Read Swahilli Yobu 41 Bible Online

Yobu 41 - Swahilli bible

Yobu 41

¹“Yeyote anayeliona hilo dude, hufa moyo na kuzirai.

²Hakuna mtu yeyote mkali athubutuye kulishtua. Nani, basi awezaye kusimama mbele yangu?

³Nani aliyenipa kitu, ili nitakiwe kumrudishia? Chochote kilicho chini ya mbingu ni changu.[182]

⁴“Sitaacha kukueleza juu ya viungo vya hilo dude au juu ya nguvu zake na umbo lake zuri.

⁵Nani awezaye kumbambua vazi lake la nje? Nani awezaye kutoboa deraya lililovaa?

⁶Nani awezaye kufungua kinywa chake? Meno yake pande zote ni kitisho!

⁷Mgongo wake umefanywa kwa safu za ngao zilizoshikamana pamoja kama kwa mhuri,

⁸Kila moja imeshikamana na nyingine, hata hewa haiwezi kupenya katikati yake.

⁹Yameunganishwa pamoja, hata haiwezekani kuyatenganisha.

¹⁰Likipiga chafya, mwanga huchomoza, macho yake humetameta kama jua lichomozapo.

¹¹Kinywani mwake hutoka mienge iwakayo, cheche za moto huruka nje.

¹²Puani mwake hufuka moshi, kama vile chungu kinachochemka; kama vile magugu yawakayo.

¹³Pumzi yake huwasha makaa; mwali wa moto hutoka kinywani mwake.

¹⁴Shingo yake ina nguvu ajabu, litokeapo watu hukumbwa na hofu.

¹⁵Misuli yake imeshikamana pamoja, imara kama chuma wala haitikisiki.

¹⁶Moyo wake ni mgumu kama jiwe, mgumu kama jiwe la kusagia.

¹⁷Linapoinuka, mashujaa hushikwa na woga, kwa pigo moja huwa wamezirai.

¹⁸Hakuna upanga uwezao kulijeruhi, wala mkuki, mshale au fumo.

¹⁹Kwake chuma ni laini kama unyasi, na shaba kama mti uliooza.

²⁰Mshale hauwezi kulifanya likimbie; akitupiwa mawe ya teo huyaona kama makapi.

²¹Kwake, rungu ni kama kipande cha bua, hucheka likitupiwa fumo kwa wingi.

²²Tumbo lake ni kama limefunikwa na vigae vikali; hukwaruza na kurarua udongo kama chombo cha kupuria.

²³Bahari huisukasuka kama maji yachemkayo, huifanya itoe povu kama chupa ya mafuta.

²⁴Lipitapo huacha nyuma alama inayong'aa; povu jeupe huonekana limeelea baharini.

²⁵Duniani hakuna kinachofanana nalo; hilo ni kiumbe kisicho na hofu.

²⁶Huwaona kuwa si kitu wote wenye kiburi; hilo ni mfalme wa wanyama wote wakali.”