Read Swahilli Yobu 6 Bible Online

Yobu 6 - Swahilli bible

Yobu 6

¹Yobu akamjibu Elifazi:

²“Laiti mahangaiko yangu yangepimwa uzani wake, mateso yangu yote yakawekwa katika mizani!

³Yangekuwa mazito kuliko mchanga wa pwani. Ndio maana maneno yangu ni ya kuropoka![46]

⁴Naam, mishale ya Mungu Mwenye Nguvu imenichoma;[47] nafsi yangu imekunywa sumu yake. Vitisho vya Mungu vimenikabili.[48]

⁵Je, pundamwitu hulia akiwa na majani, au ng'ombe akiwa na malisho?

⁶Je, kitu kisicho na ladha chaweza kuliwa bila chumvi?[49] Je ute wa yai una utamu wowote?

⁷Sina hamu ya kuvigusa vyakula hivyo, hivyo ni vyakula vyangu vichukizavyo.”

⁸“Laiti ningejaliwa ombi langu, Mungu akanipatia kile ninachotamani:

⁹kwamba angekuwa radhi kunipondaponda, angenyosha mkono wake anikatilie mbali!

¹⁰Hiyo ingekuwa faraja yangu, ningefurahi katika maumivu yasiyo na huruma.

¹¹Lakini sina nguvu ya kuweza kuendelea; sijui mwisho wangu utakuwaje, nipate kuvumilia.

¹²Je, nguvu zangu ni kama za mawe? Au mwili wangu kama shaba?

¹³Kweli kwangu hamna cha kunisaidia; msaada wowote umeondolewa kwangu.

¹⁴“Anayekataa kumhurumia rafiki yake, anakataa kumcha Mungu[50] mwenye nguvu.[51]

¹⁵Rafiki zangu wamenidanganya kama kijito, wamenihadaa kama mitaro isiyo na maji.

¹⁶Ambayo imejaa barafu, na theluji imejificha ndani yake.

¹⁷Lakini wakati wa joto hutoweka, wakati wa hari hubaki mito mikavu.

¹⁸Misafara hupotea njia wakitafuta maji, hupanda nyikani na kufia huko.

¹⁹Misafara ya Tema hutafuta tafuta, wasafiri wa Sheba[52] hutumaini.

²⁰Huchukizwa kwa kutumaini bure, hufika kwenye vijito hivyo na kuudhika.

²¹Nyinyi mmekuwa kama vijito hivyo,[53] mwaona balaa yangu na kuogopa.

²²Je, nimesema mnipe zawadi? Au mnitolee rushwa kwa mali zenu?

²³Au mniokoe makuchani mwa adui? Au mnikomboe mkononi mwa wadhalimu?

²⁴“Nifundisheni, nami nitanyamaza. Nielewesheni jinsi nilivyokosea.

²⁵Maneno ya kweli yana nguvu kubwa! Lakini makaripio yenu yananikosoa nini?

²⁶Je, mnadhani kwamba mwaweza kuyakosoa maneno? Maneno ya mtu aliyekata tamaa ni upepo tu.

²⁷Nyinyi mnathubutu hata kuwapigia yatima kura; mnawapigia bei hata marafiki zenu!

²⁸Lakini sasa niangalieni tafadhali. Mimi sitasema uongo mbele yenu.

²⁹Acheni tafadhali, kusiwe na uovu; acheni sasa, kwani mimi ni mnyofu.

³⁰Je, mnadhani kwamba nimesema uovu? Je, mnafikiri mimi siyatambui machungu?