Read Swahilli Hekima ya Solomoni 8 Bible Online

Hekima ya Solomoni 8 - Swahilli bible

Hekima ya Solomoni 8

¹Nguvu ya Hekima huenea kila mahali duniani na kuweka kila kitu katika mpango mzuri.

²Nilimpenda Hekima na kumtafuta tangu ujana wangu; nilitamani kumchukua awe mchumba wangu, nikavutwa sana na uzuri wake.

³Hekima hutukuza mwanzo wake maarufu kwa kuishi pamoja na Mungu, naye Bwana mkuu wa yote anampenda.

⁴Hekima anafahamu mafumbo ya Mungu na anashiriki matendo yake.

⁵Kama mali ni kitu cha kutamanika katika maisha haya, utajiri ni nini ukilinganishwa na Hekima aongozaye mambo yote?

⁶Kama maarifa ni kitu cha kufaa kuwa nacho, hakuna kilicho bora kuliko Hekima atengenezaye yote.

⁷Je, wapenda uadilifu? Basi, matokeo ya kazi ya Hekima ni adabu njema, kuwa na kiasi, maarifa, haki na ushujaa.[38] Maishani hakuna kilicho bora kupita hayo.

⁸Je, wataka kuwa na ujuzi mwingi? Hekima ajua mambo ya kale na hutangulia kujua yajayo; hujua kufafanua mafumbo ya watu na kutatua matatizo. Hujua maana ya ishara na maajabu na huweza kubashiri matokeo ya majira na nyakati.

⁹Basi niliamua kumchukua nikae naye, nikijua kwamba atanipa mashauri mema na kunipa moyo wakati wa shida na huzuni.

¹⁰Kwa sababu yake nitaheshimika wanapokutana watu, wazee wataniheshimu ingawa mimi ni kijana.

¹¹Wataona kwamba uamuzi wangu ni wa busara, nao watawala watanistahi.

¹²Nikinyamaa wataningoja niseme, na nikisema watatega masikio. Hata nikisema kwa muda mrefu watanisikiliza kwa makini.

¹³Kwa sababu ya Hekima nitajaliwa hali ya kutokufa, nao watakaoishi baada yangu watanikumbuka daima.

¹⁴Nitakuwa na madaraka juu ya watu na mataifa;

¹⁵watawala wa mabavu wataniogopa wakisikia habari zangu. Miongoni mwa watu wangu nitakuwa mwenye uwezo na hodari vitani.

¹⁶Niingiapo nyumbani nitapumzika pamoja naye, maana kukaa pamoja naye hakuna huzuni kushirikiana naye hakuna uchungu bali furaha na shangwe.

¹⁷Ninapoyatafakari mambo haya moyoni mwangu, na kuyafikiria akilini mwangu, kwamba kutokufa kwapatikana kwa kuwa na Hekima,

¹⁸kwamba wanaompenda hupata furaha kamili, wanaofanya kazi zake hupata mali isiyopungua, wanaozungumza naye huwa wenye maarifa, na wanaopatana na maneno yake huongezwa heshima; basi nilizunguka nikitafutatafuta jinsi ya kumchukua huyo Hekima.

¹⁹Nilipokuwa mtoto nilikuwa na vipaji vya kuzaliwa, nilibahatika kuwa na roho njema, au tuseme, nilikuwa mwema, nikaingia katika mwili safi.

²⁰Lakini nilitambua kwamba singeweza kupata Hekima nisipopewa na Mungu; na huko kujua kwamba Mungu aweza kunipa, ni alama ya maarifa. Kwa hiyo nilimwomba Bwana na kumsihi kwa moyo wangu wote nikasema: