Read Swahilli Zaburi 55 Bible Online

Zaburi 55 - Swahilli bible

Zaburi 55

¹(Kwa Mwimbishaji: na ala za nyuzi za muziki. Utenzi wa Daudi) Ee Mungu, tega sikio usikie sala yangu; usiangalie pembeni ninapokuomba.

²Unisikilize na kunijibu; nimechoshwa na lalamiko langu.

³Nina hofu kwa vitisho vya maadui zangu,[261] na kwa kudhulumiwa na watu waovu. Watu waovu wananitaabisha, kwa hasira wananifanyia uhasama.

⁴Moyo wangu umejaa hofu, vitisho vya kifo vimenisonga.

⁵Natetemeka kwa hofu kubwa, nimevamiwa na vitisho vikubwa.

⁶Laiti ningekuwa na mabawa kama njiwa! Ningeruka mbali na kupata pumziko;

⁷naam, ningesafiri mbali sana, na kupata makao jangwani.

⁸Ningekimbilia mahali pa usalama, mbali na upepo mkali na dhoruba.

⁹Ee Bwana, uwaangamize na kuvuruga lugha yao; maana naona ukatili na ugomvi mjini,[262]

¹⁰vikiuzunguka usiku na mchana, na kuujaza maafa na jinai.

¹¹Uharibifu umeenea pote mjini, uhasama na udhalimu kila mahali.

¹²Kama adui yangu angenitukana, ningeweza kustahimili hayo; kama mpinzani wangu angenidharau, ningeweza kujificha mbali naye.

¹³Kumbe, lakini, ni wewe mwenzangu; ni wewe rafiki yangu na msiri wangu!

¹⁴Sisi tulizoea kuzungumza kirafiki; pamoja tulikwenda nyumbani kwa Mungu.

¹⁵Acha kifo kiwafumanie maadui zangu; washuke chini Kuzimu wangali hai;[263] maana uovu umewajaa moyoni mwao.[264]

¹⁶Lakini mimi namlilia Mungu, naye Mwenyezi-Mungu ataniokoa.

¹⁷Jioni, asubuhi na adhuhuri, nalalama na kulia, naye ataisikia sauti yangu.

¹⁸Atanikomboa salama katika vita ninayoikabili, kwa maana maadui zangu ni wengi.

¹⁹Mungu atawalaye tangu milele, atanisikia na kuwaaibisha maadui zangu, maana hawapendi kujirekebisha, wala hawamwogopi Mungu.

²⁰Mwenzangu amewashambulia rafiki yake, amevunja mapatano yake.

²¹Maneno yake ni laini kuliko siagi, lakini mawazo yake ni ya kufanya vita. Maneno yake ni mororo kama mafuta, lakini yanakata kama upanga mkali.

²²Mwachie Mwenyezi-Mungu mzigo wako, naye atakutegemeza; kamwe hamwachi mwadilifu ashindwe.

²³Wewe, ee Mungu, utawaporomosha shimoni chini kabisa, watu hao wauaji na wadanganyifu; hao hawatafikia nusu ya maisha yao. Lakini mimi nitakutumainia wewe ee Mungu!