Read Swahilli Zaburi 12 Bible Online

Zaburi 12 - Swahilli bible

Zaburi 12

¹[69] (Kwa Mwimbishaji: mtindo wa Sheminithi. Zaburi ya Daudi) Fanya haraka, ee Mwenyezi-Mungu! Watu wema wamekwisha;[70] waaminifu wametoweka miongoni mwa watu.

²Kila mmoja humdanganya mwenzake, husema kwa kudanganya na kwa moyo wa unafiki.

³Ee Mwenyezi-Mungu uikomeshe hiyo midomo ya udanganyifu, na ndimi hizo zinazojigamba kupindukia.[71]

⁴Wao husema: “Kwa ndimi zetu tutashinda; midomo tunayo, nani awezaye kututawala?”[72]

⁵Lakini Mwenyezi-Mungu asema: “Kwa sababu maskini wanadhulumiwa, na wahitaji wanapiga kite, sasa naja, nami nitawapa usalama wanaoutazamia.”[73]

⁶Neno la Mwenyezi-Mungu ni safi, safi kama fedha iliyosafishwa katika tanuri, naam, kama fedha iliyosafishwa mara saba.[74]

⁷Utulinde, ee Mwenyezi-Mungu, utukinge daima na kizazi hiki kiovu.

⁸Waovu wanazunguka kila mahali; upotovu unatukuzwa kati ya watu.