Read Swahilli Zaburi 135 Bible Online

Zaburi 135 - Swahilli bible

Zaburi 135

¹[659] Msifuni Mwenyezi-Mungu! Lisifuni jina la Mwenyezi-Mungu, msifuni enyi watumishi wake.

²Msifuni enyi mkaao katika nyumba yake,[660] ukumbini mwa nyumba ya Mungu wetu!

³Msifuni Mwenyezi-Mungu kwa kuwa ni mwema; mtukuzeni kwa nyimbo maana inafaa.[661]

⁴Mwenyezi-Mungu amemchagua Yakobo[662] kuwa wake, nyinyi watu wa Israeli kuwa mali yake mwenyewe.

⁵Najua hakika kuwa Mwenyezi-Mungu ni mkuu; Bwana wetu ni mkuu juu ya miungu yote.

⁶Mwenyezi-Mungu hufanya chochote anachotaka, mbinguni, duniani, baharini na vilindini.[663]

⁷Ndiye aletaye mawingu kutoka mipaka ya dunia; afanyaye gharika kuu kwa umeme, na kuvumisha upepo kutoka ghala zake.

⁸Ndiye aliyewaua wazaliwa wa kwanza huko Misri, wazaliwa wa watu na wanyama kadhalika.

⁹Ndiye aliyefanya ishara na maajabu[664] kwako, ee Misri, dhidi ya Farao na maofisa wake wote.

¹⁰Ndiye aliyeyaangamiza mataifa mengi, akawaua wafalme wenye nguvu:

¹¹kina Sihoni mfalme wa Waamori, Ogu mfalme wa Bashani,[665] na wafalme wote wa Kanaani.

¹²Alichukua nchi zao na kuwapa watu wake; naam, ziwe riziki ya watu wake Israeli.

¹³Jina lako, ee Mwenyezi-Mungu, ladumu milele, utakumbukwa kwa fahari nyakati zote.

¹⁴Mwenyezi-Mungu atawatetea watu wake; na kuwaonea huruma watumishi wake.

¹⁵Miungu ya uongo ya mataifa ni fedha na dhahabu, imetengenezwa kwa mikono ya binadamu.

¹⁶Ina vinywa, lakini haisemi; ina macho, lakini haioni.

¹⁷Ina masikio, lakini haisikii; wala haiwezi hata kuvuta pumzi.

¹⁸Wote walioifanya wafanane nayo, naam, kila mmoja anayeitegemea!

¹⁹Enyi watu wa Israeli, mtukuzeni Mwenyezi-Mungu! Enyi makuhani, mtukuzeni Mwenyezi-Mungu!

²⁰Enyi Walawi, mtukuzeni Mwenyezi-Mungu! Enyi wachaji wa Mwenyezi-Mungu, mtukuzeni!

²¹Atukuzwe Mwenyezi-Mungu katika Siyoni, atukuzwe katika makao yake Yerusalemu. Msifuni Mwenyezi-Mungu!