Read Swahilli Amosi 5 Bible Online

Amosi 5 - Swahilli bible

Amosi 5

¹Sikilizeni maombolezo[42] yangu juu yenu, enyi Waisraeli:

²Umeanguka na hutainuka tena ewe binti Israeli![43] Umeachwa pweke nchini mwako, hamna hata mtu wa kukuinua.

³Maana Bwana Mwenyezi-Mungu asema hivi: “Watu 1,000 watatoka mjini kwenda kupigana lakini watarejea 100 tu; wataondoka watu 100 wa kijiji kimoja lakini watanusurika watu kumi tu.”

⁴Mwenyezi-Mungu awaambia hivi Waisraeli: “Nitafuteni mimi nanyi mtaishi!

⁵Lakini msinitafute huko Betheli wala msiende Gilgali wala msivuke kwenda Beer-sheba. Maana wakazi wa Gilgali, hakika watachukuliwa uhamishoni,[44] na Betheli[45] utaangamizwa!”

⁶Mtafuteni Mwenyezi-Mungu, nanyi mtaishi! La sivyo, atawalipukia wazawa wa Yosefu[46] kama moto; moto utawateketeza wakazi wa Betheli na hakuna mtu atakayeweza kuuzima.

⁷Tahadhari enyi mnaogeuza haki kuwa uchungu, na kuuona uadilifu kuwa kama takataka!

⁸Huyo aliyezifanya Kilimia na sayari Orioni,[47] ambaye huligeuza giza nene kuwa mchana, na mchana kuwa usiku; yeye ambaye ayaitaye pamoja maji ya bahari na kuyamwaga juu ya nchi kavu, Mwenyezi-Mungu ndilo jina lake.

⁹Yeye ndiye anayewaangamiza wenye nguvu, na kuziharibu ngome zao.

¹⁰Nyinyi huwachukia watetezi wa haki na wenye kusema ukweli mahakamani.

¹¹Nyinyi mnawakandamiza fukara na kuwatoza kodi ya ngano kupita kiasi. Mnajijengea nyumba za mawe ya kuchonga, lakini nyinyi hamtaishi humo; mnalima bustani nzuri za mizabibu, lakini hamtakunywa divai yake.

¹²Maana mimi najua wingi wa makosa yenu na ukubwa wa dhambi zenu; nyinyi mnawatesa watu wema, mnapokea rushwa na kuzuia fukara wasipate haki[48] mahakamani.

¹³Basi, kutakuwa na wakati mbaya ambao hata mwenye busara atanyamaza.

¹⁴Tafuteni kutenda mema na si mabaya, ili nyinyi mpate kuishi naye Mwenyezi-Mungu wa majeshi awe pamoja nanyi kama mnavyosema.

¹⁵Chukieni uovu, pendeni wema, na kudumisha haki mahakamani. Yamkini Mwenyezi-Mungu wa majeshi atawafadhili watu wa Yosefu waliobaki.[49]

¹⁶Basi, Mwenyezi-Mungu, Mungu wa majeshi, naam, Mwenyezi-Mungu asema: “Patakuwa na kilio kila mahali mitaani; watu wataomboleza: ‘Ole! Ole!’ Wakulima wataitwa waje kuomboleza, na mabingwa wa kuomboleza[50] waje kufanya matanga.

¹⁷Patakuwa na kilio katika mashamba yote ya mizabibu;[51] maana nitapita kati yenu kuwaadhibu. Nasema mimi Mwenyezi-Mungu.”

¹⁸Ole wenu nyinyi mnaoingojea kwa hamu siku ya Mwenyezi-Mungu![52] Kwa nini mnaitaka sana siku hiyo? Siku hiyo, itakuwa siku ya giza na sio ya mwanga!

¹⁹Mambo yatakuwa kama mtu aliyekimbia simba, halafu akakumbana na dubu! Au kama mtu anayerudi nyumbani kwake, akatia mkono ukutani, akaumwa na nyoka.

²⁰Siku ya Mwenyezi-Mungu itakuwa giza, na sio mwanga; itakuwa huzuni bila uangavu wowote.

²¹Mwenyezi-Mungu asema hivi: “Nazichukia na kuzidharau sikukuu zenu; siifurahii mikutano yenu ya kidini.

²²Mjaponitolea sadaka zenu za kuteketezwa na za nafaka, mimi sitakubali kuzipokea; na sadaka zenu za amani za wanyama wanono mimi sitaziangalia kabisa.

²³Ondoeni mbele yangu kelele za nyimbo zenu! Sitaki kusikiliza muziki wa vinubi vyenu!

²⁴Lakini acheni haki itiririke kama maji, uadilifu uwe kama mto usiokauka.[53]

²⁵“Enyi Waisraeli, wakati ule mlipokuwa kule jangwani kwa miaka arubaini, je, mliniletea tambiko na sadaka hata mara moja?

²⁶Je, wakati huo mlibeba kama sasa vinyago vya mungu wenu Sakuthi mfalme wenu na vinyago vya Kaiwani[54] mungu wenu wa nyota, vitu ambavyo mlijitengenezea wenyewe?

²⁷Kwa hiyo nitawapeleka uhamishoni, mbali kuliko Damasko!”[55] Hayo amesema Mwenyezi-Mungu, ambaye jina lake ni Mungu wa Majeshi.