Read Swahilli Sira 31 Bible Online

Sira 31 - Swahilli bible

Sira 31

¹Kukosa usingizi juu ya mali humdhoofisha mtu; kuhangaika juu yake huondoa usingizi.

²Mahangaiko ya usiku kucha hufukuza usingizi, ni kama ugonjwa mkali, huondoa kabisa usingizi.

³Tajiri hutoa jasho na kuchuma mali nyingi, kisha huketi chini na kuponda maisha.

⁴Maskini naye hutoa jasho na mali yake hupungua, kisha huketi chini na hana chochote.

⁵Apendaye dhahabu hataonekana bila hatia, na atafutaye sana fedha atapotoshwa nayo.

⁶Wengi wameangamia kwa sababu ya mali, na maangamizi hayo yamewavamia ana kwa ana.

⁷Mali ni mtego kwa wanaovutwa nazo, na kila mpumbavu atanaswa nazo.

⁸Heri mtu aliye tajiri bila kuwa na lawama, mtu ambaye hakimbilii utajiri.

⁹Ni nani huyo, tumpe hongera? Maana amefanya maajabu kati ya watu.

¹⁰Nani aliyepata kujaribiwa na mali akaonekana bila hatia? Mtu kama huyo anayo haki kujivuna! Nani aliyepata nafasi ya kutenda dhambi asitende? Nani aliyepata nafasi ya kufanya maovu asifanye?

¹¹Mtu kama huyo mali yake itadumu, na jumuiya itautambua ukarimu wake.

¹²Ukikaribishwa kwenye karamu kubwa, usiwe na uchu mkubwa wa chakula wala usiseme, “Kuna chakula kingi kweli!”

¹³Kumbuka kuwa jicho la ulafi ni kitu kibaya. Je, kuna kitu chenye ulafi kama jicho? Ndiyo maana jicho hutoa machozi daima.

¹⁴Usinyoshe mkono kuchukua anachotaka mwingine, wala usimpige kumbo mwenzako kujipatia chakula.

¹⁵Tambua hali ya mwenzako unavyofikiria wewe mwenyewe, na uwajali wengine kwa kila njia.

¹⁶Kula unachopewa kama mtu mwenye adabu, wala usitafune harakaharaka la sivyo utachukiwa.

¹⁷Ni tabia njema kuwa wa kwanza kuacha kula, usiwe mlafi usije ukawaudhi watu.

¹⁸Kama umeketi pamoja na watu wangu, usiwe wa kwanza kuchukua chakula.

¹⁹Chakula kidogo ni kingi kwa mwenye adabu, na hatahangaika akirudi nyumbani kwake.

²⁰Mtu alaye kiasi hupata usingizi mzuri, ataamka mapema na kujisikia mchangamfu. Lakini mlafi atakosa usingizi, atajisikia kichefuchefu na msokoto wa tumbo.

²¹Ikiwa umelazimika kula mno ondoka ukatapike nawe utapata nafuu.

²²Nisikilize mwanangu, wala usinipuuze, na mwishowe utatambua niliyosema. Uwe na bidii katika kazi zako zote, nawe hutapatwa na ugonjwa wowote.

²³Watu humsifu aliyemkarimu kwa chakula, na maoni yao juu ya wema wake ni kweli.

²⁴Mchoyo wa chakula atasemwa kijijini kote, na maoni yao juu ya uchoyo wake ni kweli.

²⁵Usijioneshe kuwa hodari wa kunywa pombe, maana pombe imewaangamiza wengi.

²⁶Tanuri hupima ugumu wa chuma, na pombe hupima mioyo katika shindano la wenye kiburi.

²⁷Pombe ni kama uhai kwa mtu ukinywa kwa kiasi. Maisha yafaa nini bila pombe? Imeumbwa iwafurahishe watu.

²⁸Kunywa pombe wakati wake na kwa kiasi, kwaleta shangwe moyoni na furaha rohoni.

²⁹Lakini kunywa pombe kupita kiasi, kunaleta kuumwa kichwa, uchungu na fedheha.

³⁰Ulevi huongeza hasira ya mpumbavu akajiumiza mwenyewe; humdhoofisha na kumwongezea majeraha.

³¹Usimkaripie jirani yako kwenye pombe, wala usimdharau anapofurahia karamu. Usimwambie neno la kumwonya, wala usimsumbue kwa kumtaka alipe deni.