Read Swahilli Yobu 9 Bible Online

Yobu 9 - Swahilli bible

Yobu 9

¹Kisha Yobu akajibu:[59]

²“Kweli najua hivyo ndivyo ilivyo. Lakini mtu awezaje kuwa mwema mbele ya Mungu?

³Kama mtu angethubutu kushindana naye, hataweza kufika mbali; hata kujibu swali moja kati ya elfu.

⁴Yeye ni mwenye hekima mno na nguvu nyingi, nani aliyepingana naye, akashinda?

⁵Yeye huiondoa milima bila yenyewe kutambua, huibomolea mbali kwa hasira yake.

⁶Yeye huitikisa dunia kutoka mahali pake, na nguzo zake zikatetemeka.

⁷Huliamuru jua lisichomoze huziziba nyota zisiangaze.

⁸Yeye peke yake alizitandaza mbingu, na kuyakanyaga mawimbi ya bahari.

⁹Ndiye aliyezifanya nyota angani: Dubu, Orioni, Kilimia, na nyota za kusini.

¹⁰Ndiye atendaye makuu yasiyoeleweka, mambo ya ajabu yasiyo na idadi.

¹¹Loo! Hupita karibu nami nisimwone, kisha huenda zake bila ya mimi kumtambua.

¹²Tazama! Yeye huchukua anachotaka; nani awezaye kumzuia? Nani awezaye kumwuliza: ‘Unafanya nini?’

¹³“Mungu hatazuia hasira yake; chini yake wainama kwa hofu Rahabu na wasaidizi wake.[60]

¹⁴Nitawezaje basi kumjibu Mungu? Nitachagua wapi maneno ya kumwambia?

¹⁵Ingawa sina hatia, siwezi kumjibu. Lazima kumwomba anihurumie huyo mshtaki wangu.[61]

¹⁶Hata kama ningemwita naye akajibu, nisingeweza kuamini kuwa ananisikiliza.

¹⁷Yeye huniponda kwa dhoruba; huongeza majeraha yangu bila sababu.

¹⁸Haniachi hata nipumue; maisha yangu huyajaza uchungu.

¹⁹Kama ni kushindana, yeye ana nguvu mno! Na kama ni kutafuta juu ya haki, nani atakayemleta[62] mahakamani?

²⁰Ingawa sina hatia, maneno yangu yenyewe yangenihukumu; ingawa sina lawama, angenithibitisha kuwa mpotovu.

²¹Sina lawama, lakini sijithamini. Nayachukia maisha yangu.

²²Yote ni mamoja, kwa hiyo nasema; Mungu huwaangamiza wema na waovu.[63]

²³Maafa yaletapo kifo cha ghafla, huchekelea balaa la wasio na hatia.

²⁴Nchi ikitiwa watu waovu katika utawala wa mwovu, Mungu huyafumba macho ya mahakimu wake! Kama si yeye afanyaye hivyo, ni nani basi?

²⁵“Siku zangu zaenda mbio[64] kuliko mpiga mbio; zinakimbia bila kuona faida.

²⁶Zapita kasi kama mashua ya matete; kama tai anayerukia mawindo yake.

²⁷Nasema: ‘Nitasahau lalamiko langu, niondoe uso wangu wa huzuni na kuwa na furaha!’

²⁸Lakini nayaogopa maumivu yangu yote, kwani najua Mungu hataniona kuwa sina hatia.

²⁹Ikiwa nitahukumiwa kuwa na hatia, ya nini basi nijisumbue bure?

³⁰Hata kama nikitawadha kwa theluji, na kujitakasa mikono kwa sabuni,

³¹hata hivyo, atanitumbukiza shimoni kwenye uchafu, na mavazi yangu yataniona kuwa kinyaa.

³²Mungu si mtu kama mimi niweze kumjibu, hata tuweze kwenda mahakamani pamoja.

³³Hakuna msuluhishi kati yetu, ambaye angeamua kati yetu sisi wawili.

³⁴Mungu na aniondolee hiyo fimbo ya kunipiga, na kitisho chake kisinitie hofu!

³⁵Hapo ningeweza kusema bila kumwogopa; kwani sivyo nilivyo nafsini mwangu.[65]