Read Swahilli Sira 16 Bible Online

Sira 16 - Swahilli bible

Sira 16

¹Usitamani kuwa na watoto wengi wasio na faida; wala kujivunia watoto wa kiume wasiomcha Mungu.

²Wakiongezeka usifurahi kwa sababu yao, isipokuwa kama wanamcha Bwana.

³Usiwe na imani juu ya kuendelea kwao kuishi; usitegemee wingi wao. Maana, mtoto mmoja ni bora kuliko elfu; ni afadhali kufa bila mtoto, kuliko kuwa na watoto wasiomcha Mungu.

⁴Mji utajaa watu kwa busara ya mtu mmoja, lakini kwa kabila moja la wabaya utabaki mtupu.

⁵Macho yangu yameona mambo mengi kama haya; masikio yangu yamesikia mambo ya ajabu kuliko hayo.

⁶Moto utawashwa katika kusanyiko la wenye dhambi, ghadhabu iliwashwa katika taifa lililoasi.[61]

⁷Yale majitu ya zamani[62] hakuyasamehe, majitu ambayo kwa kutegemea nguvu zao yaliasi.

⁸Mungu hakuwahurumia jirani za Loti, watu ambao alichukizwa na kiburi chao.[63]

⁹Hakulionea huruma taifa lililopangiwa kuangamizwa, taifa lililofutiliwa mbali kwa sababu ya dhambi zake;

¹⁰hata wale wanajeshi 600,000 wa miguu ambao walikusanyika pamoja, wakaasi kwa kiburi chao.

¹¹Hata kama kuna mtu mmoja mwenye kiburi, itakuwa ajabu kama hataadhibiwa. Maana Bwana ni mwenye huruma na ghadhabu. Yeye ana nguvu kuu ya kusamehe na huwaka hasira; na wale wasiotubu anawamwagia ghadhabu yake.

¹²Kama zilivyo kuu huruma zake ndivyo na karipio lake. Yeye humhukumu mtu kulingana na matendo yake.[64]

¹³Mwenye dhambi hataweza kutoroka na alichonyakua; na tazamio la wanaomcha Mungu halitakuwa bure.

¹⁴Mwadilifu atapokea anayostahili,[65] kila mtu atapokea kulingana na matendo yake.[66]

¹⁷Usiseme, “Nitajificha mbali na Bwana; na hamna yeyote huko juu atakayenikumbuka! Kati ya watu wengi hivyo sitajulikana, maana, nafsi yangu ni kitu gani kati ya viumbe visivyohesabika?”[67]

¹⁸Tazama, mbingu na mbingu za juu kabisa, kuzimu na dunia, vyote vitatetemeka, wakati Bwana atakapokuja.

¹⁹Milima na misingi ya dunia hutetemeka, wakati Bwana anapoviangalia.

²⁰Lakini hakuna binadamu anayefikiri hayo; ni nani awezaye kuelewa njia za Mungu?

²¹Usiseme: “Nikitenda dhambi hakuna anionaye. Nikitenda hayo katika siri kuu nani atajua?

²²Na nikitenda mema nani atayataja? Nani anangojea apewe taarifa? Yeye hukawia mno kutekeleza agano lake.”

²³Ndivyo afikiriavyo mtu asiye na akili; mtu mjinga aliyepotoshwa hufikiri kipumbavu.

²⁴Mwanangu, nisikilize ujifunze maarifa. Tega sikio usikie maneno yangu.

²⁵Nitakupa mafunzo mazitomazito, nitakufundisha maarifa kwa usahihi.

²⁶Mungu alipoumba kazi zake mwanzoni alizifanya ziwepo na kuzipa mpango,

²⁷akazipa mpango wa kufuata milele, tangu mwanzo wake na vizazi vyote. Hivyo hazitindikiwi wala kuchoka na haziachi kutekeleza wajibu wao.

²⁸Hakuna hata mojawapo inayosongana na nyingine na wala haziachi kutii neno lake Mungu.

²⁹Baada ya hayo yote Bwana aliiangalia dunia akaijaza vitu vyake vizuri.

³⁰Aliifunika dunia kwa kila aina ya viumbe, ambavyo vitakufa na kurudi udongoni.