Read Swahilli 1 Wamakabayo 5 Bible Online

1 Wamakabayo 5 - Swahilli bible

1 Wamakabayo 5

¹Mataifa jirani yaliposikia kwamba Wayahudi walikuwa wamejenga upya madhabahu na hekalu limewekwa wakfu kama kwanza yaliwaka hasira,

²yakaamua kuwaangamiza wazawa wa Yakobo waliokuwa wanaishi miongoni mwao. Hivi wakaanza kufanya mauaji na uharibifu miongoni mwa watu.

³Kule Akrabatene,[55] Idumea, wana wa Esau walikuwa wanawavizia Waisraeli. Yuda akawapiga vita na kuwaangamiza kabisa, akawanyenyekesha na kupora mali zao.

⁴Pia hakusahau wana wa Baeani[56] ambao walikuwa tishio na mtego kwa watu wa Israeli, kwa vile walikuwa wakijificha njiani na kuwashambulia Waisraeli.

⁵Yuda akawafungia Wabaeani katika ngome zao, akaweka nadhiri ya kuwaangamiza, akazichoma moto ngome hizo na kuwaunguza wote waliokuwa ngomeni.

⁶Halafu akavuka kuwaendea Waamoni. Akakuta jeshi kubwa na lenye nguvu, likiongozwa na Timotheo.

⁷Yuda akapambana na jeshi hilo katika mapigano mengi; hatimaye akalishinda nguvu.

⁸Akauteka Yazeri na vijiji vyake, kisha akarejea nchini Yudea.

⁹Watu wa mataifa huko Gileadi[57] walikusanyika ili kuwashambulia na kuwaangamiza Waisraeli waliokuwa wanakaa nchini mwao. Lakini Waisraeli wakakimbilia kwenye ngome ya Dathema,

¹⁰na kumwandikia Yuda na nduguze barua iliyosema: “Jirani zetu, watu wa mataifa mengine, wamekusanyika ili kutuangamiza.

¹¹Wanajiandaa kuja kuiteka ngome ambamo tumekimbilia, naye Timotheo anaongoza majeshi yao.

¹²Basi, fanya haraka, uje utuokoe, maana wengi wetu wamekwisha uawa.

¹³Na ndugu zetu wote waliokuwa katika nchi ya Tobu wameuawa; maadui wamechukua mateka wake zao, watoto wao, na mali yao, na kuwaangamiza watu wapatao 1,000.”

¹⁴Barua hiyo ilipokuwa bado inasomwa, wajumbe wengine, waliokuwa wamerarua mavazi yao kwa uchungu, waliwasili na taarifa kama hiyo kutoka Galilaya.

¹⁵Wakasema: “Jeshi kutoka Tolemai,[58] Tirza, Sidoni, na mkoa mzima wa Galilaya, limekusanyika kutuangamiza.”

¹⁶Yuda na watu wake waliposikia hayo yote, wakaita mkutano mkubwa kuamua jinsi ya kuwasaidia wananchi wenzao waliokuwa wanasumbuka na kushambuliwa na maadui.

¹⁷Yuda akamwambia nduguye Simoni: “Chagua baadhi ya watu wako, nenda ukawaokoe Wayahudi wenzetu huko Galilaya; mimi na ndugu yetu Yonathani tutakwenda Gileadi.”

¹⁸Yuda akaviacha vikosi vingine vya jeshi lake viilinde Yudea, chini ya uangalizi wa Yosefu mwana wa Zekaria, na Azaria, kiongozi wa watu.

¹⁹Akawaambia hao wawili: “Waangalieni watu hawa, lakini msijitie katika mapambano na watu wa mataifa mengine mpaka sisi tutakaporudi.”

²⁰Ndipo Simoni akatwaa watu 3,000 na kwenda nao Galilaya, na Yuda akaenda zake Gileadi na watu 8,000.

²¹Simoni akaenda Galilaya, akapigana vita vingi na watu wa mataifa mengine. Akawashinda

²²na kuwafuatia mpaka mji wa Tolemai. Aliwaua watu wapatao 3,000, akapora na mali zao.

²³Halafu akawachukua Wayahudi waliokuwa Galilaya na Arbata,[59] pamoja na wake zao, watoto wao na mali zao zote, akarudi nao Yudea kwa shangwe kubwa.

²⁴Wakati huo, Yuda Makabayo na nduguye Yonathani walikuwa wamevuka mto Yordani na kusafiri jangwani siku tatu.

²⁵Walikutana na baadhi ya Wanabatea[60] ambao waliwakaribisha kwa amani na kuwaeleza yote yaliyokuwa yamewapata Wayahudi wenzao kule Gileadi.

²⁶Wanabatea hao walieleza kwamba Wayahudi wengi walikuwa wamefungwa katika miji yenye ngome, miji ya Bozra, Bosori, Alema, Chasfo, Makedi na Karnaimu; miji mikubwa na midogo;[61]

²⁷wengine wamefungwa katika miji midogomidogo ya Gileadi. Pia walitoa taarifa kwamba maadui walikuwa wamejitayarisha kuzishambulia ngome wapate kuteka na kuwaangamiza Wayahudi wote kwa siku moja.

²⁸Basi, Yuda na jeshi lake wakageuka mara na kupita njia ya jangwani. Wakaushambulia na kuuteka mji wa Bozra, na kuwaua watu wote mjini humo, wakateka nyara na kuuchoma moto mji huo.

²⁹Kisha wakaondoka, wakasafiri usiku kucha hadi kwenye ngome ya mji wa Dathema.[62]

³⁰Alfajiri, Yuda na watu wake wakaona jeshi kubwa la watu wasiohesabika, wamebeba ngazi na zana za vita, kuiteka hiyo ngome na kuwashambulia Wayahudi.

³¹Yuda aliposikia vishindo na makelele na sauti za tarumbeta kutoka mjini, akatambua kwamba vita vilikuwa vimeanza.

³²Basi, akawaambia watu wake: “Pigeni vita leo kwa ajili ya Wayahudi wenzetu!”

³³Yuda akapanga watu katika vikosi vitatu, wasonge mbele kuelekea upande wa nyuma wa maadui; walipiga tarumbeta na kusali kwa sauti kubwa.

³⁴Jeshi lililokuwa chini ya Timotheo lilipoona kuwa linakabiliwa na Yuda Makabayo, likageuka na kuanza kukimbia. Yuda akalipiga barabara na kuwaua watu wapatao 8,000 siku hiyo.

³⁵Halafu Yuda akaugeukia mji wa Alema, akaushambulia na kuwaua wakazi wake wote, akateka nyara, na kuuchoma moto mji huo.

³⁶Kutoka hapo aliendelea mbele, akaiteka miji ya Chasfo, Makedi, Bosori, na mingineyo ya Gileadi.

³⁷Baada ya hayo, Timotheo akakusanya jeshi lingine, akapiga kambi mkabala na Rafoni, upande wa pili wa mto.

³⁸Yuda akatuma watu fulani kwenda kupeleleza kambi ya adui. Wapelelezi walirudisha taarifa kwake kwamba watu wote wa mataifa mengine katika eneo hilo walikuwa wamejiunga na Timotheo na kufanya jeshi kubwa.

³⁹Timotheo alikuwa pia amekodi askari wa Kiarabu wamsaidie; hao nao walikuwa kambini, upande wa pili wa mto, tayari kumshambulia Yuda. Basi, Yuda akaenda kupambana nao.

⁴⁰Yuda na jeshi lake walipokaribia kufika mtoni, Timotheo akawaambia maofisa wake: “Kama akivuka mto kwanza, hatutaweza kurudisha mashambulio yake, naye atatushinda.

⁴¹Lakini kama ataogopa na kusimama upande mwingine wa mto, sisi tutavuka na kumshambulia na kumshinda.”

⁴²Yuda alipoufikia ukingo wa mto, aliwaamuru maofisa wake: “Msimruhusu yeyote yule kusimama; wote waingie vitani!”

⁴³Halafu yeye mwenyewe akawa wa kwanza kuvuka mto, na watu wake wote wakamfuata. Maadui wakapigwa vibaya, wakatupa silaha zao na kukimbilia kwenye hekalu lililokuwa mjini Karnaimu.[63]

⁴⁴Lakini Yuda na watu wake wakauteka mji huo, wakalichoma moto hekalu hilo na kuwaunguza wote waliokuwa humo ndani. Basi, Karnaimu ulichukuliwa, na watu hao hawakuweza tena kumzuia Yuda.

⁴⁵Kisha, Yuda akawakusanya Wayahudi wote waliokuwa Gileadi, tangu watoto hata wazee, wanawake na watoto wao pamoja na mali yao; likawa kundi kubwa sana la watu wanarudi nchini Yudea.

⁴⁶Basi, wakaenda hadi Efroni. Huo ulikuwa mji mkubwa na imara sana, umejengwa njiani. Hawakuweza kuuzunguka, wala kulia wala kushoto; ikawabidi kupita katikati ya mji.

⁴⁷Lakini wakazi wa Efroni wakawafungia nje Wayahudi na kuziba milango ya mji kwa mawe.

⁴⁸Yuda akawapelekea ujumbe huu wa kirafiki: “Tuacheni tupite katika nchi yenu ili turudi kwetu. Hapana atakayewadhuru nyinyi. Sisi tutapita tu na kwenda zetu.” Lakini wao wakakataa kufungua milango.

⁴⁹Basi, Yuda akawaambia wote waliofuatana na jeshi lake wasimame walipo.

⁵⁰Halafu akawaamuru askari wake kujiandaa kwa mapambano dhidi ya mji wa Efroni. Pakawa na mapigano mchana kutwa na usiku kucha, mpaka mji ulipotekwa na Wayahudi.

⁵¹Yuda akawaua kwa upanga wanaume wote wa Efroni, akaubomoa mji na kuteka nyara. Halafu yeye na jeshi lake wakapita katikati ya magofu ya mji huo, wakitembea juu ya maiti.

⁵²Walivuka mto Yordani na kuifikia tambarare pana mbele ya Beth-sheani.

⁵³Njiani kote Yuda alikuwa akiwakusanya waliolegalega nyuma na kuwatia moyo watu wake mpaka walipowasili Yudea.

⁵⁴Kwa shukrani na shangwe, walipanda mlimani Siyoni, wakatolea sadaka za kuteketezwa, kwa sababu walikuwa wamerudi salama bila ya kumpoteza hata mmoja wao.[64]

⁵⁵Yuda na Yonathani walipokuwa Gileadi, na ndugu yao Simoni alipokuwa anaushambulia mji wa Tolemai katika Galilaya,

⁵⁶Yosefu na Azaria, makamanda wa jeshi lililobaki Yudea, walisikia habari za ujasiri na ushindi wao.

⁵⁷Wakaambiana: “Na tuanze vita na watu wa mataifa yanayotuzunguka, tujipatie sifa fulani na sisi.”

⁵⁸Hivi, wakatoa amri kwa watu wao, wakaushambulia mji wa Yamnia.

⁵⁹Gorgia na watu wake wakatoka nje ya mji ili kupambana na Wayahudi hao.

⁶⁰Watu wa Gorgia wakawashinda Yosefu na Azaria, na kuwafuatia hadi mipakani mwa Yudea. Siku hiyo waliuawa Waisraeli wasiopungua 2,000.

⁶¹Hasara hiyo kubwa iliwapata kwa sababu Yosefu na Azaria walitafuta sifa, wakawakaidi Yuda na nduguze.

⁶²Zaidi ya hayo, hao hawakuwa wa ukoo wa Makabayo ambao Mungu alikuwa amewachagua kuleta uhuru kwa watu wa Israeli.

⁶³Yuda Makabayo na nduguze waliheshimiwa sana miongoni mwa Waisraeli na watu wote wa mataifa mengine. Watu waliposikia sifa zao,

⁶⁴walikusanyika makundi kwa makundi kuwapa hongera.

⁶⁵Kisha, Yuda, pamoja na ndugu zake, akaenda kusini kuwapiga vita wana wa Esau. Aliishambulia Hebroni na miji iliyoizunguka, akaziharibu ngome zake na kuunguza minara yake yote.

⁶⁶Halafu akaingia katika nchi ya Wafilisti, akipitia Marisa.

⁶⁷Siku hiyo makuhani kadha waliuawa katika mapigano kwa sababu, kwa tamaa ya kupata sifa ya ushujaa, walianzisha mapambano.

⁶⁸Yuda akageuka na kwenda Ashdodi katika Filistia. Huko akabomoa madhabahu zao, akazichoma moto sanamu za miungu yao, akaiteka nyara miji yao, kisha akarejea nchini Yudea.