Read Swahilli Walawi 11 Bible Online

Walawi 11 - Swahilli bible

Walawi 11

¹[52] Mwenyezi-Mungu aliwaambia Mose na Aroni,

²“Wawaambie Waisraeli hivi:

³Kati ya wanyama wote duniani, mmeruhusiwa kula mnyama yeyote mwenye kwato zilizogawanyika sehemu mbili na ambaye hucheua.

⁴Lakini msile mnyama yeyote ambaye hucheua lakini kwato zake hazikugawanyika sehemu mbili, au ambaye kwato zake zimegawanyika lakini hacheui. Msile ngamia, kwani hucheua lakini kwato zake hazikugawanyika sehemu mbili. Kwenu huyo ni najisi.

⁵Pelele msimle; yeye hucheua lakini kwato zake hazikugawanyika; kwenu huyo ni najisi.

⁶Sungura msimle; yeye hucheua lakini kwato zake hazikugawanyika; kwenu huyo ni najisi.

⁷Nguruwe msimle; ana kwato zilizogawanyika lakini hacheui; kwenu huyo ni najisi.

⁸Kwa sababu wanyama hao ni najisi msile nyama yao wala msiguse mizoga yao.[53]

⁹“Samaki yeyote wa baharini au mtoni mwenye mapezi[54] na magamba, mnaweza kumla.

¹⁰Lakini chochote kinachoishi baharini au mitoni, ambacho hakina mapezi wala magamba, yaani viumbe vyote viendavyo majini na viumbe vingine vyote viishivyo majini ni najisi kwenu.

¹¹Viumbe hivyo vitakuwa daima najisi kwenu. Msile nyama yao, wala msiiguse mizoga yao kwani ni najisi.

¹²Chochote kinachoishi majini ambacho hakina mapezi na magamba ni najisi kwenu.

¹³“Ndege wote wafuatao ni najisi kwenu; hivyo msile: tai, furukombe, kipungu,

¹⁴mwewe, aina zote za kozi,

¹⁵aina zote za kunguru,

¹⁶mbuni, kirukanjia, dudumizi, aina zote za kipanga,

¹⁷bundi, mnandi, bundi kubwa,

¹⁸mumbi, mwari, mderi,

¹⁹korongo, aina zote za koikoi, hudihudi na popo.[55]

²⁰“Wadudu wote wenye mabawa na waendao kwa miguu minne, hao ni najisi kwenu.

²¹Lakini, baadhi ya wadudu wenye mabawa na wanakwenda kwa miguu minne ya kurukia ardhini mnaweza kula.

²²Hao ni: kila aina ya nzige, kila aina ya senene, kila aina ya panzi na kila aina ya parare.

²³Lakini wadudu wengine wote wenye mabawa na miguu minne ni najisi kwenu.[56]

²⁴“Kugusa wanyama fulanifulani humfanya mtu kuwa najisi; yeyote atakayegusa mizoga yao atakuwa najisi mpaka jioni.

²⁵Mtu akichukua sehemu ya mizoga yake atakuwa najisi mpaka jioni, na mavazi yake ni lazima yafuliwe.

²⁶Mtu yeyote akigusa mnyama mwenye kwato zilizogawanyika lakini hacheui, mtu huyo atakuwa najisi.

²⁷Wanyama wote waendao kwa vitanga vyao ingawa wana miguu minne, ni najisi kwenu; na yeyote atakayegusa mzoga wa mnyama kama huyo atakuwa najisi mpaka jioni.

²⁸Mtu yeyote anayebeba mzoga atakuwa najisi, naye atasafisha mavazi yake. Hao ni najisi kwenu.[57]

²⁹“Viumbe vifuatavyo ni najisi kwenu: kicheche, panya, kila aina ya mjombakaka,

³⁰guruguru, kenge, mijusi, goromwe, na kinyonga.

³¹Hao wote ni najisi kwenu na yeyote atakayegusa mizoga yao, atakuwa najisi mpaka jioni.

³²Ikiwa mzoga wa viumbe hao unakiangukia kitu chochote, kiwe ni kifaa cha mbao au vazi au ngozi au gunia au chombo chochote kitumiwacho kwa kusudi lolote lile, chombo hicho kitakuwa najisi mpaka jioni. Ili kukifanya kiwe safi ni lazima kukiosha kwa maji.

³³Ikiwa mzoga wake umeangukia chombo cha udongo, basi, chochote kilicho ndani ya chombo hicho ni najisi na lazima chombo hicho kivunjwe.

³⁴Chakula au kinywaji chochote kilichokuwa ndani ya chombo hicho kitakuwa najisi.

³⁵Kila kitu ambacho sehemu ya mzoga imekiangukia, kitakuwa najisi. Ikiwa ni tanuri au jiko, ni lazima kivunjwe. Vitakuwa najisi navyo ni najisi kwenu.

³⁶Hata hivyo, kisima au chemchemi ya maji vitakuwa safi. Lakini chochote kinachogusa mzoga kitakuwa najisi.

³⁷Iwapo sehemu ya mzoga inaziangukia mbegu za kupanda, mbegu hizo hazitakuwa najisi.

³⁸Lakini ikiwa mbegu zimetiwa katika maji ili kuota na sehemu yoyote ya mzoga ikaziangukia, basi, mbegu hizo ni najisi kwenu.

³⁹“Iwapo mnyama yeyote mnayeruhusiwa kula, anakufa mwenyewe, yeyote atakayegusa mzoga wake, atakuwa najisi mpaka jioni.

⁴⁰Mtu yeyote akila nyama ya mzoga huo atafua mavazi yake na atakuwa najisi mpaka jioni. Na yeyote atakayebeba mzoga huo, atafua mavazi yake, naye atakuwa najisi mpaka jioni.

⁴¹“Kiumbe chochote kitambaacho duniani ni najisi kwenu, kamwe msikile.

⁴²Chochote kiendacho kwa tumbo lake, chochote kiendacho kwa miguu yote minne au nyayo nyingi, naam, chochote kitambaacho, kamwe msikile kwa maana ni najisi kwenu.

⁴³Hivyo msije mkawa najisi kwa kula viumbe vitambaavyo na hivyo mkawa najisi.

⁴⁴Kwa kuwa mimi Mwenyezi-Mungu ndimi Mungu wenu, jiwekeni wakfu na kuwa watakatifu kwa maana mimi ni mtakatifu.[58]

⁴⁵Kwa kuwa mimi Mwenyezi-Mungu ndimi niliyewatoa nchini Misri ili niwe Mungu wenu; kwa hiyo muwe watakatifu kwa maana mimi ni mtakatifu.”

⁴⁶Hiyo basi, ndiyo sheria kuhusu wanyama, ndege na viumbe vyote hai ambavyo huishi majini na nchi kavu,

⁴⁷ili kupambanua kati ya kisicho najisi na kilicho najisi; kinachoweza kuliwa na kisichoweza kuliwa.