Read Swahilli Sira 48 Bible Online

Sira 48 - Swahilli bible

Sira 48

¹Kisha alizuka nabii Elia kama moto;[163] na maneno yake yaliwaka kama mwenge.

²Aliwaletea watu njaa, na kwa bidii yake ya kumpenda Mungu akawafanya wawe wachache.

³Kwa neno la Bwana alizifunga mbingu, na mara tatu akaleta moto.

⁴Kweli ewe Elia ulitukuka sana kwa matendo yako ya ajabu! Hakuna mtu anayestahili kujivuna kama wewe?

⁵Wewe ulimfufua maiti; kwa neno la Mungu Mkuu ukamwondoa ahera.

⁶Uliwaporomosha wafalme na kuwaangamiza; na watu maarufu ukawafanya wawe wagonjwa.

⁷Wewe ulisikia makaripio huko Sinai, na tangazo la adhabu huko Horebu.

⁸Ulimpaka mafuta mfalme awaadhibu watu, na manabii wa kushika mahali pako.

⁹Ulichukuliwa mbinguni kwa kimbunga cha moto, katika gari la farasi wa moto.

¹⁰Imeandikwa kuwa ulikuwa tayari kila wakati wake, kuituliza ghadhabu ya Mungu kabla haijalipuka kwa wingi, ukamfanya baba na mtoto kupatana, na kuyarekebisha makabila ya Yakobo.[164]

¹¹Heri wale waliokuona wakafariki; lakini heri yako wewe zaidi maana waishi.

¹²Elia alipotoweka katika kimbunga Elisha alijazwa nguvu za Elia. Maisha yake yote hakutetemeka mbele ya mfalme, wala hakuna mtu yeyote aliyekuwa na uwezo juu yake.

¹³Hakuna jambo lililokuwa gumu kwake, na alipokwisha kufa mwili wake ulitoa unabii.

¹⁴Kama alivyotenda maajabu akiwa hai, hata alipokwisha kufa alitenda maajabu.

¹⁵Hata kwa hayo yote watu hawakutubu. Hawakuziacha dhambi zao, mpaka wakachukuliwa mateka mbali na makwao, wakatawanywa duniani kote. Watu waliobaki nchini walikuwa wachache sana, walitawaliwa na wazawa wa Daudi.

¹⁶Baadhi yao walimpendeza Bwana, lakini wengine walizidi kutenda dhambi.

¹⁷Hezekia aliujengea[165] ngome mji wake, na kuleta maji ndani kwa mfereji. Alichimba mtaro kwa chuma kwenye mwamba mgumu, na kujenga mabawa ya maji.

¹⁸Katika siku zake Senakeribu alimshambulia,[166] akamtuma mkuu wa vikosi vyake, akaushambulia mji wa Siyoni, na kujigamba sana kwa kiburi.

¹⁹Kisha mioyo ya Waisraeli ikadunda na mikono ikatetemeka, wakawa katika taabu kama mwanamke anayejifungua.

²⁰Lakini walimwita Bwana mwenye huruma, wakimwinulia mikono yao. Naye Mtakatifu akawasikia mara kutoka mbinguni, akawakomboa kwa mkono wa Isaya.

²¹Bwana akaipiga kambi ya Waashuru, na malaika wake akawafutilia mbali.

²²Hezekia alitenda mema akazingatia nyayo za Daudi, babu yake, kama alivyoamuru nabii Isaya ambaye aliaminika kabisa katika maono yake.

²³Nyakati zake Isaya jua lilirudi nyuma, akayarefusha maisha ya mfalme.

²⁴Kwa nguvu za roho aliyaona mambo ya mwisho, akawafariji waliokuwa wanaomboleza mjini Siyoni.

²⁵Aliwafunulia mambo yatakayotukia mwishoni, akawaambia mambo ya siri kabla ya kutukia kwake.