Read Swahilli Zaburi 109 Bible Online

Zaburi 109 - Swahilli bible

Zaburi 109

¹(Kwa Mwimbishaji. Wimbo wa Daudi) Usinyamaze, ee Mungu ninayekusifu!

²Watu waovu na wadanganyifu wanishambulia, wanasema uongo dhidi yangu.

³Wanasema maovu juu yangu, na kunishambulia bila kisa.

⁴Ingawa niliwapenda, walinishtaki, hata hivyo niliwaombea dua.[550]

⁵Wananilipa uovu kwa wema wangu, na chuki kwa mapendo yangu.

⁶Umweke hakimu mbaya dhidi ya adui yangu; na mshtaki wake ampeleke mahakamani.

⁷Anapohukumiwa apatikane na hatia; lalamiko lake lihesabiwe kuwa kosa jingine.

⁸Siku za maisha yake ziwe chache, mtu mwingine na achukue kazi yake![551]

⁹Watoto wake wawe yatima, na mke wake awe mjane!

¹⁰Watoto wake watangetange na kuombaomba; wafukuzwe katika magofu ya nyumba zao!

¹¹Anayemdai kitu amnyang'anye mali yake yote; na wageni wanyakue mapato ya jasho lake!

¹²Pasiwe na mtu wa kumwonea huruma, au: kuwatunza watoto wake yatima!

¹³Wazawa wake wote wafe; jina lake lisahauliwe katika kizazi kijacho!

¹⁴Mwenyezi-Mungu aukumbuke uovu wa wazee wake, dhambi za mama yake zisifutwe kamwe!

¹⁵Mwenyezi-Mungu azikumbuke dhambi zao daima; lakini wao wenyewe wasahauliwe duniani.

¹⁶Mwovu huyo hakujali kabisa kuwa na huruma, ila aliwadhulumu maskini na fukara, kadhalika na watu wanyonge[552] mpaka kifo.

¹⁷Yeye alipenda kulaani watu, laana na impate yeye mwenyewe. Hakuwatakia wengine baraka, basi, asipate baraka yeye mwenyewe.

¹⁸Kwake kulaani ni kama kuvaa nguo, basi, laana hizo zimloweshe kama maji, zimwingie mifupani mwake kama mafuta.

¹⁹Laana zimfunike[553] kama nguo, zimzunguke daima kama ukanda.

²⁰Mwenyezi-Mungu awalipe hayo hao watu wanaonishtaki, naam hao wanaosema mabaya dhidi yangu.

²¹Lakini ee Mwenyezi-Mungu, Bwana wangu, unitendee kadiri ya hisani yako; uniokoe, kwa sababu ya wema wa fadhili zako!

²²Mimi ni maskini na fukara; nimejeruhiwa mpaka moyoni mwangu.

²³Natoweka kama kivuli cha jioni; nimepeperushwa kama nzige.

²⁴Magoti yangu yamenyong'onyea kwa mfungo; nimebaki mifupa na ngozi.

²⁵Nimekuwa dhihaka tupu kwa watu; wanionapo hutikisa vichwa vyao kwa dharau.

²⁶Unisaidie, ee Mwenyezi-Mungu, Mungu wangu; uniokoe kadiri ya fadhili zako.

²⁷Waoneshe watu kuwa ndiwe uliyetenda hayo, wewe, ee Mwenyezi-Mungu, ndiwe uliyefanya hivyo.

²⁸Waache walaani, lakini wewe unibariki; wanaonishambulia waaibike, nami mtumishi wako nifurahi.

²⁹Maadui zangu na wavishwe fedheha; wajifunike aibu yao kama blanketi.

³⁰Nitamshukuru sana Mwenyezi-Mungu kwa sauti; nitamsifu kati ya kundi kubwa la watu,

³¹kwa maana yeye humtetea maskini, humwokoa wakati anapohukumiwa.