Read Swahilli Sira 28 Bible Online

Sira 28 - Swahilli bible

Sira 28

¹Anayelipiza kisasi naye atalipizwa na Bwana, na Bwana atathibitisha kuwa mtu huyo ana dhambi.

²Msamehe jirani yako maovu aliyokutendea, nawe unapoomba, utasamehewa dhambi zako.

³Kama mtu akidumisha hasira dhidi ya mtu mwingine, atawezaje kumtaka Bwana amwonee huruma?

⁴Kama hamwonei huruma binadamu mwenzake, je, ni sawa kumwomba Bwana amsamehe dhambi zake?

⁵Kama yeye ambaye ni kiumbe tu anashikilia hasira, nani atamsamehe yeye dhambi zake?

⁶Kumbuka mwisho wa maisha yako uache uadui; kumbuka maangamizi na kifo, uzingatie amri.

⁷Kumbuka amri, na usimkasirishe jirani yako.[115] Likumbuke agano la Mungu Mkuu, uache ujinga.

⁸Epa ugomvi, nawe utapunguza kutenda dhambi. Maana mtu mwenye hasira huchochea ugomvi.

⁹Mwenye dhambi huwasumbua marafiki na kuweka uadui kati ya watu waishio kwa amani.

¹⁰Kadiri ulivyo na kiasi cha kuni, ndivyo na moto utakavyowaka. Kadiri ubishi unavyozidi, ndivyo na ugomvi utakavyowaka. Kadiri mtu alivyo na nguvu ndivyo atakavyozidi kuwaka hasira. Kadiri mtu anavyozidi kuwa tajiri, ndivyo anavyozidi kuwa na ghadhabu.

¹¹Kugombana kwa ghafla huwasha moto, na ugomvi wa ghafla humwaga damu.

¹²Ukipuliza kaa la moto litawaka zaidi, ukilitemea mate litazimika; hayo yote mawili ni matokeo ya kinywa chako.

¹³Alaaniwe mtu mchongezi na mdanganyifu, maana amewaangamiza wengi wanaoishi kwa amani.

¹⁴Uchongezi umevunja amani ya wengi, na kuwatawanya kutoka taifa hata taifa lingine; uchongezi umeangamiza miji yenye nguvu, na kuangusha nyumba za wakuu.

¹⁵Uchongezi umewafanya wake waaminifu wawakimbie waume zao, na kuwanyang'anya matunda ya jasho lao.

¹⁶Yeyote anayemsikiliza mchongezi hatatulia moyoni, wala hataishi kwa amani.

¹⁷Pigo la mjeledi hubakiza kovu, lakini pigo la ulimi huvunjavunja mifupa.

¹⁸Watu wengi wameuawa kwa upanga, lakini ni wengi zaidi waliouawa kwa ulimi.

¹⁹Heri mtu ambaye amekingwa mbali na ulimi, mtu ambaye hajakabiliwa na hasira yake. Mtu ambaye hajabeba nira yake, na kufungwa kwa pingu zake.

²⁰Maana nira yake ni nira ya chuma, na pingu zake ni pingu za shaba.

²¹Kifo kiletwacho na uchongezi ni kifo kibaya, kuzimu ni afadhali kuliko uchongezi.

²²Lakini uchongezi hauwezi kuwatawala wamchao Mungu, hao hawatachomwa na miali yake.

²³Makuchani mwake wataanguka wale wanaomwacha Bwana; watakuwa chini ya mamlaka yake. Uchongezi utawaka ndani yao, wala hautazimishwa. Utawavamia hao kama simba, utawararuararua kama chui.

²⁴Hakikisha umeweka ua wa miiba kuzunguka mali zako, umefungia ndani fedha na dhahabu yako.

²⁵Hakikisha umeizungushia mali yako ua wa miiba, pima maneno yako kama vile kwa mizani, na kinywa chako ukiwekee mlango na kufuli.

²⁶Jihadhari usije ukakosa kwa kinywa chako, la sivyo utaanguka mbele ya huyo anayekuotea.