Read Swahilli Sira 22 Bible Online

Sira 22 - Swahilli bible

Sira 22

¹Mtu fidhuli aweza kulinganishwa na jiwe chafu; kila mtu akimwona hufyonya kwa sababu ya aibu yake.

²Mtu fidhuli aweza kulinganishwa na marundo ya mavi; kila mtu anayeyagusa huyakung'utia mbali.

³Ni balaa kuwa baba wa mtoto asiye na nidhamu; na kuzaliwa kwa binti asiye na nidhamu ni hasara.

⁴Msichana mwenye busara hupata mume, lakini atendaye kwa aibu humhuzunisha baba yake.

⁵Msichana asiye na adabu atamwaibisha baba yake na mumewe, naye atadharauliwa na wote wawili.

⁶Kama vile muziki katika matanga ndivyo hadithi isiyo ya wakati wake. Kuadhibu na kupa nidhamu ni jambo la hekima daima.[92]

⁹Amfundishaye mpumbavu ni kama anayeunga vigae, au anayemwamsha mtu kutoka usingizi mzito.

¹⁰Amwambiaye mpumbavu hadithi anamwambia mtu anayepepesuka; na mwishowe huyo atasema: “Ni nini?”

¹¹Mwombolezee aliyekufa maana hana mwanga; na mwombolezee mpumbavu maana hana akili. Usimwombolezee mno aliyekufa maana amepumzika; lakini mpumbavu, maisha yake ni mabaya kuliko kifo.

¹²Matanga hufanywa kwa muda wa siku saba;[93] lakini matanga ya mpumbavu na asiyemcha Mungu hudumu maisha yake yote.

¹³Usiongee mno na mtu mpumbavu; na usimtembelee mtu asiye na akili. Mwepe ili aweze kuepa taabu; naye atakapojikung'uta wewe hutachafuka. Mwepe nawe utapata amani, wala hutachoshwa na kichaa chake.

¹⁴Ni kitu gani kizito kuliko risasi? Kitu hicho jina lake ni “Pumbavu!”

¹⁵Kubeba mchanga, chumvi na chuma ni rahisi kuliko kumvumilia mpumbavu.

¹⁶Boriti lililofungwa imara kwenye nyumba halitang'olewa kwa mtetemeko wa nchi. Kadhalika na moyo ulioimarika katika mashauri ya busara hautakuwa na woga wakati wa hatari.

¹⁷Moyo ulioimarishwa na mawazo ya busara ni kama mnara imara uliotiwa nakshi.[94]

¹⁸Mawe madogo juu ya ukuta hayatabaki hapo upepo ukivuma. Kadhalika na moyo wa fikira za kipumbavu; hautaweza kustahimili matukio ya kutisha.

¹⁹Ukilijeruhi jicho machozi yatatoka; ukiujeruhi moyo utaondoa urafiki.[95]

²⁰Ukiwatupia ndege jiwe utawafukuza; na ukimkaripia rafiki utavunja urafiki.

²¹Hata kama umekwisha mnyoshea rafiki yako upanga usife moyo maana inawezekana kurudisha urafiki.

²²Kama umetamka kitu dhidi ya rafiki yako usiogope maana upatanisho unawezekana. Lakini kutukana na kuwa na kiburi, kusema siri na kushambulia wengine ghafla, ni vitu ambavyo hufukuza marafiki wa mtu.

²³Mfanye jirani yako akuamini wakati wa umaskini wake, ili ufurahi pamoja naye wakati atakapopata fanaka. Msaidie wakati anapopata mateso, ili upate sehemu yako katika mali atakayopewa.

²⁴Moshi ni dalili ya moto, mvuke na moshi wa tanuri hutangulia moto; kadhalika nayo matusi ni dalili ya mauaji.

²⁵Sitaona aibu kumlinda rafiki wala sitajificha mbali naye.

²⁶Lakini ikiwa nitaumia kwa sababu yake yeyote atakayesikia habari hiyo atamwepa.

²⁷Nani ataniwekea mlinzi mdomoni mwangu, na kuupiga mhuri wa busara, ili unizuie nisije nikakosa,[96] ulimi wangu usije ukaniangamiza!