Read Swahilli Methali 9 Bible Online

Methali 9 - Swahilli bible

Methali 9

¹[49] Hekima amejenga nyumba yake, nyumba yenye nguzo saba.[50]

²Amechinja wanyama wa karamu, divai yake ameitayarisha, ametandika meza yake.[51]

³Amewatuma watumishi wake wa kike mjini, waite watu kutoka kwenye vilele vya miinuko:

⁴“Yeyote aliye mjinga na aje hapa!” Na yeyote aliye mpumbavu humwambia:

⁵“Njoo ukale chakula, na unywe divai niliyotengeneza.

⁶Achana na ujinga upate kuishi; fuata njia ya akili.”

⁷Anayemkosoa mwenye dharau hupata matusi, amkaripiaye mwovu huishia kwa kuumizwa.

⁸Usimwonye mwenye dharau maana atakuchukia; mwonye mwenye hekima naye atakupenda.

⁹Mfunze mwenye hekima naye atazidi kuwa na hekima; mfundishe mwadilifu naye atazidi kuelimika.

¹⁰Kumcha Mwenyezi-Mungu ni msingi wa hekima;[52] na kumjua yule Mtakatifu ni kupata akili.

¹¹Kwa msaada wangu mimi Hekima siku zako zitaongezwa; utaongezewa miaka mingi maishani mwako.

¹²Kama una hekima, itakufaa wewe mwenyewe; kama ukiidharau, mwenyewe utapata hasara.

¹³Mwanamke mpumbavu[53] ana kelele, hajui kitu wala hana haya.

¹⁴Hukaa kitako mlangoni mwa nyumba yake, huweka kiti chake mahali pa juu mjini,

¹⁵na kuwaita watu wapitao njiani, watu wanaokwenda kwenye shughuli zao:

¹⁶“Yeyote aliye mjinga na aje hapa!” Na yeyote aliye mpumbavu humwambia:

¹⁷“Maji ya wizi ni matamu[54] sana; mkate unaoliwa kwa siri ni mzuri sana.”

¹⁸Lakini mjinga hajui kwamba humo mna wafu, wageni wa mwanamke huyo wamo chini Kuzimu.