Read Swahilli Zaburi 9 Bible Online

Zaburi 9 - Swahilli bible

Zaburi 9

¹[58] (Kwa Mwimbishaji: mtindo wa Muth-labeni. Zaburi ya Daudi) Nitakushukuru Mungu kwa moyo wangu wote; nitayasimulia matendo yako yote ya ajabu.[59]

²Nitafurahi na kushangilia kwa sababu yako; nitaliimbia sifa jina lako, ewe Mungu Mkuu.

³Wakati ulipotokea, maadui zangu walirudi nyuma, walijikwaa na kuangamia.

⁴Umenitetea kuhusu kisa changu cha haki; umeketi katika kiti chako cha enzi, ukatoa hukumu iliyo sawa.

⁵Umeyakemea mataifa, umewaangamiza waovu; majina yao umeyafutilia mbali milele.

⁶Maadui wameangamia milele; umeing'olea mbali miji yao, kumbukumbu lao limetoweka.

⁷Lakini Mwenyezi-Mungu anatawala milele; ameweka kiti chake cha enzi apate kuhukumu.

⁸Anauhukumu ulimwengu kwa haki; anayaamua mataifa kwa unyofu.

⁹Mwenyezi-Mungu ni ngome[60] ya watu wanaoonewa; yeye ni ngome nyakati za taabu.

¹⁰Wanaokujua wewe, ee Mungu hukutegemea, wewe Mwenyezi-Mungu huwatupi wakutafutao.

¹¹Mwimbieni sifa Mwenyezi-Mungu akaaye Siyoni.[61] Yatangazieni mataifa mambo aliyotenda!

¹²Mungu hulipiza kisasi kwa umwagaji damu; kamwe hasahau kilio cha wanaoonewa.

¹³Unirehemu, ee Mwenyezi-Mungu! Ona mateso ninayoteswa na wanaonichukia; wewe waninyakua kutoka nguvu za kifo,[62]

¹⁴nisimulie sifa zako mbele ya watu wa Siyoni, nipate kushangilia kwa sababu umeniokoa.

¹⁵Watu wa mataifa wametumbukia katika shimo walilochimba, wamenaswa miguu katika wavu waliouficha.

¹⁶Mwenyezi-Mungu amejionesha alivyo; ametekeleza hukumu. Watu waovu wamenaswa kwa matendo yao wenyewe.

¹⁷Waovu wataishia kuzimu; naam, mataifa yote yanayomsahau Mungu.

¹⁸Lakini fukara hawatasahauliwa daima; tumaini la maskini halitapotea milele.

¹⁹Inuka, ee Mwenyezi-Mungu! Usimwache binadamu ashinde. Uyakusanye mataifa mbele yako, uyahukumu.

²⁰Uyatie hofu, ee Mwenyezi-Mungu, watu wa mataifa watambue kuwa wao ni watu tu!