹Mungu huwaonesha matendo yao maovu, na kwamba wao ni watu wenye kiburi.

¹⁰Huwafungua masikio wasikie mafunzo, na kuwaamuru warudi na kuacha uovu.

¹¹Wakimtii Mungu na kumtumikia, hufanikiwa katika siku zao zote; miaka yao yote huwa ya furaha.

¹²Lakini wasipomtii, huangamia kwa upanga, na kufa kwa kukosa akili.

¹³“Wasiomcha Mungu hupenda kukasirika, hawamlilii msaada anapowabana.

¹⁴Hufa wangali bado vijana, maisha yao huisha kama ya walawiti.

¹⁵Lakini Mungu huwaokoa wanyonge kwa unyonge wao[168] hutumia shida zao kuwafumbua macho.

¹⁶Mungu alikuvuta akakutoa taabuni, akakuweka mahali pa wasaa pasipo shida, na mezani pako akakuandalia vinono.

¹⁷“Lakini sasa umehukumiwa kama mwovu, hukumu ya haki imekukumba.

¹⁸Jihadhari ghadhabu isije ikakufanya ukadhihaki, au ukubwa wa mali za kukukomboa ukakupotosha.

¹⁹Je, kilio chako kitafaa kukutoa taabuni, au nguvu zako zote zitakusaidia?

²⁰Usitamani usiku uje, ambapo watu hufanywa watoweke walipo.[169]

²¹Jihadhari! Usiuelekee uovu maana umepatiwa mateso kukuepusha na uovu.

²²Kumbuka ukuu wa uwezo wa Mungu; nani awezaye kumfundisha kitu?

²³Nani basi aliyeweza kumpangia njia yake, au awezaye kumwambia: ‘Umekosea?’

²⁴“Usisahau kuyasifu matendo yake; ambayo watu wameyashangilia.

²⁵Watu wote wameona aliyofanya Mungu; binadamu huyaona kutoka mbali.

²⁶Mungu ni mkuu mno hata hatuwezi kumjua; muda wa maisha yake hauchunguziki.

²⁷Yeye huyavuta kwake maji ya bahari, na kutoka ukungu hufanya matone ya mvua.

²⁸Huyafanya mawingu yanyeshe mvua, na kuwatiririshia binadamu kwa wingi.

²⁹Nani ajuaye jinsi mawingu yatandavyo, au jinsi radi ingurumavyo angani kwake?

³⁰Yeye huutandaza umeme wake kumzunguka, na kuvifunika vilindi vya bahari.

³¹Kwa mvua huwalisha[170] watu na kuwapatia chakula kwa wingi.

³²Huukamata umeme kwa mikono yake, kisha hulenga nao shabaha,

³³Radi hutangaza ujio wake Mungu, hata wanyama hujua kwamba anakuja.