Read Swahilli Hosea 7 Bible Online

Hosea 7 - Swahilli bible

Hosea 7

¹Kila nikitaka kuwarekebisha watu wangu, ninapotaka kuwaponya Waisraeli, uovu wa watu wa Efraimu hufunuliwa, matendo mabaya ya Samaria hujitokeza. Wao huongozwa na udanganyifu, kwenye nyumba wezi huvunja nje barabarani wanyang'anyi huvamia.

²Hawafikiri hata kidogo kwamba mimi nayakumbuka maovu yao yote. Sasa maovu yao yamewabana. Yote waliyotenda yako mbele yangu.

³“Wanamfurahisha mfalme kwa maovu yao wanawafurahisha wakuu kwa uhaini wao.

⁴Wote ni wazinzi; wao ni kama tanuri iliyowashwa moto ambao mwokaji hauchochei tangu akande unga mpaka mkate utakapoumuka.

⁵Kwenye sikukuu ya mfalme,[70] waliwalewesha sana maofisa wake; naye mfalme akashirikiana na wahuni.

⁶Kama tanuri iwakavyo, mioyo yao huwaka kwa hila; usiku kucha hasira yao hufuka moshi, ifikapo asubuhi, hulipuka kama miali ya moto.[71]

⁷Wote wamewaka hasira kama tanuri, na wanawaangamiza watawala wao. Wafalme wao wote wameanguka, wala hakuna anayeniomba msaada.

⁸“Efraimu[72] amechanganyika na watu wa mataifa. Anaonekana kama mkate ambao haukugeuzwa.

⁹Wageni wamezinyonya nguvu zake, wala yeye mwenyewe hajui; mvi zimetapakaa kichwani mwake, lakini mwenyewe hana habari.

¹⁰Kiburi cha Waisraeli chashuhudia dhidi yao, hawanirudii mimi Mwenyezi-Mungu, Mungu wao; wala hawanitafuti kwa matukio hayo yote.

¹¹Efraimu ni kama njiwa, mjinga asiye na akili; mara yuko Misri, mara Ashuru kuomba.[73]

¹²Watakapokwenda nitatandaza wavu wangu niwanase, nitawaangusha chini kama ndege wa angani; nitamwaadhibu kadiri ya ripoti ya maovu yao.

¹³Ole wao kwa kuwa wameniacha! Maangamizi na yawapate, maana wameniasi. Nilitaka kuwakomboa, lakini wanazua uongo dhidi yangu.[74]

¹⁴“Wananililia, lakini si kwa moyo. Wanagaagaa na kujikatakata vitandani mwao,[75] kusudi nisikilize dua zao za nafaka na divai; lakini wanabaki waasi dhidi yangu.

¹⁵Mimi ndimi niliyeiimarisha mikono yao, lakini wanafikiria maovu dhidi yangu.

¹⁶Wanaigeukia miungu batili, wako kama uta uliolegea.[76] Viongozi wao watakufa kwa upanga, kwa sababu ya maneno yao ya kiburi. Kwa hiyo, watadharauliwa nchini Misri.