Read Swahilli Zaburi 103 Bible Online

Zaburi 103 - Swahilli bible

Zaburi 103

¹[502] (Zaburi ya Daudi) Ee nafsi yangu, umsifu Mwenyezi-Mungu;[503] nafsi yangu yote ilisifu jina lake takatifu!

²Ee nafsi yangu, umsifu Mwenyezi-Mungu! Usisahau kamwe wema wake wote.

³Ndiye anayenisamehe uovu wangu wote, na kuniponya[504] magonjwa yote.

⁴Ndiye aniokoaye kutoka kifoni,[505] na kunijalia rehema na fadhili zake.

⁵Ndiye anayeniridhisha mema maisha yangu yote, hata nabaki kijana mwenye nguvu kama tai.

⁶Mwenyezi-Mungu huhukumu kwa haki; huwajalia wanaodhulumiwa haki zao.

⁷Alimjulisha Mose mwongozo wake, aliwaonesha watu wa Israeli matendo yake.

⁸Mwenyezi-Mungu ni mwenye rehema na huruma; ni mvumilivu na mwingi wa fadhili.

⁹Hatukemeikemei daima, wala hasira yake haidumu milele.

¹⁰Yeye hatuadhibu kama tunavyostahili; hatulipizi kadiri ya uovu wetu.

¹¹Kama vile anga lilivyo juu mbali na dunia, ndivyo ulivyo mwingi wema wake kwa watu wanaomcha.

¹²Kama mashariki ilivyo mbali na magharibi, ndivyo azitengavyo dhambi zetu mbali nasi.

¹³Kama vile baba amhurumiavyo mwanawe, ndivyo Mwenyezi-Mungu awahurumiavyo wote wamchao.

¹⁴Mungu ajua mfumo wa nafsi zetu; ajua kwamba sisi ni mavumbi.[506]

¹⁵Walakini binadamu, maisha yake ni kama nyasi tu; huchanua kama ua shambani:

¹⁶upepo huvuma juu yake nalo latoweka; na mahali lilipokuwa hapaonekani tena.

¹⁷Lakini fadhili za Mwenyezi-Mungu hudumu milele, kwa wale wote wanaomheshimu; na wema wake wadumu vizazi vyote,

¹⁸kwa wote wanaozingatia agano lake, wanaokumbuka kutii amri zake.

¹⁹Mwenyezi-Mungu ameweka kiti chake cha enzi mbinguni; yeye anatawala juu ya vitu vyote.

²⁰Enyi malaika wakuu, msifuni Mwenyezi-Mungu; mnaotimiza amri zake na kutekeleza neno lake!

²¹Enyi jeshi lote la mbinguni,[507] msifuni Mwenyezi-Mungu; enyi watumishi wake mnaotekeleza matakwa yake!

²²Msifuni Mwenyezi-Mungu enyi viumbe vyake vyote; msifuni popote mlipo katika milki yake. Ee nafsi yangu, umsifu Mwenyezi-Mungu!