Read Swahilli Zaburi 141 Bible Online

Zaburi 141 - Swahilli bible

Zaburi 141

¹(Zaburi ya Daudi) Nakuita, ee Mwenyezi-Mungu, uje haraka kunisaidia! Uisikilize sauti yangu wakati ninapokuita!

²Sala yangu uipokee kama ubani; niinuapo mikono yangu kwako unikubali kama tambiko ya jioni.[693]

³Ee Mwenyezi-Mungu ukilinde kinywa changu, uweke ulinzi mlangoni mwa mdomo wangu.[694]

⁴Unikinge nisielekee kufanya mabaya, nisijishughulishe na matendo maovu; nisijiunge na watu watendao mabaya, wala nisishiriki kamwe karamu zao.

⁵Afadhali mtu mwema anipige kunionya; lakini sikubali kamwe kusifiwa na wabaya, maana nasali daima dhidi ya maovu yao.

⁶Wakuu wao watakapopondwa miambani, ndipo watatambua maneno yangu yalikuwa sawa.

⁷Mifupa yao itatawanywa mdomoni pa Kuzimu kama kuni zilizopasuliwa vipandevipande![695]

⁸Bali mimi nakutegemea, ee Mwenyezi-Mungu, Mungu wangu; ninakimbilia usalama kwako, usiniache hatarini.

⁹Unikinge na mitego waliyonitegea, uniepushe na matanzi ya hao watu waovu.

¹⁰Waovu wanaswe katika mitego yao wenyewe, wakati mimi najiendea zangu salama.