Read Swahilli Zaburi 37 Bible Online

Zaburi 37 - Swahilli bible

Zaburi 37

¹[179] (Zaburi ya Daudi) Usihangaike kwa sababu ya waovu; usiwaonee wivu watendao mabaya.

²Maana hao watatoweka mara kama nyasi; watanyauka kama mimea mibichi.

³Mtumainie Mwenyezi-Mungu na kutenda mema, upate kuishi katika nchi na kuwa salama.

⁴Uitafute furaha yako kwa Mwenyezi-Mungu, naye atakujalia unayotamani moyoni.

⁵Mkabidhi Mwenyezi-Mungu maisha yako; mtumainie yeye naye atafanya kitu.

⁶Ataufanya wema wako ung'ae kama mwanga, na uadilifu wako kama jua la adhuhuri.

⁷Tulia mbele ya Mwenyezi-Mungu, mngojee kwa saburi; usihangaike juu ya wale wanaofanikiwa, watu wanaofaulu katika mipango yao mibaya.

⁸Epuka hasira wala usiwe na ghadhabu; usihangaike maana hiyo huzidisha ubaya.

⁹Watu watendao mabaya wataangamizwa, bali wanaomtumaini Mwenyezi-Mungu wataimiliki nchi.

¹⁰Bado kitambo kidogo, naye mwovu atatoweka; utamtafuta pale alipokuwa, wala hutamwona.

¹¹Lakini wapole wataimiliki nchi,[180] hao watafurahia wingi wa fanaka.

¹²Mwovu hula njama dhidi ya mwadilifu, na kumsagia meno kwa chuki.

¹³Lakini Mwenyezi-Mungu humcheka mwovu,[181] kwani ajua mwisho wake u karibu.

¹⁴Waovu huchomoa panga na kuvuta pinde zao, wapate kuwaua maskini na fukara; wawachinje watu waishio kwa unyofu.

¹⁵Lakini panga zao zitawapenya wao wenyewe, na pinde zao zitavunjwavunjwa.

¹⁶Afadhali mali kidogo ya mtu mwadilifu kuliko utajiri wa watu waovu wengi.

¹⁷Maana nguvu za waovu zitavunjwa, lakini Mwenyezi-Mungu huwategemeza waadilifu.

¹⁸Mwenyezi-Mungu hutunza maisha ya watu waaminifu, na urithi wao utadumu milele.

¹⁹Hawataaibika zikifika nyakati mbaya; siku za njaa watakuwa na chakula tele.

²⁰Lakini waovu wataangamia, maadui za Mwenyezi-Mungu watanyauka kama maua nyikani; naam, watatoweka kama moshi.

²¹Mtu mwovu hukopa bila kurudisha; lakini mwadilifu hutoa kwa ukarimu.

²²Waliobarikiwa na Mwenyezi-Mungu wataimiliki nchi, lakini waliolaaniwa naye watafutiliwa mbali.

²³Mwenyezi-Mungu huziongoza nyayo za mtu, humlinda yule ampendezaye.

²⁴Ajapoanguka, haanguki akabaki chini, kwa sababu Mwenyezi-Mungu humtegemeza.

²⁵Nilikuwa kijana na sasa ni mzee; kamwe sijaona mwadilifu ameachwa na Mungu, au: watoto wake wakiombaomba chakula.[182]

²⁶Daima huwapa wengine kwa furaha na kukopesha, na watoto wake ni baraka.[183]

²⁷Achana na uovu, utende mema, nawe utaishi nchini daima;

²⁸maana Mwenyezi-Mungu hupenda uadilifu,[184] wala hawaachi waaminifu wake. Huwalinda hao milele; lakini wazawa wa waovu wataangamizwa.

²⁹Waadilifu wataimiliki nchi, na wataishi humo milele.

³⁰Mtu mwadilifu husema maneno ya hekima, kwa ulimi wake hunena yaliyo ya haki.[185]

³¹Huizingatia moyoni mwake sheria ya Mungu wake; naye hatetereki katika mwenendo wake.

³²Mtu mwovu humvizia mtu mwema na kujaribu kumuua;

³³lakini Mwenyezi-Mungu hatamtia mtu mwema makuchani mwake, wala kumwacha apatilizwe akishtakiwa.

³⁴Mtumainie Mwenyezi-Mungu na kushika njia yake, naye atakukuza uimiliki nchi, na kuwaona waovu wakiangamizwa.

³⁵Nilimwona mwovu mdhalimu sana, alijiweka juu ya wote kama mierezi ya Lebanoni!

³⁶Baadaye nikapita hapo, naye hakuwapo tena; nikamtafuta, lakini hakuonekana tena.

³⁷Mwangalie mtu mwema, mtu mwadilifu; mtu anayependa amani hujaliwa wazawa.

³⁸Lakini wakosefu wote wataangamizwa; na wazawa wao watafutiliwa mbali.

³⁹Mwenyezi-Mungu huwaokoa waadilifu, na kuwalinda wakati wa taabu.[186]

⁴⁰Mwenyezi-Mungu huwasaidia na kuwaokoa; huwatoa makuchani mwa waovu na kuwaokoa, maana wanakimbilia usalama kwake.