Read Swahilli Hekima ya Solomoni 2 Bible Online

Hekima ya Solomoni 2 - Swahilli bible

Hekima ya Solomoni 2

¹Katika upotovu wao huambiana: “Maisha yetu ni mafupi na yenye taabu. Kifo kinapowasili hakuna dawa ya kuepukana nacho. Hakuna mtu aliyewahi kumtoa mwingine ahera.[10]

²Sisi tulizaliwa kwa bahati tu, tukisha kufa itakuwa kana kwamba hatukupata kuwapo. Pumzi yetu ni kama moshi tu unaotoweka; akili zetu ni ndogo tu zinazowashwa kwa mapigo ya mioyo yetu.[11]

³Cheche hiyo ikizimika, mwili wetu utageuka majivu, na roho yetu itatoweka kama vile hewa.

⁴Jina letu litasahaulika punde si punde, mambo tuliyotenda hayatakumbukwa; maisha yetu yatatoweka kama nyayo za mawingu; yatatawanywa kama ukungu unaofukuzwa na nuru ya jua, unaoshindwa kustahimili joto la jua.

⁵Siku zetu ni kama kivuli kipitacho. na tukisha kufa hatuwezi kurudi kutoka humo. Siku ya kufa imepangwa wala hakuna atakayeweza kuirudisha.

⁶Hivyo na tujifurahishe kwa chochote kizuri kilichopo; tuvitumie kabisa viumbe kama wakati wa ujana.

⁷Tujishibishe divai ya thamani na marashi, tujichumie maua ya vuli yasitupite.

⁸Tujivike taji za waridi kabla hayajanyauka.

⁹Kila mmoja wetu ashiriki tamasha zetu, tuache alama za anasa zetu zionekane kila mahali. Maana ndivyo maisha yalivyo! Ndiyo tuliyopangiwa.

¹⁰“Maskini, hata akiwa mwema, tutamkandamiza; naye mjane hatutamhurumia wala kumjali mzee mwenye mvi.[12]

¹¹Nguvu zetu ndizo mwongozo wa haki, mnyonge hana faida yeyote!

¹²Tena, tumvizie mtu mwema; mtu huyo ni usumbufu kwetu na hutupinga. Hutukaripia kila tunapovunja sheria; hutushtaki kila tunapokiuka mwongozo.[13]

¹³Mtu mwema hujitakia kumjua Mungu na kujiita mtoto wake Bwana.[14]

¹⁴Mtu wa namna hiyo amekuwa kwetu karipio la fikira zetu.

¹⁵Hata tu kumtazama ni mzigo kwetu; maana anaishi tofauti na watu wengine njia zake ni ngeni kabisa.

¹⁶Anatuona sisi kuwa kama madini hafifu; huziepa njia zetu kama kukwepa uchafu. Huuthamini kuwa heri mwisho wa mwadilifu, na hujigamba kwamba Mungu ni Baba yake.

¹⁷Haya, na tuone kama maneno yake ni ya kweli! Tuone yatakayompata wakati atakapokufa.

¹⁸Kama kweli yeye ni mwana wa Mungu, Mungu atamsaidia, na kumkomboa makuchani mwa maadui zake.

¹⁹Haya! Tumtendee kikatili na kumtesa, tuone alivyo mpole, tuujaribu uvumilivu wake.

²⁰Tutamhukumu kifo cha aibu maana, kama alivyosema, Mungu atamwokoa!”

²¹Ndivyo wafikiriavyo waovu, lakini wanajidanganya wenyewe. Uovu wao umewapofusha.

²²Hawajui mipango ya siri ya Mungu; hawajawahi kutumaini kupata thawabu ya kuishi vema, wala kulitambua tuzo la watu waishio bila hatia.

²³Mungu aliumba watu waishi maisha ya milele aliwafanya kwa mfano wa hali yake mwenyewe.[15]

²⁴Lakini kwa wivu wa Shetani kifo kiliingia duniani, na wote walio upande wake hukipata.[16]