Read Swahilli Sira 21 Bible Online

Sira 21 - Swahilli bible

Sira 21

¹Mwanangu, je, umetenda dhambi? Usitende tena. Lakini omba msamaha kwa yale uliyotenda.

²Ikimbie dhambi kama kumkimbia nyoka; maana ukimsogelea nyoka utaumwa. Meno ya dhambi ni kama ya simba. Dhambi hufisha maisha ya watu.

³Uvunjaji sheria ni kama panga kali kuwili; ukikujeruhi, mtu hawezi kutibiwa na kupona.

⁴Vitisho na ukatili huharibu utajiri; nyumba ya mwenye kiburi itakuwa mahame.

⁵Dua la maskini husikika kwa Mungu, na uamuzi wake Mungu huwasili haraka.

⁶Anayekataa kukosolewa anatembea katika dhambi, lakini anayemcha Bwana atatubu moyoni mwake.

⁷Mtu hodari wa kusema hujulikana kwa mbali, ukakosea, mwenye busara hutambua.

⁸Ajengaye nyumba yake kwa fedha ya wengine, ni kama anayekusanya mawe ya kaburi lake.

⁹Mkutano wa waovu ni kama kamba ya kitani, mwishoni mwao ni mwali wa moto mkali.

¹⁰Njia ya wenye dhambi imetengenezwa vizuri, lakini mwisho wake ni kwenye shimo la kuzimu.

¹¹Yeyote ashikaye sheria huzitawala fikira zake; hekima ni ukamilifu wa kumcha Bwana.

¹²Mtu asiye na akili hafundishiki. Lakini kuna kuwa na akili ambako huongeza uchungu.

¹³Maarifa ya mwenye hekima yataongezeka kama mafuriko, Na mawaidha yake kama chemchemi inayobubujika maji.

¹⁴Akili ya mpumbavu ni kama gudulia lililopasuka: kamwe haiwezi kushika maarifa.

¹⁵Mwenye maarifa akisikia neno la hekima atalisifu na kuliongezea zaidi. lakini mpotovu akilisikia hulidhihaki, na kulitupa mbali kabisa.

¹⁶Mazungumzo ya mpumbavu ni kama mzigo safarini; lakini furaha hupatikana katika maneno ya mwenye akili.

¹⁷Katika mkutano watu hutafuta mawazo ya mwenye busara; nao huyatafakari maneno yake moyoni mwao.

¹⁸Kwa mpumbavu hekima ni kama nyumba iliyoanguka; na maarifa ya mjinga ni maneno yasiyo na mpango.

¹⁹Kwa mpumbavu elimu ni kama pingu miguuni, ni kama pingu kwenye mkono wa kulia.

²⁰Mpumbavu hucheka kwa sauti, hali mwenye busara hutabasamu tu.[89]

²¹Kwa mwenye hekima elimu ni kama taji ya dhahabu; ni kama kikuku kwenye mkono wa kulia.

²²Mpumbavu huharakisha kuingia nyumbani kwa mtu; lakini mwenye busara hungojea mlangoni kwa heshima.

²³Mtu asiye na nidhamu huchungulia ndani, lakini mwenye adabu zake hungoja nje.

²⁴Ni utovu wa adabu kusikiliza mlangoni mwa watu, kwa wenye busara kufanya hivyo ni aibu.

²⁵Wafidhuli hupenda kurudia waliyosema wengine, lakini wenye busara maneno yao yana uzito.[90]

²⁶Wazo la wapumbavu liko mdomoni mwao, lakini wanachosema wenye hekima hutoka akilini mwao.

²⁷Mtu mbaya anapomlaani Shetani,[91] anajilaani yeye mwenyewe.

²⁸Mteti huchafua nafsi yake mwenyewe; naye huchukiwa na majirani zake.